ຊຽງຂວາງຈັດ!!!ເສັງຜ່ານໄມໂຄຊັອບໃຫ້ໃບຢັ້ງຢືນເອງ

0
19
????????????????????????????????????

 

ສູນປະກັນຄຸນນະພາບການສຶກສາ ກະຊວງສຶກສາທິການ ແລະ ກິລາ ຮ່ວມກັບສູນໄອຊີທີ ພະແນກສຶກສາທິການ ແລະກິລາ ແຂວງຊຽງຂວາງ ໄດ້ຈັດການສອບເສັງ ແຂ່ງຂັນການນໍາໃຊ້ໄມໂຄຣຊັອບອັອບຟິສ໌(Microsoft Office) ປະຈໍາປີ 2018 ສໍາລັບນ້ອງນັກຮຽນ-ນັກສຶກສາ ທົ່ວແຂວງ ໃນວັນທີ 21 ເມສາ ຜ່ານມາ ທີ່ສູນໄອຊີທີ ແຂວງ ໂດຍໃຫ້ກຽດເຂົ້າຮ່ວມຂອງທ່ານ ທອງເພັດ ອິນທະໄຊ ຮອງຫົວໜ້າພະແນກສຶກສາທິການ ແລະ ກິລາ ແຂວງ, ທ່ານ ບົງດວງຈັນ ປໍ້ມົວ ຮອງຫົວໜ້າຂະແໜງທົດສອບຜົນການຮຽນ ສູນປະກັນຄຸນນະພາບການສຶກສາ, ທ່ານ ອ່ອນສີ ແກ້ວພັກດີ ຫົວໜ້າສູນໄອຊິີທີ ແຂວງ, ມີຄະນະຮັບຜິດຊອບການສອບເສັງມາຈາກຂັ້ນກະຊວງ, ພະນັກງານຮັບຜິດຊອບຈາກສູນໄອຊີທີແຂວງ ແລະ ນ້ອງນັກສອບເຂົ້າຮ່ວມ 50 ກວ່າຄົນ.

ທ່ານ ບົງດວງຈັນ ປໍ້ມົວ ກ່າວລາຍງານໃຫ້ຮູ້ວ່າ: ແຂວງຊຽງຂວາງເປັນແຂວງໜຶ່ງທີ່ນອນຢູ່ໃນ 06 ແຂວງເປົ້າໝາຍ ຖັດຈາກ(ນະຄອນຫຼວງວຽງຈັນ, ແຂວງວຽງຈັນ, ໄຊຍະບູລີ, ສະຫວັນນະເຂດ ແລະ ຈໍາປາສັກ) ທີ່ສູນປະກັນຄຸນນະພາບການສຶກສາ ໄດ້ຈັດໃຫ້ມີການແຂ່ງຂັນການນໍາໃຊ້ ໄມໂຄຣຊັອບ ອັອບຟິສ໌ ເວີຣດ, ເອັກແຊລ, ພາວເວີຣພອຍ໌ ປະຈໍາປີ 2018 ສໍາລັບນ້ອງນັກຮຽນ-ນັກສຶກສາ ຜູ້ທີ່ມີຄວາມສົນໃຈ, ມີຄວາມຮູ້ ຄວາມສາມາດ ແລະ ພອນສະຫວັນ.

ໃນນັ້ນມີ 03 ຫົວຂໍ້ທີ່ນໍາມາແຂ່ງຂັນຄື: Microsoft Office Word 2016, Microsoft Office Excel 2016 ແລະ Microsoft Office PowerPoint 2016, ມີ 07 ຮູບແບບຄໍາຖາມທີ່ນັກສອບຈະຕ້ອງໄດ້ຕອບຈົນສໍາເລັດ ໂດຍໃຊ້ເວລາທັງໝົດ 45-50 ນາທີ, ຊຶ່ງມີຄະແນນລວມທັງໝົດ 1.000 ຄະແນນ, ຖ້າຫາກນັກສອບຄົນໃດສອບໄດ້ 700 ຄະແນນຂຶ້ນໄປ ຈາກຄະແນນເຕັມ 1.000 ຄະແນນ ແມ່ນຈະໄດ້ຮັບໃບຢັ້ງຢືນໃນລະດັບສາກົນອອກໃຫ້ ໂດຍບໍລິສັດໄມໂຄຣຊັອບ(Certiport-USA) ເຊີ່ງສາມາດນໍາໃຊ້ໄດ້ໃນທົ່ວໂລກ.

ທ່ານ ບົງດວງຈັນ ປໍ້ມົວ ກ່າວຕື່ມອີກວ່າ: ປີນີ້ເປັນປີທີ IV ທີ່ແຂວງຊຽງຂວາງໄດ້ເຂົ້າຮ່ວມແຂ່ງຂັນການນໍາໃຊ້ ໄມໂຄຣຊັອບ ອັອບຟິສ໌ ຈາກສູນປະກັນຄຸນນະພາບການສຶກສາຈັດຂຶ້ນ ໂດຍມີນັກຮຽນ-ນັກສຶກສາທົ່ວແຂວງເຂົ້າຮ່ວມທົດສອບທັງໝົດ 47 ນ້ອງ, ຍິງ 17 ນ້ອງ.

ຈຸດປະສົງແມ່ນເພື່ອວັດແທກລະດັບຄວາມສາມາດການນໍາໃຊ້ Microsoft Office ຂອງນ້ອງນັກຮຽນ-ນັກສຶກສາ, ສົ່ງເສີມການນໍາໃຊ້ດ້ານ ໄອທີ ເຂົ້າໃນການຮຽນ-ການສອນ, ກະຕຸກຊຸກຍູ້ໃຫ້ບັນດາລັດຖະກອນ ນັກຮຽນ-ນັກສຶກສາ ເຫັນຄວາມສໍາຄັນຂອງການນໍາໃຊ້ ໄອທີ ພ້ອມທັງເປັນການຄັດເລືອກເອົາຕົວແທນນັກຮຽນ-ນັກສຶກສາ ຈາກ ສປປ ລາວ ເຂົ້າຮ່ວມແຂ່ງຂັນ Microsoft Office World Championship ປະຈໍາປີ 2018 ໃນກາງເດືອນ ສິງຫາ 2018 ທີ່ປະເທດ ສະຫະລັດອາເມລິກາ ທີ່ຈະມາເຖິງນີ້.

ຂ່າວໂດຍ: ຄານສີສະຫັວນ ພົງພັກດີ

LEAVE A REPLY

Please enter your comment!
Please enter your name here