ວັນວິໄລ ຄວ້າທີ1 ນັກຮຽນເກັ່ງພາສາລາວ ຍ້ອນນຳຮອຍລຸ້ນເອື້ອຍ

0
30

ມື້ນີ້ພາມາຮູ້ຈັກກັບນ້ອງນັກຮຽນເກັ່ງລະດັບຊາດອີກຄົນໜຶ່ງ ທີ່ຫາກໍ່ເສັງຜ່ານໄປໃໝ່ໆໝາດໆໃນສົກຮຽນ 2017-2018 ນີ້ເອງ ຊຶ່ງຈັດຂຶ້ນລະຫວ່າງວັນທີ 24-27 ເມສາ 2018 ຜ່ານມາ ແລະນ້ອງກໍ່ຄວ້າໄດ້ອັນດັບ1 ໃນວິຊາພາສາລາວ-ວັນນະຄະດີ ນັ້ນກໍ່ຄື ນາງວັນວິໄລ ເພັດສະໄພວັນ.

ນາງ ວັນວິໄລ ເພັດສະໄພວັນ ຕອນນີ້ນ້ອງມີອາຍຸ 19 ປີ, ເປັນນັກຮຽນເກັ່ງຊັ້ນ ມໍໍ 7 ຈາກ ມສ. ໂພນໄຊ ຊຶ່ງເປັນຕົວແທນໃຫ້ແກ່ນັກຮຽນເກັ່ງຂອງແຂວງ ເຂົ້າຮ່ວມສອບເສັງນັກຮຽນເກັ່ງລະດັບຊາດໃນວິຊາພາສາລາວ-ວັນນະຄະດີ ແລະນ້ອງກໍ່ສາມາດຍາດໄດ້ອັນດັບທີ 1 ໄດ້ຮັບເງິນລາງວັນ 10 ລ້ານກີບມາໃຫ້ພໍ່ແມ່ໄດ້ພູມໃຈ ທີ່ສຳຄັນເປັນໃບໜ້າໃບຕາໃຫ້ແກ່ແຂວງຈຳປາສັກໃນປີນີ້.

 

ນາງ ວັນວິໄລ ເພັດສະໄພວັນ ກ່າວວ່າ: ກ່ອນຈະມາເປັນນັກຮຽນເກັ່ງໄດ້ຍ້ອນນ້ອງເອງມີຈິດໃຈມັກຮຽນວິຊາ ພາສາລາວ-ວັນນະຄະດີ ເປັນພິເສດ ມາແຕ່ໄລຍະຮຽນຢູ່ຊັ້ນປະຖົມ ຈາກນັ້ນນ້ອງກໍ່ໄດ້ແຮງຈູງໃຈຈາກຮຸ່ນເອື້ອຍຄົນໜຶ່ງ ທີ່ເມື່ອກ່ອນໄດ້ໄປຮ່ວມເສັງນັກຮຽນເກັ່ງລະດັບຊາດ ສາມາດຍາດໄດ້ອັນດັບ 3 ນ້ອງຈິ່ງກໍ່ເກີດມີແນວຄິດ, ມີຄວາມຫວັງຢາກເຮັດໄດ້ຄືເພິ່ນ ຈາກນັ້ນມານ້ອງຍິ່ງຕັ້ງໃຈສຶກສາຮ່ຳຮຽນໃຫ້ຫຼາຍຂຶ້ນກວ່າເກົ່າ ນັ້ນເປັນທີ່ມາກ່ອນໄດ້ອັນດັບໜຶ່ງໃນສາຍທີ່ຕົນຖະໜັດ.

