ໄປຊຽງເງິນທ່ຽວໃສດີ

0
16

ເມືອງນານແຂວງຫລວງພະບາງໄດ້ຈັດພິທີສະເຫລີມສະຫລອງປີທ່ອງທ່ຽວລາວ 2018 ຂື້ນໃນວັນທີ 28 ເມສາຜ່ານມານີ້ ຖືເປັນຄັ້ງປະຫວັດສາດທີ່ໄດ້ແນະນຳບັນດາແຫຼ່ງທ່ອງທ່ຽວໃຫ້ກັບແຂກຄົນພາຍໃນ ແລະຕ່່າງປະເທດໄດ້ຮັບຮູ້ຫຼາຍຂຶ້ນ ເພາະຊຽງເງິນນອກຈາກເປັນເມືອງທາງຜ່ານ ແລ້ວຍັງມີແຫຼ່ງທ່ອງທ່ຽວທີ່ສວຍງາມຫຼາຍບ່ອນບວກກັບງານບຸນປະເພນີຕ່າງໆຂອງປະຊາຊົນບັນດາເຜົ່າ ຊຶ່ງພ້ອມແລ້ວຈະຕ້ອນຮັບຂັບສູ່ບັນດາທ່ານນັກທ່ອງທ່ຽວໄດ້ເຊີຍຊົມ.

ເຂົ້າຮ່ວມພິທີເປີດປີທ່ອງທ່ຽວເມືອງຊຽງເງິນມີທ່ານ ບົວຄົງ ນາມມະວົງ ຮອງເຈົ້າແຂວງຫລວງພະບາງ ພ້ອມດ້ວຍການນຳຂອງແຂວງ, ເມືອງ, ປະຊາຊົນ, ແຂກທັງພາຍໃນແລະຕ່າງປະເທດເຂົ້າຮ່ວມ. ໃນພິທີ ທ່ານ ບຸນທີ ມະນີວົງ ຮອງເຈົ້າເມືອງປະທານຈັດປີທ່ອງທ່ຽວລາວ ກ່າວລາຍງານໂດຍຫຍໍ້ກ່ຽວກັບປີທ່ອງທ່ຽວລາວ 2018 ວ່າ: ການສະເຫລີມສະຫລອງປີທ່ອງທ່ຽວລາວ 2018 ຂອງເມືອງນານ ຖືວ່າເປັນຄັ້ງປະຫວັດສາດໂດຍທຸກພາກສ່ວນຂອງສັງຄົມພາຍໃນເມືອງໄດ້ມີສ່ວນຮ່ວມຢ່າງຕັ້ງໜ້າ ໃນການປະຕິບັດນະໂຍບາຍຂອງພັກ ກ່ຽວກັບແຜນຍຸດທະສາດຂອງແຂວງ ກໍ່ຄືການສະເຫລີມສະຫລອງປີທ່ອງທ່ຽວລາວ 2018 ສະເພາະເມືອງນານໄດ້ຈັດຂຶ້ນຕິດພັນກັບການບຸນບັ້ງໄຟ ອັນເປັນບຸນປະເພນີທີ່ເປັນເອກະລັກ ຂອງຊາວເມືອງນານທີ່ພ້ອມກັນສືບທອດມາແຕ່ບູຮານນະການ ເຊີ່ງຈະໄດ້ສົ່ງເສີມໃຫ້ກາຍເປັນງານບຸນມະຫາກຳການທ່ອງທ່ຽວໃນອະນາຄົດ.

ເມືອງນານເປັນເມືອງເຊື່ອມຕໍ່ປະຕູເຂົ້າ-ອອກ ຂອງນະຄອນ-ຫລວງພະບາງ ກັບ ແຂວງໄຊຍະບູລີ, ແຂວງວຽງຈັນ, ມີທ່າແຮງທາງດ້ານການທ່ອງທ່ຽວທາງດ້ານວັດທະນະທຳ ແລະທຳມະຊາດທີ່ອຸດົມສົມບູນ, ອັນພົ້ນເດັ່ນແມ່ນ ງານຊ່ວງເຮືອໃນບຸນອອກພັນສາ,ບຸກເຂົ້າກຳ, ບຸນມະຫາຊາດ, ບຸນກຸ້ມເຂົ້າ, ບຸນກີນຈຽງເຜົ້າມົ້ງ, ບຸນເກີຣເຜົ່າກື່ມມຸ, ທ່ຽວຊົມຕາດຮ່ຽນ, ຕາດບ້ານນານວນ, ຖ້ຳຜາດັງຄວາຍ, ຖ້ຳເຈຍ, ຖ້ຳນົກແອ່ນ, ຖ້ຳໜອງບົວ, ຖ້ຳໄກ່ແກ້ວ, ຖ້ຳຜານ້ຳທ່ຽງ, ຫົວນ້ຳອອກບ້ານທົ່ງຄັງ,ລ່ອງເຮືອທ່ຽວຊົມທຳມະຊາດໜ້າເຂື່ອນໄຟຟ້ານ້ຳຂອງ ແລະອື່ນໆ.

 

ສຳລັບກິຈະກຳທີ່ຈັດຂື້ນໃນໄລຍະການສະເຫລີມສະຫລອງປີທ່ອງທ່ຽວລາວ 2018 ແລະບຸນບັ້ງໄຟປະຈຳປີຂອງເມືອງນານປະກອບມີ: ການເປີດຕະຫລາດນັດຂາຍສີນຄ້າ, ການສະແດງສີລະປະວັນນະຄະດີ, ການແຂ່ງຂັນຈູດບັ້ງໄຟດອກ, ຕີກອງຍາວ, ປະກວດແລະຈູດບັ້ງໄຟຫາງ, ໃສ່ບາດ-ວຽນທຽນ ແລະຄົບງັນຕາມປະເພນີ. ພິທີຄະນະປະທານໄດ້ຮ່ວມກັນຕັດແຖບຜ້າ, ປ່ອຍປ້າຍ ແລະລັ່ນຄ້ອງ 9 ບາດເພື່ອເປັນສີລິມຸງຄຸນໃຫ້ແກ່ງານຕື່ມອີກ. ສຳລັບວັນທີ່ 29 ເມສາ ແມ່ນການປະກວດ ແລະຈູດບັ້ງໄຟຫາງຢ່າງເບີກບານມ່ວນຊື່ນ.

ຂ່າວໂດຍ: ອາພຸດເດດ ບຸບຜາ

LEAVE A REPLY

Please enter your comment!
Please enter your name here