ຫາລືແຜນການຈັດສັນ-ຍົກຍ້າຍ 624 ຄອບຄົວ ທີ່ໄດ້ຮັບຜົນກະທົບຈາກ ໂຄງການເຂື່ອນໄຟຟ້ານ້ຳເທີນ 1

0
28

ຂປລ. ​ເມື່ອ​ບໍ່​ດົນ​ມາ​ນີ້, ກອງເລຂາ ເຂື່ອນໄຟຟ້ານ້ຳເທີນ 1 ໄດ້ຈັດກອງປະຊຸມ ​ສະຫລຸບ​ວຽກ​ງານ ແນໃສ່ຈັດຕັ້ງປະຕິບັດວຽກງານ ຈັດສັນຍົກຍ້າຍ ແລະ ຊົດເຊີຍໂຄງການ ເຂື່ອນໄຟຟ້ານ້ຳເທີນ 1 ໃຫ້ໄດ້ຮັບການ ຈັດຕັ້ງປະຕິບັດ ໂດຍການເປັນປະທານ ຂອງທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ມີບັນດາຜູ້ພັດທະນາໂຄງການ ເຂື່ອນໄຟ້ຟ້ານ້ຳເທີນ 1, ພະແນກການ ​ແລະ ຂະແໜງການທີ່ກ່ຽວຂ້ອງ ເຂົ້າຮ່ວມ.

ທ່ານ ແກ້ວວົງເດືອນ ພັນທະນູສີ ຫົວໜ້າ ກອງເລຂາ ໄດ້ລາຍງານສະພາບການ ຈັດຕັ້ງປະຕິ ບັດວຽກງານ ຈັດສັນຍົກຍ້າຍ ແລະ ທົດແທນ ຄ່າເສຍຫາຍກຸ່ມ 1 ແລະ ກຸ່ມ 4, ຜົນຂອງການຕັດສິນໃຈ ຂອງປະຊາຊົນທີ່ໄປກັບໂຄງການ ແລະ ການຈັດລຳດັບມູນຄ່າ ການທົດແທນຄ່າເສຍຫາຍ, ການຈັດ ຕັ້ງປະຕິບັດເກັບກຳຂໍ້ມູນ ການຍັບຍ້າຍບ້ານທີ່ໄດ້ຮັບ ຜົນກະທົບກຸ່ມ 2 ແລະ ການເກັບກຳຂໍ້ມູນ ຜົນກະທົບເຂດກໍ່ສ້າງຄູກັນນ້ຳ ບ້ານນ້ຳຢ້າງ ເມືອງວຽງທອງ, ຜົນການເກັບກຳຂໍ້ມູນດິນກະສິກຳ ບ້ານຫ້ວຍຫອຍ ເພື່ອຂໍອະນຸມັດ ປຶກສາຫາລື ແລະ ໃຫ້ທິດຊີ້ນຳ ກ່ຽວກັບແຜນການຈັດຕັງປະຕິບັດ ໂຄງການໃນຕໍ່ໜ້າ ເຊິ່ງ 7 ບ້ານ ເມືອງວຽງທອງ ແລະ ມີ 624 ຄອບຄົວ ໃນນັ້ນບ້ານທ່າເດື່ອ 139 ຄອບຄົວ, ບ້ານພຽງຕົ້ນ, 69 ຄອບຄົວ, ບ້ານສົບບັດ 35 ຄອບຄົວ, ບ້ານກົກຕົ້ນ 59 ຄອບຄົວ, ບ້ານວັງມາກ 118 ຄອບຄົວ, ບ້ານນໍ້າມືດ 79 ຄອບຄົວ ແລະ ບ້ານໂພນໂຮມ 126 ຄອບຄົວ ຕາມການສໍາຫລວດ ແລະ ຕົກລົງເຫັນດີເປັນເອກະພາບ ກັນລະຫວ່າງພາກລັດ ແລະ ປະຊາຊົນ ຜູ້ທີ່ຖືກຜົນກະທົບ, ຜູ້ໃຫ້ທຶນຂອງໂຄງການແມ່ນ ຈະໄດ້ຍົກຍ້າຍຈຳນວນ 7 ບ້ານດັ່ງກ່າວ ທີ່ຖືກຜົນກະທົບ ໄປຈັດສັນບ້ານໃໝ່ ຢູ່ເຂດບ້ານໂພນດູ່ ແລະ ຫ້ວຍຫອຍ ເມືອງວຽງທອງ.

ພ້ອມນີ້ກອງປະຊຸມ ຍັງໄດ້ພ້ອມກັນ ປຶກສາຫາລືປະກອບຄຳຄິດຄຳເຫັນ ເພື່ອແກ້ໄຂບັນຫາທີ່ຍັງຄ້າຄ້າງ ໃນການຈັດຕັ້ງປະຕິບັດວຽກງານໃນຕໍ່ໜ້າ ເພື່ອເລັ່ງໃສ່ເຮັດໃຫ້ການຍົກຍ້າຍ ຈັດສັນປະຊາຊົນໃຫ້ສຳເລັດ ຕາມແຜນການທີ່ວາງໄວ້, ຮັບປະກັນທາງດ້ານ ທີ່ຢູ່ອາໃສ. ຈາກນັ້ນກໍ​ໄດ້ຜ່ານຂໍ້ຕົກລົງ ການກຳນົດລາຄາຫົວໜ່ວຍຊົດເຊີຍ ຜົນກະທົບຊັບສິນຂອງປະຊາຊົນ ໂຄງການກໍ່ສ້າງແລວ ສາຍສົ່ງໄຟຟ້າແຮງສູງ 500 ກິໂລໂວນ ຈາກເຂື່ອນໄຟຟ້ານ້ຳເທີນ 1 ແຂວງ ບໍລິຄຳໄຊ ຫາສະຖານີໄຟຟ້ານາບົງ ນະຄອນຫລວງວຽງຈັນ ສະເພາະ ສ່ວນຮັບຜິດຊອບຂອງແຂວງບໍລິຄຳໄຊ

LEAVE A REPLY

Please enter your comment!
Please enter your name here