ອຸດົມໄຊແຕ່ງຕັ້ງປະທານສານເຂດ2, ຜູ້ພິພາກສາສານປະຊາຊົນແຂວງ ແລະສານເຂດ1

0
31

ພິທີປະກາດແຕ່ງຕັ້ງປະທານສານປະຊາຊົນເຂດ2, ຜູ້ພິພາກສາສານປະຊາຊົນແຂວງ ແລະ ສານປະຊາຊົນເຂດ1 ແຂວງອຸດົມໄຊ ໄດ້ຈັດຂຶ້ນໃນວັນທີ 25 ພຶດສະພານີ້ ຢູ່ທີ່ຫ້ອງປະຊຸມສານປະຊາຊົນແຂວງ ໂດຍການເປັນກຽດເຂົ້າຮ່ວມ ຂອງທ່ານ ຄຳພາ ແສງດາລາ ຮອງປະທານສານປະຊາຊົນສຸງສຸດ, ທ່ານ ບຸນລອດ ອ່ອນພະຈັນ ຮອງເລຂາພັກແຂວງ ປະທານສະພາປະຊາຊົນແຂວງອຸດົມໄຊ.ມີ ພະແນກການ,ກົມກອງ ແລະ ອົງການຈັດຕັ້ງທີ່ກ່ຽວຂ້ອງ ພ້ອມດ້ວຍພະນັກງານວິຊາການພາຍໃນສານປະຊາຊົນແຂວງເຂົ້າຮ່ວມເປັນສັກຂີພິຍານ.

ພິທີ ທ່ານ ມໍຊົງ ປະທານສານປະຊາຊົນແຂວງ ໄດ້ຂຶ້ນລາຍງານສະພາບການເຄື່ອນໄຫວວຽກງານສານປະຊາຊົນພາຍໃນແຂວງໄລຍະ 1 ປີຜ່ານມາ. ຈາກນັ້ນ ທ່ານ ນາງ ປະພອນຈິດ ຮອງຫົວຫນ້າກົມຈັດຕັ້ງ ສານປະຊາຊົນສູງສຸດກໍໄດ້ຜ່ານ ມະຕິຕົກລົງຂອງສະພາແຫ່ງ ສປປລາວ ວ່າດ້ວຍການແຕ່ງຕັ້ງປະທານສານປະຊາຊົນເຂດII ໂດຍແຕ່ງຕັ້ງທ່ານ ຍີ່ລໍ່ ໂຊຕູ້ກີ ຮັກສາການປະທານສານປະຊາຊົນເຂດII ເປັນ ປະທານສານປະຊາຊົນເຂດII, ຜ່ານມະຕິຂອງຄະນະປະຈຳສະພາແຫ່ງຊາດວ່າດ້ວຍການແຕ່ງຕັ້ງຜູ້ພິພາກສາ ສານປະຊາຊົນເຂດI ໂດຍແຕ່ງຕັ້ງທ່ານ ມະນີວັນ ໄຊຍະແສງ ຜູ້ຊ່ວຍຜູ້ພິພາກສາ ເປັນຜູ້ພິພາກສາຊັ້ນ I ຂັ້ນIV ແລະ ທ່ານ ສົມພັນ ລໍວັນໄຊ ຜູ້ຊ່ວຍຜູ້ພິພາກສາ ເປັນຜູ້ພິພາກສາຊັ້ນI ຂັ້ນIV ປະຈຳຢູ່ສານປະຊາຊົນເຂດI ແຂວງອຸດົມໄຊ ແລະ ມະຕິຕົກລົງຂອງຄະນະປະຈຳສະພາແຫ່ງຊາດວ່າດ້ວຍການແຕ່ງຕັ້ງຜູ້ພິພາກສາສານປະຊາຊົນແຂວງອຸດົມໄຊ ໂດຍແຕ່ງຕັ້ງທ່ານ ຈັນຖາ ວັນດາວົງ ຜູ້ຊ່ວຍຜູ້ພິພາກສາ ເປັນຜູ້ພິພາກສາຊັ້ນI ຂັ້ນIV ປະຈຳຢູ່ສານປະຊາຊົນແຂວງອຸດົມໄຊ.

ໂອກາດດັ່ງກ່າວ ທ່ານ ຄຳພາ ແສງດາລາ ຮອງປະທານສານປະຊາຊົນສູງສຸດກໍໄດ້ເປັນກຽດປະດັບທະນູບ່າ ພ້ອມດ້ວຍຊຸດແບບໃຫ້ແກ່ຜູ້ທີ່ໄດ້ຮັບການແຕ່ງຕັ້ງຢ່າງສົມກຽດ. ພ້ອມທັງໄດ້ໂອ້ລົມ ເຊິ່ງກ່ອນອື່ນທ່ານ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ສານປະຊາຊົນແຂວງອຸດົມໄຊຍາດມາໄດ້ຕະຫລອດໄລຍະຜ່ານມາ ພ້ອມທັງໄດ້ເນັ້ນໃຫ້ສືບຕໍ່ຮັກສາມູນເຊື້ອຜົນງານ, ຖືເອົາວຽກງານການເມືອງແນວຄິດເປັນຫລັກໃນການສຶກສາອົບຮົມພະນັກງານໃຫ້ມີແນວຄິດຫນັກແຫນ້ນ, ມີຄວາມສາມັກຄີ, ເອົາໃຈໃສ່ສຶກສາຄົ້ນຄວ້າບັນດາເນື້ອໃນກົດຫມາຍແລະນິຕິກຳຕ່າງໆໃຫ້ເລິກເຊິ່ງເພື່ອແນໃສ່ເຮັດໃຫ້ການຈັດຕັ້ງປະຕິບັດວຽກງານມີປະສິດທິຜົນສູງ ໂດຍສະເພາະແມ່ນການຕັດສິນຄະໃຫ້ມີຄວາມຖຶກຕ້ອງ,ຊັດເຈນ,ໂປ່ງໃສ ແລະ ເປັນທຳ.

 

 

ຂ່າວ: ໄມພອນ

LEAVE A REPLY

Please enter your comment!
Please enter your name here