ເມືອງແກ່ນທ້າວ ແຂວງໄຊຍະບູລີ ເປີດປີທ່ອງທ່ຽວລາວ 2018 ຕິດພັນກັບບຸນນະມັດສະການພະທາດທ້າວແກ່ນ ພະທາດນາງແພງສີ ປະເພນີບຸນເດືອນ 7

0
82


ເມືອງແກ່ນທ້າວ ແຂວງໄຊຍະບູລີ ໄດ້ເປີດປີທ່ອງທ່ຽວລາວ 2018 ຕິດພັນກັບບຸນນະມັດສະການພະທາດທ້າວແກ່ນ ພະທາດນາງແພງສີ ປະເພນີບຸນເດືອນ 7 ປະຈໍາປີ ພສ 2561 ຂື້ນຢ່າງເປັນທາງການ ໃນຕອນເຊົ້າຂອງວັນທີ 26 ພຶດສະພາ 2018 ນີ້,ຢູ່ທີ່ເດີ່ນກິລາຂອງເມືອງ ໂດຍການເປັນກຽດເຂົ້າຮ່ວມຂອງທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ,ມີການນຳຈາກແຂວງ,ພະແນກການຂອງແຂວງ,ບັນດາເຈົ້າເມືອງ,ນາຍອຳເພີ ຂອງຣາຊະອານາຈັກໄທ ທີ່ມີຊາຍແດນຕິດຈອດກັບເມືອງແກ່ນທ້າວ,ບັນດານັກທຸລະກິດ,ພໍ່ຄ້າຊາວຂາຍ,ພໍ່ແມ່ປະຊາຊົນ ທັງພາຍໃນເມືອງ,ຕ່າງເມືອງ,ຕ່າງແຂວງ ແລະ ຕ່າງປະເທດ ເຂົ້າຮ່ວມຢ່າງຫຼວງຫຼາຍ.


ພິທີໄດ້ເລີ່ມຕົ້ນດ້ວຍຂະບວນແຫ່ຂອງກ້ອນກຳລັງຕ່າງໆ ເຂົ້າສູ່ສະໜາມກິລາເມືອງ ໂດຍເລີ່ມຈາກຂະບວນແຫ່ປ້າຍຄຳຂັວນຂອງເມືອງ,ກອງດຸລິຍາງ ນ້ອງນ້ອຍເຍົາວະຊົນ,ຂະບວນຖືທຸງຊາດ-ທຸງພັກ ຂອງສະມາຊິກຊາວໜຸ່ມປະຊາຊົນປະຕິວັດລາວ,ກ້ອນກຳລັງພະນັກງານ-ລັດຖະກອນ ກຳລັງປະກອບອາວຸດ,ຂະບວນແຫ່ພະເຫວດບ້ານທ້າວແກ່ນ,ຂະບວນແຫ່ບັ້ງໄຟບ້ານເມືອງໝໍ,ແຫ່ບຸນຊ່ວງເຮືອບ້ານຈອມແກ້ວ,ຂະບວນຂອງບ້ານນາບອນ-ຫ້ວຍຕໍ,ບ້ານພວນ-ຫາດແດງ,ບ້ານຈອມເພັດ-ເມືອງເກົ່າ,ກຸ່ມບ້ານນາຫິນ,ກຸ່ມບ້ານປາກແຄມ,ບໍລິເວນຫ້ວຍເລິກ,ບໍລິເວນບ້ານໜອງ,ກຸ່ມບ້ານດອນເມນ ແລະ ກຸ່ມບ້ານເວີນຄໍາ.

ຈາກນັ້ນໄດ້ຊົມການສະແດງສີລະປະວັນນະຄະດີຂອງນ້ອງນັກຮຽນຈາກໂຮງຮຽນ ມສ ແກ່ນທ້າວ ແລະ ມສ ເມືອງໝໍ ດ້ວຍບົດຟ້ອນຍິນດີຕ້ອນຮັບສູ່ປີທ່ອງທ່ຽວລາວ,ຟ້ອນມວຍລາຍລາວ ແລະ ຟ້ອນບຸນປະເພນີຂອງເມືອງແກ່ນທ້າວ.

ຈາກນັ້ນ ທ່ານອຳຄາ ລັດສະໝີ ຮອງເຈົ້າເມືອງແກ່ນທ້າວ ໄດ້ຂື້ນລາຍງານການກະກຽມເປີດປີທ່ອງທ່ຽວລາວ 2018 ເມືອງແກ່ນທ້າວ ແລະ ຮຽນເຊີນທ່ານ ສຳລານ ສຸວັນນະໂຊດ ເຈົ້າເມືອງແກ່ນທ້າວ ຂື້ນກ່າວເປີດປີທ່ອງທ່ຽວລາວ 2018 ຕິດພັນກັບບຸນນະມັດສະການພະທາດທ້າວແກ່ນ-ພະທາດນາງ ແພງສີ ປະເພນີບຸນເດືອນ 7 ປະຈໍາປີ ພສ 2561 ຂອງເມືອງແກ່ນທ້າວຢ່າງເປັນທາງການ ເຊິ່ງການຈັດງານດັ່ງກ່າວ,ເນື້ອແທ້ ແມ່ນການສືບຕໍ່ປົກປັກຮັກສາ ແລະ ເສີມຂະຫຍາຍວັດທະນະທຳ,ຮີດຄອງປະເພນີອັນດີງາມຂອງຊາດ,ຂອງທ້ອງຖິ່ນ ກໍ່ຄື ຮີດ 12 ຄອງ 14 ປະເພນີລາວ ເປັນການສືບທອດມູນເຊື້ອ ກໍ່ຄືການດຳລົງຊີວິດ ທີ່ເຕັມໄປດ້ວຍຄວາມອຸດົມສົມບູນຂອງປະຊາຊົນເມືອງແກ່ນທ້າວ ໃຫ້ຍືນຍົງໄປຊົ່ວລູກຊົ່ວຫຼານ,ທັງເປັນການສົ່ງເສີມການທ່ອງທ່ຽວ ດ້ານວັດທະນະທຳ ແລະ ທຳມະຊາດ.

ສະແດງເຖິງຄວາມດຸໝັ່ນແລະຄວາມສາມັກຄີຮັກແພງອັນເປັນປຶກແຜ່ນຂອງປະຊາຊົນເມືອງແກ່ນທ້າວນັ້ນເອງ.ເຊິ່ງບຸນປະເພນີເດືອນ 7 ເມືອງແກ່ນທ້າວ ຈະສືບຕໍ່ໄປຈົນຮອດວັນທີ 30 ພຶດສະພາ 2018.

 

ແຫຼ່ງທີ່ມາຈາກ: ຫ້ອງການ ຖະແຫຼງຂ່າວ ວັດທະນະທຳ ແລະ ທ່ອງທ່ຽວ ເມືອງແກ່ນທ້າວ

LEAVE A REPLY

Please enter your comment!
Please enter your name here