ນະຄອນຫຼວງວຽງຈັນ ເປີດຂະບວນການອະນາໄມ ຄອງລະບາຍນ້ຳບຶງທາດຫຼວງ ເພື່ອຮັບມືກັບລະດູຝົນທີ່ຈະມາເຖິງ

0
12

ໃນຕອນເຊົ້າຂອງວັນທີ 28 ເມສາ ຜ່ານມາ ຄະນະພັກອົງການປົກຄອງເມືອງໄຊເສດຖາ ໄດ້ນຳພາປະຊາຊົນ ຈຳນວນ 34 ບ້ານ, ສົມທົບກັບພະແນກກະສິກຳ ແລະ ປ່າໄມ້ ນະຄອນຫຼວງວຽງຈັນ, ຫ້ອງການຄຸ້ມຄອງ ແລະ ບໍລິການເມືອງວຽງຈັນ ໄດ້ເປີດຂະບວນການອອກແຮງງານລວງຄອງລະບາຍນ້ຳ ບຶງທາດ ຫຼວງ ຂຶ້ນທີ່ຈຸດບ້ານຂົວໜອງໜ່ຽງ, ເມືອງໄຊເສດຖາ, ນະຄອນຫຼວງວຽງຈັນ ເອົາຜັກຕົບອອກເພື່ອເຮັດໃຫ້ນ້ຳໄຫຼສະດວກ ແລະ ປ້ອງກັນນ້ຳຖ້ວມຕົວເມືອງໄລຍະລະດູຝົນທີ່ຈະມາເຖິງ ໂດຍມີຈຳນວນຄົນເຂົ້າຮ່ວມອອກແຮງງານໃນຄັ້ງນີ້ປະມານ 1.500 ຄົນ ແລະ ມີເຄື່ອງກົນຈັກໜັກ (ລົດຈົກ) 2 ຄັນ.


ທ່ານ ຖະໜອມ ທຳທອງ ເຈົ້າເມືອງໆໄຊເສດຖາ ໃຫ້ສຳພາດວ່າ: ຈຸດປະສົງຫຼັກຂອງການເຮັດອະນາໄມຄອງລະບາຍນ້ຳບຶງທາດຫຼວງນີ້ ເພື່ອ ປ້ອງກັນນ້ຳຖ້ວມຂັງ ແລະ ເປັນການສ້າງຂະບວນການຂໍ່ານັບຮັບຕ້ອນການສະເຫຼີມສະຫຼອງວັນກຳມະກອນສາກົນ ວັນທີ 1 ພຶດສະພາ 2018 ຄົບຮອບ 132 ປີ ເຊິ່ງໜ້າວຽກຫຼັກຂອງການອະນາໄມໃນຄັ້ງນີ້ແມ່ນເອົາຜັກຕົບຂຶ້ນຈາກຄອງ ເພື່ອເຮັດໃຫ້ນ້ຳໄຫຼສະດວກ ເຊິ່ງເປັນແຜນວຽກທີ່ໄດ້ເຮັດທຸກໆປີ ໃນໄລຍະໃກ້ລະດູຝົນ ທີ່ຈະຕ້ອງໄດ້ມີການລວງຄອງເພື່ອຕ້ານໄພນ້ຳຖ້ວມຕົວເມືອງ ແລະ ໄລຍະການເຮັດອະນາໄມລວງຄອງໃນຄັ້ງນີ້ ແມ່ນມີ ຄວາມຍາວ 4.500 ແມັດ, ແຕ່ຂົວທາດຫຼວງ ຫາ ຂົວຮ່ອງແຊງ ມີໄລຍະຄວາມຍາວ 3.000 ແມັດ, ແຕ່ຂົວໜອງໜ່ຽງ ລົງໄປຫາຮ່ອງສຸພາບ 1.000 ແມັດ ແລະ ແຕ່ບ້ານຮ່ອງສຸພາບ ໄປຫາ ຂົວຊຳເຄ 500 ແມັດ.

 

ແຫຼ່ງທີ່ມາຈາກໜັງສືພິມ ເສດຖະກິດ ການຄ້າ

LEAVE A REPLY

Please enter your comment!
Please enter your name here