ນາຍົກຕ້ອນຮັບລັດຖະມົນຕີປ້ອງກັນປະເທດລັດເຊຍ

0
13

ໃນຕອນແລງ ຂອງວັນທີ 22 ມັງກອນ 2017 ທີ່ສຳນັກງານນາຍົກລັດຖະມົນຕີ, ທ່ານ ທອງລຸນ ສີສຸລິດ ນາຍົກ ລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ພົນເອກ ເຊຣເກ ໂຊຍກູ ລັດຖະມົນຕີກະຊວງປ້ອງກັນປະເທດ ແຫ່ງສະຫະພັນລັດເຊຍ ພ້ອມດ້ວຍຄະນະ.

ໃນໂອກາດດັ່ງກ່າວ, ທ່ານນາຍົກລັດຖະມົນຕີ ແຫ່ງ ສປປ ລາວ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ຕໍ່ການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຂອງທ່ານລັດຖະມົນຕີກະຊວງປ້ອງກັນປະເທດ ແຫ່ງສະຫະພັນລັດເຊຍ ພ້ອມທັງ ຕີລາຄາສູງ ຕໍ່ການປະກອບສ່ວນເສີມສ້າງສາຍພົວພັນ ແລະ ການຮ່ວມມື ທີ່ເປັນມູນເຊື້ອມາແຕ່ດົນນານ ຂອງສອງປະເທດ ລາວ ແລະ ລັດເຊຍ ເວົ້າລວມ, ເວົ້າສະເພາະ ແມ່ນສອງກອງທັບ ຂອງ ສປປ ລາວ ແລະ ສະຫະພັນລັດເຊຍ ໃຫ້ນັບມື້ແໜ້ນແຟ້ນ ແລະ ເລິກເຊິ່ງກວ່າເກົ່າ. ໃນຂະນະດຽວກັນ ກໍ່ໄດ້ກ່າວຂອບໃຈ ຕໍ່ການສະໜັບສະໜູນ ແລະ ຊ່ວຍເຫຼືອ ອັນສະເໝີຕົ້ນສະເໝີປາຍ ຂອງລັດຖະບານ ແລະ ປະຊາຊົນລັດເຊຍ. ນອກນັ້ນ, ຍັງສະເໜີ ໃຫ້ຝ່າຍລັດເຊຍ ສືບຕໍ່ໃຫ້ການສະໜັບສະໜູນຊ່ວຍເຫຼືອ ແລະ ອຳນວຍຄວາມສະດວກ ແກ່ພາລະກິດປົກປັກຮັກສາ ແລະ ສ້າງສາພັດທະນາປະເທດ ອັນໄດ້ເຮັດໃຫ້ ສປປ ລາວ ສືບຕໍ່ມີຄວາມຈະເລີນກ້າວໜ້າໄປເລື້ອຍໆ. ໃນໂອກາດນີ້, ທ່ານນາຍົກລັດຖະມົນຕີ ຍັງໄດ້ຝາກຄວາມຢ້ຽມຢາມຖາມຂ່າວ ໄປຍັງທ່ານປະທານາທິບໍດີ ແລະ ນາຍົກລັດຖະມົນຕີ ແຫ່ງ ສະຫະພັນລັດເຊຍ ຕື່ມອີກ.

 

​ໃນໂອກາດດຽວກັນ, ທ່ານລັດຖະມົນຕີກະຊວງປ້ອງກັນປະເທດ ແຫ່ງ ສະຫະພັນລັດເຊຍ ກໍ່ໄດ້ສະແດງຄວາມຂອບໃຈ ຕໍ່ການຕ້ອນຮັບຢ່າງອົບອຸ່ນ ຂອງທ່ານນາຍົກລັດຖະມົນຕີ ແຫ່ງ ສປປ ລາວ ໃນຄັ້ງນີ້ ພ້ອມທັງ ຕີລາຄາສູງຕໍ່ສາຍພົວພັນ ແລະ ການຮ່ວມມືອັນດີງາມ ຂອງສະຫະພັນລັດເຊຍ ແລະ ສປປ ລາວ ທັງໃນອາດີດ ກໍ່ຄື ປະຈຸບັນ ແລະ ໃຫ້ຄຳໝັ້ນສັນຍາວ່າ ຈະສືບຕໍ່ໃຫ້ການສະໜັບສະໜູນ ແກ່ ສປປ ລາວ ໃນລະດັບຕ່າງໆ ຢ່າງສຸດຄວາມສາມາດ.​

ພາບແລະຂ່າວ: ຫ້ອງວ່າການສຳນັກງານນາຍົກລັດຖະມົນຕີ

LEAVE A REPLY

Please enter your comment!
Please enter your name here