ບໍລິສັດ ສິລິມາຍນິງ ທຸ່ມງົບ 8ຕື້ກີບ ເຂົ້າພັດທະນາແກ້ງລິດ ເມືອງແອດ

0
10258

ຂປລ. ​ແຂວງ​ຫົວ​ພັນ ອະນຸຍາດ ​ໃຫ້​ບໍ​ລິ​ສັດ ສິລິມາຍນິງ ຈຳກັດ ເຊັນສັນຍາວ່າດ້ວຍການລົງພັດ ທະນາແຫລ່ງທ່ອງທ່ຽວ ແບບອະນຸລັກທຳມະຊາດ ຢູ່ແກ້ງລິດສາຍນໍ້າແອດ ​ເຊິ່ງປະກອບ​ມີ: ຖໍ້າກຸ້ງ, ວັງຖໍ້າຊ່ອງ, ຖໍ້າຟາວ, ຖໍ້ານາງ ແລະ ຖໍ້າຫລອດທ້ອງ ເມືອງແອດ. ທັງນີ້ ກໍເພື່ອເປັນການດຶງດູດເອົານັກທ່ອງທ່ຽວ ທັງພາຍໃນ ແລະ ຕ່າງປະເທດ ເຂົ້າມາຍັງແຂວງຫົວພັນ ​ໂດຍສະເພາະແມ່ນເມືອງແອດ ເຊິ່ງຈະນຳເອົາແຫລ່ງລາຍຮັບ ເຂົ້າມາສູ່ທ້ອງຖິ່ນ ກໍຄື ປະຊາຊົນທີ່ຢູ່ໃກ້ຄຽງ ຈະມີລາຍຮັບຈາກນັກທ່ອງທ່ຽວ ຄ່ອຍເຮັດໃຫ້ປະຊາຊົນຫລຸດພົ້ນ ອອກຈາກຄວາມທຸກຍາກເທື່ອລະກ້າວ.

ພິທິ​ເຊັນ​ສັນຍາດັ່ງກ່າວ ຈັດ​ຂຶ້ນ ​ໃນ​ວັນ​ທີ 25 ພຶດສະພາ 2018 ​ໂດຍ​ການ​ຮ່ວມ​ລົງ​ນາມລະ ຫວ່າງ ທ່ານ ພູວົງ ສີສົມຮັກ ກຳມະການພັກແຂວງ, ຫົວໜ້າພະແນກແຜນການ ແລະ ການລົງທຶນແຂວງ ​ແລະ ທ່ານ ບຸນແພງ ສຸກທອງແດງ ຕາງໜ້າບໍລິສັດ ສິລິມາຍນິງ ຈໍາກັດ ​ໂດຍ​ມີ​ອາຍຸ​ສຳປະທານ​ທັງ​ໝົດ 30 ປີ ໃນເນື້ອທີ່ສຳປະທານ 65,4 ເຮັກຕາ, ດ້ວຍທຶນທັງໝົດ 1.000.000 ໂດລາສະຫະລັດ, ທຶນຈົດທະບຽນ 500.000 ໂດລາສະຫະລັດ ​ເຊິ່ງ​ເປັນການລົງທຶນ ຂອງນັກລົງທຶນພາຍໃນປະເທດຂອງລາວເຮົາ 100%. ໂດຍເລັ່ງໃສ່ການບໍລິການຮ້ານອາຫານ, ຮັບແຂກທ່ອງທ່ຽວ, ບ້ານພັກ ແລະ ຫ້ອງປະຊຸມ.

​ໂຄງການ​ພັດທະນາ​ເຂດ​ດັ່ງກ່າວ ຈະໄດ້ແບ່ງອອກເປັນ 3 ໄລຍະຄື: ໄລຍະທີ 1 ເລີ່ມແຕ່ປີ 2018-2019, ໄລຍະທີ 2 ແຕ່ປີ 2019-2020 ແລະ ໄລຍະທີ 3 ແຕ່ປີ 2020-2021 ​ເຊິ່ງຈະປັບປຸງເສັ້ນທາງ ແຕ່ບ້ານພຽງຢາງ ເຖິງແຫລ່ງທ່ອງທ່ຽວແກ້ງລິດ, ສ້າງທາງຍ່າງລຽບແຄມນໍ້າ ແຕ່ແກ້ງລິດເຖິງຖໍ້າກຸ້ງ, ສ້າງຕູບ ຫລື ສາລາແຄມນໍ້າ, ສ້າງຈຸດຊົມວິວ, ສ້າງຂົວໄມ້ໄຜ່ ໄປຫາດອນກາງສອງຈຸດ.

ສ້າງຮ້ານອາຫານເຮືອແພ, ສ້າງສວນດອກໄມ້ກາງດອນ, ປູກຕົ້ນໄມ້ໃຫ້ໝາກ-ໃຫ້ດອກ, ສ້າງກົງພັດນໍ້າ-ຄົກນໍ້າຈຳລອງ, ສ້າງປ້າຍໂຄງການ, ສ້າງທາງລົດ ຈາກບ້ານ ນາພຽງ ໄປຫາຖໍ້າກຸ້ງ, ສ້າງ ແລະ ປັບປຸງທາງຍ່າງ, ສ້າງຂົ້ວອູ່ໄປຫາຖໍ້າກຸ້ງ, ສ້າງສະລິງ, ສ້າງເຮືອນພັກ ແລະ ຣີສອດ, ສ້າງ ​ແລະ ປັບປຸງເສັ້ນທາງຍ່າງ ຖໍ້າກຸ້ງເຖິງຖໍ້ານາງ, ສ້າງບ່ອນຈອດລົດ ແລະ ສ້າງຫ້ອງນໍ້າສາທາລະນະ.

LEAVE A REPLY

Please enter your comment!
Please enter your name here