ປະທານປະເທດ ເນັ້ນແຂວງສະຫວັນນະເຂດ ເອົາໃຈໃສ່ ຕີຖອຍປະກົດການຫຍໍ້ທໍ້

0
315

ຂປລ.ໂອກາດເດີນທາງມາຢ້ຽມຢາມ ແລະ ເຮັດວຽກຢ່າງເປັນທາງການ ທີ່ແຂວງ ສະຫວັນ ນະເຂດ, ທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ ໄດ້ໃຫ້ກຽດພົບປະໂອ້ລົມ ຕໍ່ຄະນະພັກ -ອຳນາດການປົກຄອງແຂວງ ຂອງແຂວງ ໃນຕອນບ່າຍວັນທີ 24 ພຶດສະພາ 2018, ໂດຍໄດ້ເນັ້ນໜັກໃຫ້ແຂວງ ເອົາໃຈໃສ່ ສືບຕໍ່ເຮັດວຽກງານ ດ້ານການເມືອງ-ແນວຄິດ ໃຫ້ມີຄວາມໜັກແໜ້ນເຂັ້ມແຂງຂຶ້ນຕື່ມ ເພື່ອຕີຖອຍ ແລະ ແກ້ໄຂບັນຫາ ປະກົດການຫຍໍ້ທໍ້ຕ່າງໆ ທີ່ເກີດຂຶ້ນໃນສັງຄົມ ເພື່ອໃຫ້ສັງຄົມ ມີຄວາມສະຫງົບປອດໄພ ທີ່ຈະເປັນ ພື້ນຖານອັນໜັກແໜ້ນ ໃນການພັດ ທະນາເສດຖະກິດ-ສັງຄົມ ພ້ອມນັ້ນ, ກໍ່ໃຫ້ເອົາໃຈໃສ່ເຊື່ອມ ຊຶມ, ກຳແໜ້ນແນວທາງ ນະໂຍບາຍຂອງພັກ-ລັດວາງອອກ ເພື່ອນຳໄປຈັດຕັ້ງຜັນຂະຫຍາຍ ໃຫ້ເກີດ ຜົນສຳເລັດ.

ອີກບັນຫາສຳຄັນຕັດສິນກວ່າໝູ່ ໃນວຽກງານການພັດທະນາ ກໍຄື ລະດັບຄວາມຮັບຮູ້ ຂອງ ປະຊາຊົນ ທີ່ພວກເຮົາຈະຕ້ອງໄດ້ລົງເລິກ ໃຫ້ເຖິງຮາກຖານຈິດໃຈຂອງເຂົາເຈົ້າ ໂດຍນຳເອົາວຽກງານ ການເມືອງ-ແນວຄິດ ລົງເຊື່ອມຊຶມກຳແໜ້ນໃຫ້ເລິກເຊິ່ງ ຂຶ້ນຕື່ມອີກ ເພື່ອໃຫ້ປັບປ່ຽນທັດສະນະ ຄະຕິເຂົາເຈົ້າ ໃຫ້ເຂົ້າໃຈຕໍ່ກັບວຽກງານການ ພັດທະນາຢ່າງແທ້ຈິງ, ເຊິ່ງການຈະເຮັດໄດ້ນັ້ນ ກໍ່ຕ້ອງ ໄດ້ສືບຕໍ່ນຳເອົາຄວາມຮູ້, ການສຶກສາ, ນຳເອົາຄວາມກ້າວໜ້າ ຂອງວິທະຍາສາດໃຫ້ເຂົ້າເຖິງ ເຂົາເຈົ້າ ທັງນີ້ ກໍ່ເພື່ອເປັນການຍົກລະດັບຄວາມຮູ້ ແລະ ເພີ່ມຄວາມສາມາດ ໃຫ້ປະຊາຊົນ ທີ່ຈະກາຍເປັນກຳ ລັງແຮງສຳຄັນ ເຂົ້າໃນການຂະຫຍາຍກຳລັງການຜະລິດ ຂອງໃນປະເທດ ເພື່ອສ້າງປະເທດຊາດ ໃຫ້ຮັ່ງ ມີເຂັ້ມແຂງຂຶ້ນໄປເລື້ອຍໆ.

ຕໍ່ກັບວຽກງານການ ພັດທະນາເສດຖະກິດ ຕ້ອງແກ້ໄຂໃຫ້ໄດ້ບັນຫາສັງຄົມ ເປັນຕົ້ນ: ດ້ານການ ສຶກສາ, ສາທາ, ການແກ້ໄຂຄວາມທຸກຍາກ ແລະ ອື່ນໆ ທີ່ນອນໃນບູລະສິດສຳຄັນກວ່າໝູ່ ເປັນຄວາມຮຽກຮ້ອງ ຕ້ອງການ ອັນຈຳເປັນຮີບດ່ວນຂອງທ້ອງຖິ່ນນັ້ນໆ ໂດຍໃຫ້ແຂວງໃຫ້ເບິ່ງທ່າ ແຮງ ເພື່ອວາງແຜນ ແລະ ມີ ຈັດສັນງົບປະມານ ເຂົ້າໃສ່ຕາມຄວາມສາມາດຕົວຈິງຂອງຕົນ, ຊິ່ງເມື່ອ ລົງທຶນໄປແລ້ວ ຕ້ອງເຮັດໃຫ້ສັງຄົມດີ ຂຶ້ນກວ່າເກົ່າ.

​ປະທານປະເທດ ຢ້ຳຕື່ມ​ວ່າ: ພາຍຫລັງທີ່​ໄດ້ປະກາດສ້າງເປັນນະຄອນໄກສອນ ພົມວິຫານ ຢ່າງ ເປັນທາງການໃນ ວັນທີ 25 ພຶດສະພາ 2018 ນີ້, ຄະນະ​ພັກ-​ຄະນະ​ນຳແຂວງ ຕ້ອງສືບຕໍ່ມີ ການພັດທະນາແຂວງ ກໍຄື ນະຄອນໄກສອນ ພົມວິຫານ ໃຫ້ມີສິ່ງໃໝ່ເກີດຂຶ້ນ ອັນເປັນທີ່ບົ່ງບອກ ເຖິງຄວາມຮຸ່ງເຮືອງຈະເລີນສີວິໄລ ເພື່ອໃຫ້ເປັນສິ່ງດຶງດູດນັກທ່ອງທ່ຽວ ເຂົ້າມາທ່ຽວໃຫ້ຫລາຍຂຶ້ນ ໂດຍໃຫ້ອີງໃສ່ທ່າແຮງ ຄວາມສາມາດຕ່າງໆທີ່ມີພາຍໃນ. ພ້ອມກັນນີ້ ຕ້ອງໄດ້ສູ້ຊົນແກ້ໄຂ ສິ່ງທີ່ບໍ່ດີ ແລະ ສິ່ງຫຍໍ້ທໍ້ຕ່າງໆນຳອີກ, ​ແຕ່ໃນນີ້ແມ່ນໃຫ້ເລີ່ມຈາກ ການພັດທະນາຄົນໃຫ້ໄດ້ກ່ອນ ເພື່ອໃຫ້ ສົມກັບຊື່ວ່າ ສະຫວັນເມືອງຄົນ.

LEAVE A REPLY

Please enter your comment!
Please enter your name here