ລັດວິສາຫະກິດໄຟຟ້າລາວ ກັບ ການໄຟຟ້າຝ່າຍຜະລິດແຫ່ງປະເທດໄທ ເຈລະຈາການ ຊື້-ຂາຍ ພະລັງງານໄຟຟ້າສະບັບໃໝ່

0
16

ເມື່ອບໍ່ດົນມານີ້ທີ່ ສໍານັກງານໃຫຍ່ ລັດວິສາຫະກິດໄຟຟ້າລາວ ນະຄອນຫຼວງວຽງຈັນ  ໄດ້ມີກອງປະຊຸມປຶກສາຫາລືລະຫວ່າງ ລັດວິສາຫະກິດໄຟຟ້າລາວ (ຟຟລ) ກັບ ການໄຟຟ້າຝ່າຍຜະລິດແຫ່ງປະເທດໄທ (ກຟຜ) “ໂດຍການເປັນປະທານຮ່ວມຂອງ ທ່ານ ດວງສີ ພາຣະຍົກ ຮອງຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ແລະ ທ່ານ ພັດທະນາ ແສງສີໂຣດ ຮອງຜູ້ວ່າການນະໂຍບາຍ ແລະ ແຜນການ ມີພະນັກງານ ແລະ ວິຊາການທັງສອງຝ່າຍເຂົ້າຮ່ວມ.

ຈຸດປະສົງຂອງກອງປະຊຸມແມ່ນເພື່ອປຶກສາຫາລືການເຊື່ອມໂຍງລະບົບໄຟຟ້າລະບົບຕໍ່ລະບົບ (System to System) ໂດຍສະເພາະລະບົບສາຍສົ່ງໄຟຟ້າແຮງສູງ ຄວາມດັນ 115 ກິໂລໂວນ ຄື: ສາຍສົ່ງໄຟຟ້າແຮງສູງ 115 ກິໂລໂວນ ສິຣິທອນ-ບັງເຍາະ, ສາຍສົ່ງ 115 ກິໂລໂວນ ທ່າລີ່-ປາກລາຍ, ສາຍສົ່ງ 115 ກິໂລໂວນ ໂພນຕ້ອງ-ໜອງຄາຍ, ສາຍສົ່ງ 115 ກິໂລໂວນ ທ່ານາແລ້ງ-ໜອງຄາຍ, ສາຍສົ່ງ 115 ກິໂລໂວນ ປາກຊັນ-ບຶງການ, ສາຍສົ່ງ 115 ກິໂລໂວນ ທ່າແຂກ-ນະຄອນພະນົມ ແລະ ສາຍສົ່ງ 115 ກິໂລໂວນ ປາກບໍ່-ມຸກດາຫານ.

ນອກຈາກນັ້ນ ທັງສອງຝ່າຍກໍ່ໄດ້ເຈລະຈາການ ຊື້-ຂາຍ ພະລັງງານໄຟຟ້າຮ່ວມກັນສະບັບໃໝ່ ລະຫວ່າງ ລັດວິສາຫະກິດໄຟຟ້າລາວ ກັບ ການໄຟຟ້າຝ່າຍຜະລິດແຫ່ງປະເທດໄທ ແລະ ໃນຕອນທ້າຍຂອງກອງປະຊຸມສອງຝ່າຍກໍ່ໄດ້ເຫັນດີຮ່ວມກັນຫຼາຍບັນຫາ ເພື່ອເປັນການພັດທະນາດ້ານພະລັງງານຮ່ວມກັນໂດຍສະເພາະເພື່ອແລກປ່ຽນພະລັງງານໄຟຟ້າເຮັດໃຫ້ສອງປະເທດ ລາວ-ໄທ ມີໄຟຟ້າຊົມໃຊ້ຢ່າງໝັ້ນຄົງ ແລະ ທົ່ວເຖິງ.

ແຫຼ່ງທີ່ມາ:ລັດວິສາຫະກິດໄຟຟ້າລາວ EDL

LEAVE A REPLY

Please enter your comment!
Please enter your name here