ເປີດປະຕູ ສ່ອງເບິ່ງສ່ວນໜຶ່ງຂອງເມືອງດາກຈຶງ

0
20

ເພີ່ນວ່າ “ຄົນບໍ່ອອກຈາກບ້ານບໍ່ເຫັນດ່ານແດນໃກໃຜບໍ່ໄປຫາຮຽນບໍ່ຫ່ອນມີຄວາມຮູ້” ຜູ້ຂຽນໄດ້ມີໂອກາດເດີນທາງໄປຢ້ຽມຢາມ ແລະ ເຂົ້າຮ່ວມພິທີເປີດປີທ່ອງທ່ຽວລາວ 2018 ຢູ່ເມືອງດາກຈຶງ ແຂວງເຊກອງ ລະຫວ່າງ 25-30 ເມສາ 2018 ກັບຄວາມຮູ້ສຶກເປັນກຽດ, ດີໃຈຫາສິ່ງປຽບປານບໍ່ໄດ້ ແລະ ຂໍຂອບໃຈຢ່າງລົ້ນເຫລືອຕໍ່ການນໍາເມືອງດາກຈຶງ ລວມທັງແຂວງເຊກອງທີ່ເອື້ອອໍານວຍຄວາມສະດວກໃຫ້ຄະນະນັກຂ່າວຈາກສໍານັກຂ່າວສານປະເທດລາວໄດ້ໄປເກາະຕິດ ແລະ ເກັບກໍາຂໍ້ມູນຂ່າວສານຢູ່ທີ່ນັ້ນເປັນເວລາ 6 ວັນ ເຊິ່ງໄດ້ເຮັດໃຫ້ຜູ້ຂຽນຮູ້ສຶກໄດ້ເຖິງກິ່ນອາຍ ແລະ ບັນຍາກາດທີ່ເຕັມໄປດ້ວຍສຽງຫົວອັນແສນອົບອຸ່ນ, ມິດຕະພາບ, ຄວາມສາມັກຄີ ແລະ ນໍ້າໃຈໂອບເອື້ອອາລີຂອງປະຊາຊົນເມືອງດາກຈຶງຫາທີ່ສິ້ນບໍ່ໄດ້.


ຄວາມຈິງຜູ້ຂຽນບໍ່ໄດ້ຕັ້ງໃຈໄປເກັບກໍາຂໍ້ມູນຂ່າວສານພຽງແຕ່ງານເປີດປີທ່ອງທ່ຽວເທົ່ານັ້ນຫາກສ່ວນເລິກໃຕ້ຈິດສໍານຶກຂອງຜູ້ຂຽນຍັງຄິດ ແລະ ຫວັງໃນໃຈສະເໝີວ່າຄວາມຫລາກຫລາຍຂອງການນໍາສະເໜີສາລະໜ້າຮູ້ ລວມທັງໄດ້ຢູ່ໃກ້ຊິດກັບຄົນທ້ອງຖິ່ນທີ່ເປັນຊົນເຜົ່ານັ້ນຍິ່ງເຮັດໃຫ້ລົດຊາດຂອງຂ່າວເຂັ້ມຂຸ້ນຂຶ້ນຢ່າງມີຄຸນຄ່າ.


ຜູ້ຂຽນໄດ້ໃຊ້ເວລາຂັບລົດຫລາຍຊົ່ວໂມງກັບໄລຍະທາງເກືອບ 1.000 ກິໂລແມັດຈາກນະຄອນຫລວງວຽງຈັນຜ່ານແຂວງບໍລິຄໍາໄຊ, ຄໍາມ່ວນ, ສະຫວັນນະເຂດ, ຈໍາປາສັກຈົນເຖິງເມືອງດາກຈຶງ ແຂວງເຊກອງ ເຊິ່ງເປັນປະສົບການອີກລົດຊາດໜຶ່ງທີ່ຫາຊອກຊື້ຢູ່ຕະຫລາດບໍ່ໄດ້. ການເດີນທາງຮອດເທດສະບານເມືອງລະມາມຂອງແຂວງເຊກອງຍັງບໍ່ແມ່ນຈຸດໝາຍປາຍທາງສຸດທ້າຍ ແຕ່ຕ້ອງໄດ້ສືບຕໍ່ຂັບລົດຕາມເສັ້ນທາງຢາງທີ່ຫາກໍສໍາເລັດໃໝ່ໆໝາດໆຜ່ານພູຜາປ່າດົງ, ໂຄກຄ້ອຍ ແລະ ຜາຊັນປະມານ 99 ກິໂລແມັດຈິງເຖິງເມືອງດາກຈຶງ ສະນັ້ນກ່ອນຈະໄປຮູ້ງານບຸນ, ຮີດຄອງປະເພນີ ແລະ ວິຖີຊີວິດຂອງຊາວບ້ານທີ່ນັ້ນມື້ນີ້ຜູ້ຂຽນຈະນໍາສະເໜີຂໍ້ມູນເບື້ອງຕົ້ນດັ່ງນີ້: ເມືອງດາກຈຶງມີປະຊາກອນທັງຫມົດ 24.000 ກວ່າຄົນປະກອບມີ 4 ຊົນເຜົ່າໃຫຍ່ຄື: ຕະລ່ຽງກວມ 60%, ແຍະ 21 % , ກະຕູ 16% ແລະ ລາວ 2%; ເມືອງດາກຈຶງຕັ້ງຢູ່ທິດຕາເວັນອອກຂອງແຂວງ, ມີເນື້ອທີ່ທັງຫມົດ 373.220 ເຮັກຕາ, ເປັນເຂດພູດອຍກວມເອົາ 80%, ພູພຽງ 15% ແລະ ທົ່ງພຽງ 5% ທິດເຫນືອຕິດກັບເມືອງກາລຶມ, ທິດໃຕ້ຕິດກັບເມືອງຊານໄຊ ແຂວງອັດຕະປື, ທິດຕາເວັນອອກຕິດກັບເມືອງນາມຢາງ, ເມືອງໄຕຢາງ ແຂວງກວາງນາມ ແລະ ເມືອງດາກໄລ ແຂວງກອນຕູມ ສສ ຫວຽດນາມ, ມີອາກາດຫນາວເຢັນ, ຫມອກປົກຄຸມ ແລະ ຝົນຝອຍຕະຫລອດປີ, ປະລິມານນໍ້າຝົນ 2.000-2.500 ມມ/ປີ, ລະດັບສູງຈາກຫນ້ານໍ້າທະເລປະມານ 1.200 ແມັດ.


