ບໍ່ໜ້ອຍເລີຍ 2 ພັນກວ່າຄັນລົດນຳເຂົ້າບໍ່ຖືກຕ້ອງຢູ່ແຂວງຫົວພັນ

0
10

ບ້ານເຮົາມີບັນຫາລົດເຖື່ອນນຳເຂົ້າຢ່າງຜິດກົດໝາຍຈຳນວນຫຼາຍ ພາຍຫຼັງລັດຖະບານຊຸດນີ້ເຂົ້າມາບໍລິຫານໄດ້ມີທິດຊີ້ນຳໃຫ້ແກ້ໄຂບັນຫາດັ່ງກ່າວຢ່າງຈິງຈັງ ເຮັດໃຫ້ຫຼາຍແຂວງສາມາດເກັບກວາດ ແລະຂຶ້ນບັນຊີພວກລົດນຳເຂົ້າບໍ່ຖືກຕ້ອງນັ້ນຢ່າງຫຼວງຫຼາຍ ສະເພາະແຂວງຫົວພັນໃນປີ 2017 ສາມາດກວດພົບທັງໝົດ 2 ພັນກວ່າຄັນ.


ຕາມການລາຍງານຂອງທ່ານ ວັນແສງ ຄຳມັງໄຊ ຫົວໜ້າພະແນກການເງິນແຂວງຫົວພັນໃຫ້ຮູ້ວ່າ: ໃນ 1 ປີຜ່ານມາແຂວງຫົວພັນສາມາດເກັບກຳ ແລະ ຂື້ນທະບຽນລົດນຳເຂົ້າບໍ່ຖືກຕ້ອງໄດ້ກວດພົບທັງໝົດ 2 ພັນກວ່າຄັນ, ໄດ້ແກ້ໄຂໄປແລ້ວ 1.679 ຄັນ, ເຊິ່ງກວມເອົາ 80% ຂອງຈຳນວນລົດທັງໝົດ, ໃນນີ້ມີລົດຈັກ 1.569 ຄັນ, ລົດໃຫຍ່ 100 ກວ່າຄັນ, ເກັບລາຍຮັບເຂົ້າງົບປະມານຂອງແຂວງໄດ້ 5 ຕື້ກວ່າກີບ.


ທ່ານຍັງໃຫ້ຮູ້ອີກວ່າ ພາຍຫຼັງທີ່ໄດ້ຮັບແຈ້ງການຈາກກະຊວງການເງິນ ແລະ ກົມພາສີ ແຂວງຫົວພັນຈື່ງໄດ້ຮີບຮ້ອນອອກແຈ້ງການເຖິງບັນດາພະແນກການ ແລະ ບັນດາເມືອງທົ່ວແຂວງຫົວພັນເພື່ອເກັບກຳຂໍ້ມູນລົດນຳເຂົ້າບໍ່ຖືກຕ້ອງ ແລະ ນຳໃຊ້ລົດບໍ່ຖືກເປົ້າໝາຍເພື່ອແນ່ໃສ່ຄຸ້ມຄອງໃຫ້ຮັດກຸມ ພ້ອມທັງແຕ່ງຕັ້ງຄະນະສະເພາະກິດຈາກພະແນກການທີ່ກ່ຽວຂ້ອງຂອງແຂວງລົງໄປແຕ່ລະພະແນກການ, ບັນດາເມືອງ ແລະ ແຈ້ງເຊີນໃຫ້ເຈົ້າຂອງລົດທີ່ມີລົດນຳເຂົ້າບໍ່ຖືກຕ້ອງບໍ່ວ່າພາກລັດ, ບຸກຄົນຫຼືນິຕິບຸກຄົນໃຫ້ມາເສຍພາສີຕາມລະບຽບການ ແລະ ຕາມໂມງລັດຖະການ.

ສຳລັບມາດຕະການສະກັດກັ້ນຕໍ່ການລັກລອບເອົາລົດນໍາເຂົ້າບໍ່ຖືກຕ້ອງນັ້ນພະແນກການເງິນໄດ້ມອບໃຫ້ເຈົ້າໜ້າທີ່ບັນດາດ່ານຕິດຕາມ ແລະ ຈຳກັດການນຳເຂົ້າ, ສ່ວນກອງກວດກາພາສີ, ເຈົ້າໜ້າທີ່ພາສີກວດກາແມ່ນໃຫ້ຕິດຕາມກວດກາບັນດາພະແນກ ການອ້ອມຂ້າງແຂວງ, ເມືອງໃຫ້ທົ່ວເຖິງ.

ແຫຼ່ງຂ່າວຈາກແຂວງຫົວພັນ

LEAVE A REPLY

Please enter your comment!
Please enter your name here