ໄຊສະຖານ ດິນແດນແຫ່ງສາຍໝອກ

0
62

ເມືອງໄຊສະຖານ ໃນເມື່ອກ່ອນຖືວ່າເປັນເຂດທີ່ມີຄວາມທຸກຍາກທີ່ສຸດຂອງແຂວງໄຊຍະບູລີ ແລະ ມັກເອີ້ນກັນວ່າ “ເຂດສະແມດ-ສັນແຕ” ແລະ ຖ້າຈະເດີນທາງໄປເຂດນີ້ມັກເວົ້າກັນວ່າ “ໄປດອຍ” ຄືຊິຄຶດພາບອອກເນາະວ່າເປັນແນວໃດ! ດັ່ງນັ້ນ ເພື່ອເພີ່ມເງື່ອນໄຂໃຫ້ແກ່ການພັດທະນາ ເຂດດັ່ງກ່າວຈຶ່ງຖືກຍົກໃຫ້ເປັນ “ເມືອງໄຊສະຖານ” ເມືອງນ້ອງໃໝ່ຫຼ້າສຸດຂອງແຂວງ ໄຊຍະບຸລີ ນັບແຕ່ປີ 2009 ເປັນຕົ້ນມາ.


ເປັນເວລາຫຼາຍປີທີ່ຂ້າພະເຈົ້າໄດ້ຍິນເລື່ອງເລົ່າຕ່າງໆຂອງເມືອງແຫ່ງນີ້ຈາກພໍ່ຂອງຂ້າພະເຈົ້າ (ຊ. ຄຳມີ ເບ້ຍຈຳປາ), ນາຍຊ່າງສ້ອມແປງເຄື່ອງເອເລັກໂຕຣນິກທີ່ມີຊື່ສຽງປະຈຳ ເມືອງພຽງບ້ານເຮົາ ທີ່ໄດ້ເດີນທາງໄປຮັບໃຊ້ປະໍຊາຊົນຢູ່ເຂດນັ້ນນັບເທື່ອບໍ່ໄດ້.

ເມື່ອມີໂອກາດຂ້າພະເຈົ້າຈຶ່ງບໍ່ລັງເລເລີຍທີ່ຈະຍ່າງຕາມຮອຍຂອງພໍ່ໄປສູ່ດິນແດນແຫ່ງຄວາມກັນດານແຫ່ງນີ້. ມາເບິ່ງໄປພ້ອມກັນເລີຍວ່າຈະເປັນແນວໃດ! .


ການເດີນທາງເທື່ອທໍາອິດເລີ່ມຕົ້ນໃນກາງເດືອນມິຖຸນາ 2014 ໃນມື້ຝົນຕົກ ອອກຈາກ ເມືອງ ພຽງ ຜ່ານເທດສະບານແຂວງໄປທາງທິດເໜືອ ໄລຍະທາງປະມານ 95 ກມ ໂດຍໃຊ້ເວລາປະມານ 3 ຊົ່ວໂມງ (ລົດຈັກເດີ!). ເຖິງວ່າການເດີນທາງຈະລໍາບາກແຕ່ສອງຟາກທາງໄປຫາເທດສະບານເມືອງກໍເຕັມໄປດ້ວຍທິວທັດທໍາມະຊາດທີ່ສວຍສົດງົດງາມ ເຮັດໃຫ້ລືມຄວາມອິດເມື່ອຍໄປເລີຍ.

ເມືອງໄຊສະຖານ ຕັ້ງຢູ່ທິດຕາເວັນຕົກ ມີຊາຍແດນຕິດກັບເມືອງໄຊຍະບູລີ ເມືອງພຽງ ເມືອງຫົງສາ ແລະ ຣາຊະອານາຈັກໄທ ເປັນເຂດພູດອຍກວມເອົາ 100% ມີ 21 ບ້ານ ມີ 2.800 ຄອບຄົວ 173 ໜ່ວຍ ມີພົນລະເມືອງທັງໝົດ 15.200 ຄົນ ຍິງ 7.800 ຄົນ ແລະ ເປັນຄົນຊົນເຜົ່າໄປຣ ກວມເອົາ 99,4% ຂອງພົນລະເມືອງ ປະຊາຊົນສ່ວນໃຫຽ່ແມ່ນຍຶດຖືອາຊີບເຮັດໄຮ່ ປູກເຂົ້າ ຍັດໝ້ຽງ ແລະ ລ້ຽງສັດເປັນອາຊີບສຳຮອງ

ບົດແລະຮູບໂດຍ: Vonh Bcp

LEAVE A REPLY

Please enter your comment!
Please enter your name here