ເມືອງຫາດຊາຍຟອງ ທຳລາຍສິນຄ້າໝົດອາຍຸ ແລະ ເກືອດຫ້າມ ມູນຄ່າຫຼາຍກວ່າ 33 ລ້ານກີບ

0
18

ຫ້ອງການອຸດສະຫະກຳ ແລະ ການຄ້າ ເມືອງຫາດຊາຍຟອງ ນະຄອນຫຼວງວຽງຈັນ  ໄດ້ຈັດພິທີທຳລາຍສິນຄ້າໝົດອາຍຸ ແລະ ສິນຄ້າເກືອດຫ້າມ ທີ່ສາມາດກວດຍຶດໄດ້ໃນປີ 2017 ຜ່ານມາ ຂຶ້ນໃນວັນທີ17 ພຶດສະພາຜ່ານມາ ເຂົ້າຮ່ວມເປັນປະທານໂດຍ ທ່ານ ເບີລີນ ເພັດຈັນທະລາດ ຫົວໜ້າພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ ພ້ອມດ້ວຍອຳນາດການປົກຄອງ  ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ສົມພູ ສີພູວົງ ໄດ້ກ່າວວ່າ: ໃນປີ 2017 ທີ່ຜ່ານມາ ທາງຫ້ອງການອຸດສາຫະກຳ ແລະ ການຄ້າ ເມືອງຫາດຊາຍຟອງ ໄດ້ສົມທົບກັບພາກສ່ວນທີ່ກ່ຽວຂ້ອງລົງຈັດສັນຄວາມເປັນລະບຽບຮຽບຮ້ອຍ ແລະ ການຂາຍເຄື່ອງຊະຊາຍທົ່ວເມືອງໄດ້ຈຳນວນ 25 ຄັ້ງ, ລົງກວດກາສິນຄ້າໝົດອາຍຸ, ສິນຄ້າທີ່ບໍ່ຕິດສະຫຼາກເປັນພາສາລາວ, ຢາສູບທີ່ບໍ່ຕິດຄຳເຕືອນ 75% ແລະ ສິນຄ້າປະເພດເກືອດຫ້າມຕ່າງໆໄດ້ 76 ຄັ້ງ ຈົນສາມາດຍຶດໄດ້ສິນຄ້າທັງໝົດ 23 ລາຍການ ລວມມູນຄ້າ 17.757.000 ກີບ ພ້ອມທັງເຮັດບົດບັນທຶກປັບໄໝ 1.500.000 ກີບ;

ໄດ້ສົມທົບກັບຫ້ອງການສາທາລະນະສຸກ ລົງກວດກາເຄື່ອງສຳອາງປະເພດຕ້ອງຫ້າມ 2 ຄັ້ງ ລວມມູນຄ້າ 5.465.000 ກີບ; ສົມທົບກັບຄະນະກຳມະການຄຸ້ມຄອງໄມ້ລົງກວດກາຈຳນວນ 4 ຫົວໜ່ວຍ ສາມາດປັບໄໝເປັນເງິນ 5.700.000 ກີບ. ພ້ອມທັງເຮັດບົດບັນທຶກ ສຶກສາອົບຮົບຕັກເຕືອນໃຫ້ແກ່ຫົວໜ່ວຍທຸລະກິດຕ່າງໆທີ່ຍັງບໍ່ປະຕິບັດຕາມລະບຽບກົດໝາຍ.


