ພູເບ້ຍ ມາຍນິງສະຫຼອງຄົບຮອບ 10 ປີ ການຜະລິດຄໍາ ບັນລຸ 1.352.252 ອອນ, ປະກອບລາຍຮັບ ໃຫ້ລັດຖະບານ ຈຳນວນ 623

0
23

ໃນຕອນຄໍ່າຂອງວັນທີ 15 ພຶດສະພາ 2018 ທີ່ໂຮງແຮມຄຣາວພລາຊາ, ບໍລິສັດ ພູເບ້ຍ ມາຍນິງໄດ້ຈັດງານສະເຫຼີມສະຫຼອງ ເນື່ອງໃນໂອກາດຄົບຮອບ 10 ປີ ການດໍາເນີນງານໂຮງງານ ຜະລິດທອງ-ຄໍາ ພູຄໍາ ໂດຍການເປັນກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ເຊິ່ງມີການນຳພັກ-ລັດ, ພະນັກງານຂັ້ນສູງ ຂອງລັດຖະບານ, ແຂກທັງພາຍໃນ ແລະ ຕ່າງປະເທດ, ບັນດາຄູ່ຮ່ວມມື, ລູກຄ້າ, ຄະນະອຳນວຍການ, ຄະນະນຳ ແລະ ພະນັກງານພາຍໃນບໍລິສັດດັ່ງກ່າວ ເຂົ້າຮ່ວມ.

ໃນພິທີ, ຄະນະອຳນວຍການ ໄດ້ລາຍງານໃຫ້ຊາບວ່າ: ໂຮງງານຜະລິດທອງ-ຄໍາ ພູຄໍາ ໄດ້ເປີດຢ່າງເປັນທາງການ ໃນວັນທີ 09 ພຶດສະພາ 2008. ໂຮງງານ ພູຄໍາ ແລະ ໂຮງງານບ້ານ ຫ້ວຍຊາຍ ຮ່ວມກັນທຳການຜະລິດໂລຫະທອງ 690.000 ກວ່າໂຕນ, ຜະລິດຄໍາ 1.352.252 ອອນ ແລະ ເງິນ 9.530.722 ອອນ. ມາຮອດປະຈຸບັນ, ໄດ້ປະກອບສ່ວນງົບປະມານ ໃຫ້ລັດຖະບານ ຈຳນວນ 623 ລ້ານໂດລາສະຫະລັດ. ບໍລິສັດ ພູເບ້ຍ ມາຍນິງ ໄດ້ລົງທຶນໃນຊັບສິນໂຮງງານຜະລິດ ແລະ ການສໍາຫຼວດຂຸດຄົ້ນ ປະມານ 1.4 ລ້ານໂດລາສະຫະລັດ.

ນອກຈາກນັ້ນ, ບໍລິສັດ ຍັງໄດ້ລົງທຶນ ໃສ່ໃນການສ້າງຖະໜົນຫົນທາງ ແລະ ການບໍາລຸງສ້ອມແປງເສັ້ນທາງຂົນສົ່ງ ແລະ ເສັ້ນທາງໃນບໍລິເວນໃກ້ຄຽງກັບເຂດດໍາເນີນງານຂອງບໍລິສັດ ມູນຄ່າກວ່າ 60 ລ້ານໂດລາສະຫະລັດ. ພ້ອມທັງ ໄດ້ປະກອບສ່ວນຢ່າງຫຼວງຫຼາຍ ໃນການພັດທະນາຊຸມຊົນທີ່ຢູ່ໃກ້ເຂດດໍາເນີນງານ.

ປະຈຸບັນ, ບໍລິສັດ ມີແຮງງານຄົນລາວກວ່າ 90% ຂອງກຳລັງແຮງງານທັງໝົດ ໂດຍຜ່ານການຈ້າງງານພາຍໃນ ແລະ ທ້ອງຖິ່ນ. ຊຶ່ງນັບແຕ່ປີ 2008 ເປັນຕົ້ນມາ, ບໍລິສັດ ໄດ້ປະກອບສ່ວນເຂົ້າໃນ 293 ໂຄງການພັດທະນາຊຸມຊົນ ທີ່ໄດ້ສຸມໃສ່ວຽກງານດ້ານການສຶກສາ, ສາທາລະນະສຸກ, ການພັດທະນາດ້ານກະສິກໍາ, ການພັດທະນາທຸລະກິດຂະໜາດນ້ອຍ, ການເງິນຈຸລະພາກ ແລະ ການສ້າງໂຄງລ່າງພື້ນຖານ ລວມເປັນມູນຄ່າປະມານ 4.3 ລ້ານໂດລາສະຫະລັດ.

ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ

LEAVE A REPLY

Please enter your comment!
Please enter your name here