ນາງ ແຄັບ ແກ້ວຕາ ເບີ12 ຊະນະເລີດການປະກວດນາງສາວງາມ ບຸນເດືອນ 7 ຂອງເມືອງແກ່ນທ້າວ

0
122

ງານປະກວດນາງສາວງາມ ບຸນເດືອນ 7 (ບຸນພຣະເຫວດ) ປະຈໍາປີ ພສ 2561 ຂອງເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນຄໍ່າຄືນວັນທີ 24 ພຶດສະພາ 2018 ນີ້, ຢູ່ທີ່ເດີ່ນກິລາເມືອງ. ໂດຍການເປັນກຽດເຂົ້້າຮ່ວມຂອງທ່ານ ສີຄານ ແກ່ນມະນີ ຮອງເຈົ້າເມືອງໆແກ່ນທ້າວ, ມີຫົວໜ້າຫ້ອງການ, ສະມາຄົມຄອບຄົວການນໍາເມືອງ, ຄະນະກໍາມະການຈັດການປະກວດ, ປະຊາຊົນພາຍໃນເມືອງ ແລະ ຕ່າງເມືອງເຂົ້າຊົມຢ່າງຫຼາຍຫຼາຍ.

ທ່ານ ນາງ ຈັນທະສອນ ແສນພັນສິລິ ປະທານສະຫະພັນແມ່ຍິງເມືອງ, ຫົວໜ້າອະນຸກໍາມະການປະກວດ ແລະ ຈັດການສະແດງ ໄດ້ກ່າວລາຍງານວ່າ: ການປະກວດນາງສາວງາມຄັ້ງນີ້, ເພື່ອຄັດເລືອກເອົາຜູ້ທີ່ມີຮູບຮ່າງໜ້າຕາສວຍງາມປະກອບໄປດ້ວຍກິລິຍາມາລະຍາດ, ອ່ອນນ້ອມຖ່ອມໂຕ, ມີຄວາມສາມາດ ໃຫ້ສົມກັບວ່າເປັນຄຸນລັດສະຕີ ປະກອບໄປດ້ວຍເຮືອນ 3 ນໍ້າ 4 ຂອງແມ່ຍິງລາວ. ເຊິ່ງມີນາງສາວງາມທີ່ເປັນຕົວແທນມາຈາກບັນດາບ້ານເທດສະບານ, ກຸ່ມບ້ານ, ບໍລິເວນບ້ານໜອງ, ບໍລິເວນຫ້ວຍເລິກ-ວັງປາ, ໂຮງຮຽນມັດທະຍົມພາຍໃນເມືອງ, ຮ້ານເສີມສວຍ ແລະ ບໍລິສັດສົ່ງເຂົ້າປະກວດທັງໝົດ 21 ຄົນ.


ຈາກນັ້ນ, ທ່ານ ສີຄານ ແກ່ນມະນີ ຮອງເຈົ້າເມືອງໆແກ່ນທ້າວ ໄດ້ກ່າວເປີດງານຢ່າງເປັນທາງການ ເຊິ່ງໄດ້ກ່າວວ່າ: ໃນຄ່ຳຄືນທີ່ມີຄວາມໝາຍຄວາມສຳຄັນນີ້ ຄະນະພັກ, ອົງການປົກຄອງເມືອງ ກໍ່ຄື ການຈັດຕັ້ງທຸກພາກສ່ວນ ໄດ້ພ້ອມກັນຈັດງານປະກວດນາງສາວງາມບຸນເດືອນເຈັດ (ບຸນພຣະເຫວດ) ປະຈໍາປີ ພສ 2561 ເພື່ອເປັນການສະເຫຼີມສະຫຼອງການເປີດປີທ່ອງທ່ຽວລາວ 2018 ຕິດພັນກັບງານນະມັດສະການພຣະທາດທ້າວແກ່ນ-ພຣະທາດນາງແພງສີ, ປະເພນີບຸນເດືອນເຈັດ (ບຸນພຣະເຫວດ) ຂອງຊາວເມືອງແກ່ນທ້າວ.


ຜ່ານການປະກວດ ຊະນະເລີດອັນດັບທີ 1 ໄດ້ແກ່ ເບີ 12 ນາງ ແຄັບ ແກ້ວຕາ ບ້ານທ້າວແກ່ນສົ່ງເຂົ້າປະກວດ ໄດ້ຮັບເງິນລາງວັນ 2.500.000 ກີບ ພ້ອມດ້ວຍມົງກຸດ ແລະ ສາຍສະພາຍ, ຮອງຊະນະເລີດອັນດັບທີ 1 ໄດ້ແກ່ ເບີ 1 ນາງ ໜູນິກ ໄຊຍະລາດ ມສ ແກ່ນທ້າວສົ່ງເຂົ້າປະກວດ ໄດ້ຮັບເງິນລາງວັນ 2.000.000 ກີບ ພ້ອມດ້ວຍສາຍສະພາຍ, ຮອງຊະນະເລີດອັນດັບທີ 2 ເບີ 5 ນາງ ພອນສຸດາ ລາດວົງສາ ບ້ານເມືອງໝໍ ສົ່ງເຂົ້າປະກວດ ໄດ້ຮັບເງິນລາງວັນ 1.500.000 ກີບ ພ້ອມດ້ວຍສາຍສະພາຍ, ຮອງຊະນະເລີດອັນດັບທີ 3 ເບີ 19 ນາງ ບ໋ອບບີ້ ໄຊຍະລາດ ມສ ຫ້ວຍເລິກສົ່ງເຂົ້າປະກວດ ແລະ ຮອງຊະນະເລີດອັນດັບທີ 4 ເບີ 11 ນາງ ທິດສະນີ ພິພັດເສລີ ບໍລິສັດທີເອັນເຄ ຄອນຊາວເຕີ ຈໍາກັດ ສົ່ງເຂົ້າປະກວດ ໄດ້ຮັບເງິນລາງວັນຜູ້ລະ 700.000 ກີບ. ສ່ວນລາງວັນຂວັນໃຈມວນຊົນໄດ້ແກ່ ເບີ 12 ນາງ ແຄັບ ແກ້ວຕາ.

 

ແຫລ່ງທີ່ມາຈາກ

LEAVE A REPLY

Please enter your comment!
Please enter your name here