ຕະຫລອດໄລຍະຫລາຍວັນທີ່ໃຊ້ຊີວິດໃນເມືອງດາກຈຶງ, ຜູ້ຂຽນໄດ້ມີໂອກາດໄປຢ້ຽມຢາມ ແລະ ສ່ອງເບິ່ງການດໍາລົງຊີວິດ ລວມທັງການພັດທະນາຕ່າງໆພົບວ່າມັນເປັນຄວາມປະທັບໃຈ ແລະ ເປັນອີກມິຕິໜຶ່ງຂອງປະເທດລາວເນື່ອງຈາກວ່າອາກາດໜາວເຢັນ ແລະ ມີຝົນຕົກຕະຫລອດປີ ເຊິ່ງເປັນເຂດດິນດໍານໍ້າຊຸ່ມເອື້ອອໍານວຍທີ່ສຸດໃຫ້ແກ່ການຜະລິດກະສິກໍາເປັນສິນຄ້າ, ລ້ຽງສັດ ລວມທັງການສົ່ງເສີມການທ່ອງທ່ຽວແບບຊົົນເຜົ່າ, ກະສິກໍາ, ທໍາມະຊາດ ແລະ ປະຫວັດສາດ.


ໃນວັນທີ 30 ເມສາ ຜູ້ຂຽນໄດ້ຍາດເວລາໄປສ່ອງເບິ່ງປະຊາຊົນປູກໂສມໝື່ນປີ ແລະ ຢ້ຽມຢາມເຮືອນຊົນເຜົ່າຕະລ່ຽງ, ບ້ານດາກມວນ, ເມືອງດາກຈຶງ, ແມ່ນເຮືອນທີ່ເປັນເອກະລັກ ຂອງຊົນເຜົ່າຕະລຽງ ທີ່ເຮັດດ້ວຍວັດຖຸທຳມະຊາດ, ຫ່າງຈາກເທສະບານເມືອງດາກຈຶງ 8 ກິໂລແມັດ, ເຮືອນດັ່ງກ່າວ ແມ່ນເປັນເອກະລັກ ມີມາແຕ່ດັ້ງເດີມຂອງເຜົ່າ ເຊິ່ງນຳໃຊ້ວັດຖຸຈາກທຳມະຊາດທັງໝົດເຂົ້າໃນການປຸກສ້າງດ້ວຍຄວາມສາມັກຄີ ຂອງປະຊາຊົນພາຍໃນບ້ານຊ່ວຍກັນສ້າງແຕ່ລະຫລັງຄາເຮືອນ.


ໃນແຕ່ລະປີ ຊາວບ້ານໄດ້ຈັດຕັ້ງງານບຸນປະຈຳປີຂຶ້ນເພື່ອສະເຫລີມສະຫລອງຜົນສຳເລັດຈາກການເກັບກ່ຽວ ຜົນລະປູກໃນນັ້ນກໍມີ ການສະແດງສິລະປະພື້ນເມືອງ, ການນຸ່ງຖືທີ່ເປັນເອກະລັກຂອງເຜົ່າ, ການວາງສະແດງຜະລິດຕະພັນຕ່ຳແຜ່ນ ແລະ ຈັກສານ ເຊິ່ງກາຍເປັນສິນຄ້າອອກສູ່ຕະຫລາດ ແລະ ສາມາດສ້າງລາຍຮັບໃຫ້ປະຊາຊົນເປັນກອບເປັນກໍາຕາມແນວທາງຂອງພັກ-ລັດຖະບານເຮັດແນວໃດສູ້ຊົນເຮັດໃຫ້ປະຊາຊົນລາວບັນດາເຜົ່າຫລຸດພົ້ນອອກຈາກຄວາມທຸກຍາກ ແລະ ເຮັດໃຫ້ປະເທດອອກຈາກຄວາມດ້ອຍພັດທະນາພາຍໃນປີ 2020.

ບົດ-ພາບ: ເກີດຂວັນໃຈ/ຂປລ

LEAVE A REPLY

Please enter your comment!
Please enter your name here