ການຮັບສິນບົນລະບາດແຮງ ໄອຍະການເປີດຮັບຄຳຮ້ອງໂດຍກົງຈາກປະຊາຊົນ

0
381

 

ການຮັບສິນບົນຈາກຜູ້ຕ້ອງຫາກາຍເປັນປະກົດການຫຍໍ້ທໍ້ໜຶ່ງໃນວຽກງານໄອຍະການທີ່ຂະແໜງການກ່ຽວຂ້ອງຕ້ອງເລັ່ງຈັດການແກ້ໄຂ ເພື່ອຫຼຸດຜ່ອນບັນຫາຫາງສຽງສັງຄົມ ທັງເປັນການປັບປຸງຈັນຍາບັນຂອງພະນັກງານບໍ່ໃຫ້ໂລດໂຜນໄປກວ່ານີ້ ໂດຍທ່ານຫົວໜ້າອົງການໄອຍະການປະຊາຊົນສູງສຸດ ຍອມຮັບ​ວ່າ ປະຊາຊົນ​ລາວບໍ່ພໍໃຈຕໍ່ການ​ປະຕິບັດໜ້າທີ່ຂອງ​ບັນດາພະນັກງານໄອຍະການຫລາຍ​ຂຶ້ນ ​ໂດຍ​ສະ​ເພາະແມ່ນ​ການ​ຮັບ​ສິນ​ບົນ ​ເພື່ອ​ຊ່ວຍ​ໃຫ້​ຜູ້​ຕ້ອງ​ຫາ​ພົ້ນຄວາມ​ຜິດ​.

ທ່ານ ຄໍາ​ສານ ສຸ​ວົງ ປະທານອົງການໄອຍະການປະຊາຊົນສູງສຸດຍອມຮັບ​ວ່າ ປະຊາຊົນ​ລາວ​ໄດ້​ມີ​ການສະ​ແດງ​ອອກ​ເຖິງຄວາມ​ບໍ່ພໍໃຈ ​ແລະ​ຄວາມ​ບໍ່​ເຊື່ອໝັ້ນ ຕໍ່ການ​ປະຕິບັດໜ້າທີ່ຂອງ​ບັນດາພະນັກງານ​ໃນ​ທົ່ວ​ປະ​ເທດ​ລາວນັບມື້ຫຼາຍ​ຂຶ້ນ​ໂດຍມີ​ສາ​ເຫດ​ມາ​ຈາກ ການ​ປະຕິບັດໜ້າທີ່​ບໍ່ສຸດຈະລິດ ​ໂດຍ​ສະ​ເພາະ​ແມ່ນ​ການຮັບ​ເອົາ​ສິນ​ບົນ​ຈາກຜູ້​ຕ້ອງ​ຫາ ທີ່​ເກີດ​ຂຶ້ນຫລາຍ​ທີ່​ສຸດ ​ໃນ​ປັດຈຸບັນ ​ແລະ​ເພື່ອແກ້​ໄຂ​ບັນຫາດັ່ງກ່າວອົງການໄອຍະການປະຊາຊົນ ຈຶ່ງ​ໄດ້​ເລີ້ມ​ເປີດ​ຮັບ​ຈົດໝາຍຮ້ອງ​ຮຽນ​ໂດຍ​ກົງ​ຈາກ​ປະຊາຊົນ​ໂດຍ​ມີ​ເງື່ອນ​ໄຂວ່າ ປະຊາຊົນ​ທີ່​ສົ່ງ​ຈົດໝາຍຮ້ອງ​ຮຽນນັ້ນຈະ​ຕ້ອງເປີດ​ເຜີຍ​ຊື່ ​ແລະ​ລົງລາຍ​ເຊັນ​ຂອງ​ຕົນ​ອີກ​ດ້ວຍ.

ທ່ານຫົວໜ້າອົງການໄອຍະການກ່າວວ່າ: ​“ການ​ອໍານວຍເງື່ອນ​ໄຂ​ໃຫ້​ແກ່ປະຊາຊົນກວດກາ​ການ​ປະຕິບັດ​ງານຂອງ ພະນັກງານໄອຍະການ ​ໄດ້​ທຸກ​ລະດັບ ທຸກ​ກໍລະນີ ພວກ​ຂ້າພະ​ເຈົ້າມີ​ຕູ້​ຕິດ​ຢູ່​ອົງການໄອຍະການ​ໃນ​ແຕ່ລະ​ຂັ້ນ​ໄປ​ປ່ອນ​ໂລດ ​ແຕ່​ວ່າ​ຄໍາ​ຟ້ອງ​ຮ້ອງ ​ແລະ​ເອກະສານ​ຕ່າງໆ ຕ້ອງ​ຖືກຕ້ອງ ຕ້ອງ​ເຊັນຊື່ ຄັນ​ບໍ່ມີ​ລາຍ​ເຊັນຂອງ​ຜູ້​ຟ້ອງ​ຮ້ອງ ຫລື​ຂອງ​ຜູ້​ເຈົ້າຂອງ​ບັດ​ສົນ​ເທ່ຫັ້ນລະ​ແມ່ນ​ພວກ​ເຮົາ​ບໍ່ຮັບ​ພິຈາລະນາ ເພາະບໍ່ຮູ້​ວ່າ​ແມ່ນ​ໃຜ​ສະ​ເໜີມາ ຖ້າ​ບໍ່ກ້າ​ຍື່ນ​ຢູ່​ຂັ້ນດຽວກັນ ​ກໍໃຫ້​ຍື່ນ​ມາ​ໂລດທາງອົງການໄອຍະການສູງສຸດຂອງ​ຂ້າພະ​ເຈົ້າ”

​ແຕ່ຢ່າງໃດກໍຕາມ ​ອີງ​ຕາມ​ການ​ລາຍ​ງານ​ຂອງອົງການໄອຍະການປະຊາຊົນສູງສຸດຂອງລາວ ກໍປາກົດ​ວ່າ ​ໃນ​ປີ 2017 ຜ່ານ​ມາ ອົງການໄອຍະການປະຊາຊົນສູງສຸດ​ໄດ້​ຮັບ​ຈົດໝາຍຟ້ອງ​ຮ້ອງ​ຈາກ​ປະຊາຊົນ​ພຽງ​ແຕ່ 3 ສະບັບ​ເທົ່າ​ນັ້ນ ຊຶ່ງອົງການໄອຍະການປະຊາຊົນສູງສູດ​ໄດ້​ດໍາ​ເນີນການ​ສອບ​ສວນ​ໄປ​ແລ້ວ 1 ສະບັບ ​ແລະ​ພົບ​ວ່າ ມັນ​ເປັນ​ຈິງ​ຕາມການ​ຟ້ອງ​ຮ້ອງ​ຂອງ​ປະຊາຊົນ​ແທ້ ຈິ່ງ​ໄດ້​ດໍາ​ເນີນ​ຄະດີ​ອາຍ​າກັບ ພະນັກງານ​ໄອຍະການ​ສອງ​ຄົນ ​ແລະ​ໄລ່​ອອກ​ການ 3 ຄົນ. ສ່ວນ​ອີກ 2 ສະບັບ​ກໍ​ຈະ​ດໍາເນີນສອບ​ສວນ​ຕໍ່​ໄປ.

 

 

Cr: Support Prime Minister Thongloun Sisoulith

LEAVE A REPLY

Please enter your comment!
Please enter your name here