 

ສໍາລັບວິທີການຄົ້ນຄວ້າຮໍໍ່າຮຽນກໍ່ຄ້າຍໆຄືກັບໝູ່ເພື່ອນຄື: ເວລາຮຽນໃນຫ້ອງກໍ່ຕັ້ງໃຈຟັງຄໍາຄູອະທິບາຍ, ຈົດກ່າຍ, ດຸໝັ່ນແກ້ບົດຝຶກຫັດ, ບໍ່ເຂົ້າໃຈກໍ່ຖາມ ແລະ ເວລານອກໂມງຮຽນກໍ່ຄົ້ນຄວ້າດ້ວຍຕົນເອງ ສະເພາະແມ່ນວິຊາພາສາລາວ-ວັນນະຄະດີ ແມ່ນຕ້ອງໄດ້ດຸໝັ່ນອ່ານປຶ້ມ, ໝັ່ນເລົ່າກ່ຽວກັບອັກຂະຫຼະວິທີ, ໝັ່ນແຕ່ງເລື່ອງ, ແຕ່ງກາບກອນ ຈິ່ງຈະເຮັດໃຫ້ມີຄວາມເຂົ້າໃຈ ສາມາດພັດທະນາຕົນເອງກ້າວຂຶ້ນເລື້ອຍໆ.

ນາງ ວັນວິໄລ ເພັດສະໄພວັນ ກ່່າວຕື່ມວ່າ: ຜົນສໍາເລັດໃນການສອບເສັງນັກຮຽນເກັ່ງຄັ້ງນີ້ ຖືເປັນຄວາມພາກພູມໃຈຢ່າງສູງ ທີ່ຕົນສາມາດນໍາເອົາຜົນສໍາເລັດອັນມີກຽດ ແລະ ຊື່ສຽງ ມາໃຫ້ຄອບຄົວ, ໂຮງຮຽນ ກໍ່ຄືແຂວງຈໍາປາສັກ ແລະ ຜົນສໍາເລັດດັ່ງກ່າວເກີດຂຶ້ນໄດ້ແມ່ນຍ້ອນຫຼາຍປັດໄຈຄື: ນອກຈາກຄວາມພະຍາຍາມໃນການຄົ້ນຄວ້າຮໍ່າຮຽນຂອງຕົນເອງແລ້ວ ກໍ່ຍັງມີຄູອາຈານ ແລະ ຄອບຄົວ ທີ່ໃຫ້ການຊ່ວຍເຫຼືອທຸກດ້ານເປັນຕົ້ນການສົ່ງຄວາມຮູ້, ການອົບຮົມບົ່ມສອນດ້ານຄຸນສົມບັດ, ດ້ານວັດຖຸຕ່າງໆທີ່ຈໍາເປັນໃຫ້ແກ່ການຮຽນ.

 

ໃນອະນາຄົດຕົນເອງກໍ່ຈະສືບຕໍ່ພັດທະນາດ້ານການສຶກສາຮໍ່າຮຽນໃຫ້ດີຂຶ້ນກວ່າເກົ່າ ເພື່ອກ້າວໄປເຖິງຈຸດໝາຍທີ່ຫວັງໄວ້ຄືຢາກສຶກສາຕໍ່ໃນລະດັບການສຶກສາ ວິຊາຊີບ ກ່ຽວກັບວິຊາ ແພດສາດ.

ສຳລັບ ໂຮງຮຽນ ມສ. ໂພນໄຊ ນອກຈາກນາງ ວັນວິໂລແລ້ວຍັງມີນັກຮຽນເກັ່ງທີ່ສາມາດສອບເສັງນັກຮຽນເກັ່ງຕິດອັນດັບຊາດຄື: ນາງ ລົດຈະນາ ອິນທະວົງ ອາຍຸ 16 ປີ, ມໍ4 ເສັງຕິດອັນດັບ2 ວິຊາ ພາສາລາວ-ວັນນະຄະດີ ປັດຈຸບັນຢູ່ບ້ານ ພັດທະນາ ຫ້ວຍຍາງຄໍາ, ນາງ ພອນທິບ ແສງສີສູນທອນ ອາຍຸ 15 ປີ, ມໍ4 ເສັງຕິດອັນດັບ3 ວິຊາ ຟິຊິກສາດ ປັດຈຸບັນຢູ່ບ້ານ ພັດທະນາ ຫ້ວຍປູນ.

*** ຂ່າວ-ພາບ: ຈັນທະວີສັກ ໜັງສືພິມຈໍາປາໃໝ່ ***

LEAVE A REPLY

Please enter your comment!
Please enter your name here