ປີໃໝ່ລາວ ແຂວງຄໍາມ່ວນມີຄົນເສຍຊີວິດ 05 ຄົນຍ້ອນອຸບັດຕິເຫດ

0
24

ທ່ານ ພັທ ພອນໄຊ ສຸວັນນະບຸບຜາ ຫົວໜ້າພະແນກຈາລະຈອນ ປ.ກ.ສ ແຂວງຄໍາມ່ວນໄດ້ລາຍງານໃຫ້ຮູ້ວ່າ : ນັບແຕ່ວັນທີ 11 – 16 ເມສາ 2018 ທົ່ວແຂວງໄດ້ມີອຸບັດຕິເຫດເກີດຂຶ້ນທັງໝົດ 19 ຄັ້ງ ໃນນີ້ມີຄົນເສຍຊີວິດ 05 ລາຍ, ບາດເຈັບສາຫັດ 04 ລາຍ, ບາດເຈັບສົມຄວນ 13 ລາຍ ແລະ ບາດເຈັບເລັກໜ່ອຍ 14 ລາຍ .

ຖ້າທຽບໃສ່ປີຜ່ານມາເຫັນວ່າຕົວເລກອຸບັດຕິເຫດແມ່ນເພີ້ມຂຶ້ນ 10 ຄັ້ງ , ການເສຍຊີວິດເພີ້ມຂຶ້ນ 03 ລາຍ , ບາດເຈັບສາຫັດເພີ້ມຂຶ້ນ 01 ລາຍ , ບາດເຈັບສົມຄວນທຽບເທົ່າກັບປີທີ່ຜ່ານມາ ແລະ ບາດເຈັບເລັກໜ່ອຍເພີ້ມຂຶ້ນ 07 ລາຍ , ພາຫະນະເປ້ເພທັງໝົດ 28 ຄັນ , ເປ້ເພສົມຄວນ 17 ຄັນ , ເປ້ເພເລັກໜ່ອຍ 10 ຄັນ ແລະ ໃຊ້ງານບໍ່ໄດ້ແມ່ນມີ 01 ຄັນ . ສ່ວນວ່າເມືອງທີ່ເກີດອຸບັດຕິເຫດສູງສຸດແມ່ນເມືອງທ່າແຂກມີ 08 ລາຍ , ເສຍຊີວິດ 05 ລາຍ , ສ່ວນເມືອງເຊບັ້ງໄຟ , ເມືອງມະຫາໄຊ ແລະເມືອງໜອງບົກແມ່ນມີອຸບັດຕິເຫດເກີດຂຶ້ນເມືອງລະ 02 ລາຍ , ສ່ວນເມືອງຫີນບູນ , ນາກາຍ , ຍົມມະລາດ , ໄຊບົວທອງ ແລະ ຄູນຄໍາແມ່ນໄດ້ເກີດອຸບັດຕິເຫດເມືອງລະ 01 ລາຍ .

ທ່ານ ພັທ ພອນໄຊ ສຸວັນນະບຸບຜາໄດ້ກ່າວຕື່ມອີກວ່າ : ບັນຫາພົ້ນເດັ່ນທີ່ພາໃຫ້ເກີດອຸບັດຕິເຫດແມ່ນຍ້ອນການດື່ມສິ່ງມຶນເມົາ , ເມົາແລ້ວຂັບຂີ່ລົດ , ຂັບຂີ່ໄວເກີນກໍານົດ , ປ່ຽນທິດທາງກະທັນຫັນ , ລ້ຽວຊ້າຍ – ລ້ຽວຂວາບໍ່ເປີດໄຟສັນຍານ ແລະ ບໍ່ໃຫ້ກຽດເຊິ່ງກັນ ແລະ ກັນໃນການສັນຈອນ ທັງໝົດນີ້ກໍ່ແມ່ນຜູ້ຂັບຂີ່ບໍ່ນັບຖືກົດລະບຽບຈາລະຈອນ .

ແຕ່ເຖິງຢ່າງໃດກໍ່ຕາມເຈົ້າໜ້າທີ່ຕໍາຫຼວດ ປ.ກ.ສ ແຂວງຄໍາມ່ວນໂດຍສະເພາະແມ່ນເຈົ້າໜ້າທີ່ຕໍາຫຼວດກອງຄະດີອຸ ບັດຕິເຫດນັບທັງແຂວງ ແລະ ເມືອງແມ່ນຈະຕ້ອງໄດ້ສືບຕໍ່ເອົາໃຈໃສ່ລົງເຄື່ອນໄຫວໂຄສະນາສຶກສາອົບຮົມນັກຂັບຂີ່ຜູ້ທີ່ໃຊ້ລົດໃຊ້ຖະໜົນຢູ່ຕາມຊຸມຊົນ , ໂຮງຮຽນ ແລະ ຕາມສໍານັກງານ-ອົງການໃນທົ່ວແຂວງໃຫ້ມີສະຕິລະວັງຕົວປະຕິບັດກົດລະບຽບຈາລະຈອນໃນການຂັບຂີ່ລົດເພື່ອຫຼຸດຜ່ອນອຸບັດຕິເຫດທີ່ຈະເກີດຂຶ້ນຕາມທ້ອງຖະໜົນ .

LEAVE A REPLY

Please enter your comment!
Please enter your name here