ບຸນປີໃໝ່ລາວ ທີ່ບໍລິຄຳໄຊ ເສຍຊີວິດ 04 ລາຍ ຈາກອຸບັດຕິເຫດ

0
12

ການສະເຫຼີມສະຫຼອງສົ່ງທ້າຍປີເກົ່າ ພ.ສ 2560 ແລະ ຕ້ອນຮັບປີໃໝ່ ພ.ສ 2561 ໃນລະຫວ່າງວັນທີ 13-17 ເມສາ 2018 ຢູ່ແຂວງບໍລິຄຳໄຊ ກໍ່ໄດ້ຈັດຕັ້ງການສະເຫຼີມສະຫຼອງບຸນປີໃໝ່ລາວ ຢ່າງເປັນຂະບວນພົດຟື້ນ ແລະ ມ່ວນຊື່ນຢ່າງເປັນຂະບວນກວ້າງຂວາງ ແລະ ເປັນຂີດໝາຍອັນສຳຄັນເພາະໜຶ່ງປີມີຄັ້ງໜຶ່ງທີ່ຄົນລາວຊາວພຸດພວກເຮົາ ໄດ້ຂໍຂະມາຜູ້ມີບຸນຄຸນຕໍ່ຕົນເອງ ແລະ ຄອບຄົວ ພ້ອມທັງການອວຍໄຊໃຫ້ພອນເຊີ່ງກັນ ແລະ ກັນ ລະຫວ່າງພໍ່ແມ່, ອ້າຍນ້ອງ, ເພື່ອນມິດສະຫາຍ ຫົດສົງພໍ່ແມ່ຄູບາອາຈານ ຄຽງຄູ່ກັບການມ່ວນຊື່ນແລ້ວ ດ້ານປ້ອງກັນຄວາມສະຫງົບໃນງານບຸນຕາມບ້ານຕ່າງໆ ກໍ່ເຫັນວ່າມີຄວາມສະຫງົບຮຽບຮ້ອຍດີ ແຕ່ມີບາງບຸກຄົນດື່ມເຫຼົ້າເມົາແລ້ວຂັບຂີ່ລົດດ້ວຍຄວາມປະໝາດບໍ່ເຄົາລົບກົດຈາລະຈອນ ເປັນເຫດໃຫ້ມີການສູນເສຍຊີວິດ ແລະ ຊັບສິນຕ່າງໆ.

ທ່ານ ພັນຕີ ເດດ ມີໄຊ ຫົວໜ້າພະແນກ ຈະລາຈອນ ປກສ ແຂວງບໍລິຄຳໄຊ ໄດ້ລາຍງານໃຫ້ຮູ້ວ່າ: ໃນໄລຍະການຫຼິ້ນບຸນປີໃໝ່ລາວປີນີ້ ທົ່ວແຂວງບໍລິຄຳໄຊ ມີອຸບັດຕິເຫດເກີດຂື້ນຈຳນວນ 15 ເລື່ອງ, ໄດ້ຮັບເຄາະຮ້າຍ 32 ລາຍ ຍິງ 8, ບາດເຈັບເລັກນ້ອຍ 18 ລາຍ, ບາດເຈັບສົມຄວນ 8 ລາຍ, ບາດເຈັບສາຫັດ 02 ລາຍ, ເສຍຊີວິດ 04 ລາຍ, ຍິງ 2, ພາຫະນະເປ່ເພທັງໝົດ 25 ຄັນ, ເປ່ເພເລັກນ້ອຍ 12 ຄັນ, ສົມຄວນ 12 ຄັນ ແລະ ໃຊ້ການບໍ່ໄດ້ 01 ຄັນ. ທຽບໃສ່ປີທີ່ຜ່ານມາຄົນເສຍຊີວິດຫຼຸດລົງ 01 ຄົນ.

ຈາກການເກີດອຸບັດຕິເຫດທັງ 7 ຕົວເມືອງ ເຫັນວ່າເມືອງທີ່ເກີດອຸບັດຕິເຫດຫຼາຍກວ່າໝູ່ແມ່ນເມືອງຄຳເກີດ 7 ເລື່ອງ, ສາເຫດທີ່ພາໃຫ້ເກີດອຸບັດຕິເຫດ ຍ້ອນພາຫະນະເພີ່ມຂຶ້ນຢ່າງຫຼວງຫຼາຍ, ດື່ມສິ່ງມຶນເມົາແລ້ວຂັບລົດ, ຂັບຂີ່ໄວເກີນກຳນົດ, ປະໝາດ ແລະ ບໍ່ເຄົາລົບກົດຈະລາຈອນ, ທຽບໃສ່ປີທີ່ຜ່ານມາອຸບັດຕິເຫດຫຼຸດລົງ 9 ເລື່ອງ ສາເຫດທີ່ພາອຸບັດຕິເຫດຫຼຸດລົງ ກໍ່ແມ່ນຍ້ອນການຊີ້ນຳ-ນຳພາຂອງຄະນະກອງບັນຊາການ ປກສ ແຂວງ ໄດ້ໃຫ້ທິດຊີ້ນຳຢ່າງໃກ້ຊິດ ບວກກັບກຳລັງຈະລາຈອນທົ່ວແຂວງເຮັດໜ້າທີ່ປະຈຳການຕະຫຼອດ 24 ຊົ່ວໂມງ ແລະ ລົງໂຄສະນາເຜີຍແຜ່ຕາມຊຸມຊົນທີ່ມີການຄົບງັນຕ່າງໆໃຫ້ເຂົ້າໃຈກ່ຽວກັບການໃຊ້ລົດໃຊ້ຖະໜົນ.

ແຫຼ່ງທີ່ມາຈາກ: http://bolikhamxay.gov.la

LEAVE A REPLY

Please enter your comment!
Please enter your name here