ສ່ວນສິນຄ້າຄ້າທີ່ກຽມຈະຖືກທຳລາຍມີ 3 ປະເພດດັ່ງນີ້: 1. ສິນຄ້າໝົດອາຍຸ ເຊິ່ງມີທັງໝົດ 17 ລາຍການຄື: ໝີ່ຫວຽດ, ໝາກເພັດບົດ, ໝາກຖົ່ວເຫຼືອງ, ນົມແອນມຳ, ນົມຄາເນຊັນ, ເຕົ້າຈ້ຽວ, ນ້ຳໝາກໄມ້, ໂຈກ, ໝີ່ໄວໆ, ເຂົ້າໜົມກອກຢາ, ເຂົ້າໜົມຈີນ, ນ້ຳພຽວ, ໝີ່ຍ່ຳໆ, ນົມໂຟໂມດ, ເຂົ້າໜົມທອດກອບ,ສະປາຍ ແລະ ນ້ຳສະຕິງ ລວມມູນຄ່າ 6.150.000 ກີບ; 2. ສິນຄ້າບໍ່ຕິດສະຫຼາກເປັນພາສາລາວມີ 2 ລາຍການຄື: ເຂົ້າໜົມຫວຽດ ແລະ ເຂົ້ານົມຊອກໂກແລັດ (ໂຕປາ, ຫຼຽນທອງ) ລວມມູນຄ່າ 1.946.000 ກີບ; 3. ສິນຄ້າເກືອດຫ້າມມີ 4 ລາຍການຄື: ຢາສູບທີ່ບໍ່ຕິດຄຳເຕືອນ 75%, ເຄື່ອງຄ້າຍຄືກຳລັງປະກອບອາວຸດ, ໝາກກະໂພກ, ແລະ ເຄື່ອງສຳອ່າງ ລວມມູນຄ່າ 9.661.000 ກີບ. ເຊິ່ງຄິດໄລ່ເປັນມູນຄ່າລວມຕົກເປັນ 17.757.000 ກີບ.


ນອກຈາກນີ້ ທາງກະຊວງອຸດສະຫະກຳ ແລະ ການຄ້າ ກໍ່ໄດ້ນຳເອົາສິນຄ້າທີ່ນຳເຂົ້າບໍ່ຖືກຕ້ອງ, ບໍ່ໄດ້ຮັບອະນຸຍາດຈາກພາກສ່ວນທີ່ກ່ຽວຂ້ອງມາທຳລາຍພ້ອມກັນ 1 ປະເພດຄື: ປະເພດຢາປົວພະຍາດ ມູນຄ່າລວມ 15.300.000 ກີບ. ລວມມູນຄ່າສິນຄ້າທີ່ຈະຖືກທຳລາຍທັງໝົດແມ່ນ 33.057.000 ກີບ.

ທ່ານ ສຸກສະຫວັນ ບຸດຕະວົງ ໄດ້ກ່າວຕື່ມວ່າ: ວຽກງານການກວດກາສິນຄ້າທີ່ໝົດອາຍຸ ແລະ ສິນຄ້າເກືອດຫ້າມ ຖືວ່າເປັນວຽກທີ່ສຳຄັນ ໂດຍສະເພາະໃນເຂດເມືອງຫາດຊາຍຟອງ ທີ່ມີຊາຍແດນຕິດກັບປະເທດເພື່ອນບ້ານ ຍິ່ງຕ້ອງເພີ່ມທະວີການກວດກາ ແລະ ສິ້ນຄ້າສ່ວນໃຫຍ່ທີ່ກວດໄດ້ກໍ່ພົບວ່າເປັນສິນຄ້າປະເພດອຸປະໂພກ-ບໍລິໂພກ ທີ່ປະຊາຊົນຊົມໃຊ້ ທີ່ສາມາດເປັນອັນຕະລາຍແກ່ຊີວິດ. ໂດຍສະເພາະໃນການກ່າວເຂົ້າສູ່ລະດູຝົນ ຍີ່ງເຮັດໃຫ້ການຂົນສົ່ງສິນຄ້າຜິດກົດໝາຍເຂົ້າມາງ່າຍຂຶ້ນ ໃນນທາງນ້ຳ, ສະນັ້ນ ທຸກພາກສ່ວນຈຶ່ງຕ້ອງຮ່ວມມືເປັນເຈົ້າການຮ່ວມກັນໃຫ້ຫຼາຍທີ່ສຸດ.

ແຫຼ່ງທີ່ມາຈາກໜັງສືພິມ ເສດຖະກິດ ການຄ້າ

LEAVE A REPLY

Please enter your comment!
Please enter your name here