ທ່ານນາຍົກລັດຖະມົນຕີ ຕ້ອນຮັບປະທານລັດຖະສະພາ ແຫ່ງ ປະເທດສີລັງກາ

0
13

 

​​ໃນຕອນເຊົ້າ ຂອງວັນທີ 23 ເມສາ 2018 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມ ຂອງທ່ານ ກາຣູ ຈາຍາສຸຣິຍາ, ປະທານລັດຖະສະພາ ແຫ່ງປະເທດສີລັງກາ ພ້ອມດ້ວຍຄະນະ.ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາຢ້ຽມ​ຢາມສັນຖະວະໄມຕີ ທີ່ ສປປ ລາວ ຢ່າງເປັນທາງການ ຂອງທ່ານປະທານລັດຖະສະພາ ແຫ່ງ ປະເທດສີລັງກາ ໃນຄັ້ງນີ້ ເຊິ່ງມີຄວາມໝາຍສຳຄັນຢ່າງຍິ່ງ ໃນການປະກອບສ່ວນເຂົ້າໃນການເພີ່ມທະວີ ສາຍພົວພັນມິດຕະພາບ ແລະ ການຮ່ວມມື ທີ່ມີມາແດ່ດົນນານ ລະຫວ່າງ ສອງປະເທດ ເວົ້າລວມ, ເວົ້າສະເພາະ ສອງອົງການນິຕິບັນຍັດ ຂອງ ສປປ ລາວ ແລະ ສີລັງກາ ໃຫ້ແໜ້ນແຟ້ນຂຶ້ນຕື່ມອີກບາດກ້າວໜຶ່ງ.

 

ພ້ອມດຽວກັນນີ້, ກໍ່ໄດ້ຕີລາຄາສູງ ຕໍ່ສາຍພົວພັນ ແລະ ການຮ່ວມມື ຂອງສອງປະເທດ ທີ່ໄດ້ມີທ່ວງທ່າຂະຫຍາຍຕົວຂຶ້ນເປັນກ້າວໆ ໂດຍສະເພາະ ແມ່ນການຮ່ວມມື ໃນຂົງເຂດວັດທະນະທຳ, ການສຶກສາ, ສາທາລະນະສຸກ, ກະສິກຳ ແລະ ອື່ນໆ. ນອກນັ້ນ, ທ່ານນາຍົກລັດຖະມົນຕີ ຍັງໄດ້ຍົກໃຫ້ເຫັນມູນເຊື້ອອັນດີງາມ ໃນການພົວພັນ ເຊິ່ງກັນ ແລະ ກັນ ຂອງປະຊາຊົນສອງຊາດ ລາວ ແລະ ສີລັງກາ ໃນຫຼາຍຮ້ອຍປີທີ່ຜ່ານມາ ລວມທັງ ຄວາມປະທັບໃຈ ທີ່ທ່ານນາຍົກລັດຖະມົນຕີ ໄດ້ມີໂອກາດໄປຢ້ຽມຢາມສີລັງກາ ໃນປີ 2009 ແລະ ອື່ນໆ.


​ໃນໂອກາດດຽວກັນ, ທ່ານປະທານລັດຖະສະພາ ແຫ່ງປະເທດສີລັງກາ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານນາຍົກລັດຖະມົນຕີ ແລະ ພາກສ່ວນທີ່ກ່ຽວຂ້ອງ ຂອງ ສປປ ລາວ ໃນຄັ້ງນີ້. ພ້ອມທັງ ກ່າວເຊື້ອເຊີນ ທ່ານນາຍົກລັດຖະມົນຕີ ແຫ່ງ ສປປ ລາວ ໄປຢ້ຽມຢາມປະເທດສີລັງກາ ໃນເວລາອັນເໝາະສົມ ຕື່ມອີກ. ນອກນັ້ນ, ຍັງໄດ້ນຳສະເໜີ ໃຫ້ທ່ານນາຍົກລັດຖະມົນຕີ ໄດ້ຮັບຊາບ ກ່ຽວກັບສະພາບທາງດ້ານການເມືອງ ແລະ ການພັດທະນາທີ່ພົ້ນເດັ່ນ ຂອງສີລັງກາ ໃນໄລຍະຜ່ານມາ ກໍ່ຄື ປະຈຸບັນ.​

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ

LEAVE A REPLY

Please enter your comment!
Please enter your name here