“ຄວາມເປັນຈິງກ່ຽວກັບ ຈຸດຄົງຄ້າງເສັ້ນຊາຍແດນລາວ-ກຳປູເຈຍ” ຕອນເຫດການທີ່ເກີດຂື້ນຕາມບໍລິເວນຊາຍແດນ, ຄວາມພະຍາຍາມໃນການແກ້ໄຂຜ່ານທາງການທູດ ແລະ ກົນໄກປະສານງານຂອງສອງຝ່າຍ.

0
3121

ມື້ວານນີ້ລາວອັບເດດໄດ້ນໍາສະເໜີ ປຶ້ມປົກຂາວ “ຄວາມເປັນຈິງກ່ຽວກັບ ຈຸດຄົງຄ້າງເສັ້ນຊາຍແດນລາວ-ກຳປູເຈຍ”  ໄປແລ້ວ 2 ຕອນ. ມາໃນຕອນເຊົ້ານີ້ ທີມງານເຮົາຈະມານໍາສະເຫນີ ຕອນທີ4 ໃນພາກທີ2 “ເຫດການທີ່ເກີດຂຶ້ນຕາມບໍລິເວນຊາຍແດນ, ຄວາມພະຍາຍາມໃນການແກ້ໄຂຜ່ານທາງການທູດ ແລະ ກົນໄກປະສານງານຂອງສອງຝ່າຍ”.ເຊິ່ງມີເນື້ອໃນດັ່ງນີ້

4. ເຫດການທີ່ເກີດຂຶ້ນຕາມບໍລິເວນຊາຍແດນ, ຄວາມພະຍາຍາມໃນການແກ້ໄຂຜ່ານທາງການທູດ ແລະ ກົນໄກປະສານງານຂອງສອງຝ່າຍ.
ອີງຕາມຂໍ້ມູນຈາກເຈົ້າໜ້າທີ່ໆກ່ຽວຂ້ອງ, ບັນຫາຄວາມເຄັ່ງຕຶງໃນບໍລິເວນແກ້ງ ຕໍມໍຄອຍ-ຫ້ວຍຕະເງົາ ນີ້ແມ່ນສືບເນື່ອງມາຈາກການກໍ່ສ້າງເສັ້ນທາງ ໂດຍຝ່າຍກຳປູເຈຍ ຢູ່ບໍລິເວນຊາຍແດນທີ່ສອງຝ່າຍ ຍັງບໍ່ສຳເລັດການສຳຫຼວດພື້ນທີ່ຕົວຈິງເລິກເຂົ້າໄປໃນບໍລິເວນຄົງຄ້າງແກ້ງຕໍມໍຄອຍ-ຫ້ວຍຕະເງົາ.

ເລີ່ມແຕ່ເດືອນກຸມພາ 2017 ກອງທະຫານຊ່າງແສງ ກະຊວງປ້ອງກັນປະເທດ ກຳປູເຈຍ ໄດ້ກໍ່ສ້າງເສັ້ນທາງລຽບຕາມເຊກອງຫຍັບເຂົ້າໄປບໍລິເວນແກ້ງຕໍມໍຄອຍ-ຫ້ວຍຕະເງົາ ໂດຍມີການຈັດວາງກຳລັງ ໄປພ້ອມເປັນຈຸດໆ. ການກະທຳດັ່ງກ່າວເປັນການລະເມີດຕໍ່ການຕົກລົງຂອງສອງປະເທດ ທີ່ຫ້າມບໍ່ໃຫ້ມີ ການກໍ່ສ້າງ ຫຼື ບຸກເບີກຢູ່ບໍລິເວນຊາຍແດນທີ່ສອງຝ່າຍຍັງບໍ່ໄດ້ສຳຫຼວດຮ່ວມກັນ.

ຍ້ອນແນວນັ້ນ, ຝ່າຍລາວຈຶ່ງໄດ້ທັກທ້ວງ ເພື່ອໃຫ້ມີການແກ້ໄຂໂດຍສັນຕິວິທີ ແລະ ໄດ້ຂຽນໜັງສືເຖິງທາງການຝ່າຍກຳປູເຈຍ ແລະ ສະເໜີໃຫ້ຝ່າຍກຳປູເຈຍຢຸດຕິການກໍ່ສ້າງເສັ້ນທາງຫຼາຍຄັ້ງ ແລະ ໃນຫຼາຍລະດັບ, ທັງລະດັບທ້ອງ ຖິ່ນ ແລະ ລະດັບສູນກາງ.
ສ່ວນທ່ານນາຍົກລັດຖະມົນຕີ ສາທາລະນະລັດ ປະຊາທິປະໄຕ ປະຊາຊົນລາວ ກໍ່ໄດ້ຫາໂອກາດ ພົບປະກັບ ທ່ານນາຍົກລັດຖະມົນຕີ ຣາຊະອານາຈັກກຳປູເຈຍ ໃນວັນທີ 10 ພຶດສະພາ 2017 ເພື່ອປຶກ ສາຫາລືແກ້ໄຂ ໃນໂອກາດເດີນທາງເຂົ້າຮ່ວມກອງປະຊຸມເສດຖະກິດໂລກ (World Economic Forum) ທີ່ນະຄອນຫຼວງພະນົມເປັນ.

ໃນໂອກາດນີ້ ທ່ານນາຍົກລັດຖະມົນຕີ ຮຸນເຊນ ກໍ່ໄດ້ເປັນເອກະ ພາບໃຫ້ຢຸດເຊົາການກໍ່ສ້າງເສັ້ນທາງ ແລະ ໃຫ້ມີການລົງກວດກາພື້ນທີ່ຕົວຈິງຮ່ວມກັນຂອງຄະນະກຳມະ ການຊາຍແດນຮ່ວມ. ພາຍຫຼັງການພົບປະດັ່ງກ່າວ, ຝ່າຍກຳປູເຈຍ ຍັງສືບຕໍ່ກໍ່ສ້າງເສັ້ນທາງຈົນມາເຖິງບໍລິ ເວນຫ້ວຍອາໄລ ເຊິ່ງຢູ່ໃນບໍລິເວນແກ້ງຕໍມໍຄອຍ-ຫ້ວຍຕະເງົາ ທີ່ເປັນບໍລິເວນຄົງຄ້າງ ເຊິ່ງເປັນການລະ ເມີດຕໍ່ການຕົກລົງຂອງການນຳສອງປະເທດ.

ຕໍ່ສະພາບການດັ່ງກ່າວ ຝ່າຍລາວ ຈຶ່ງໄດ້ແຕ່ງຕັ້ງກອງທະຫານລາດຕະເວນຢູ່ບໍລິເວນຫ້ວຍອາໄລ ເພື່ອທັກທ້ວງ ແລະ ສະກັດກັ້ນບໍ່ໃຫ້ຝ້າຍກຳປູເຈຍ ສືບຕໍ່ບຸກເບີກ ເສັ້ນທາງພ້ອມທັງສະເໜີໃຫ້ຢຸດຕິການກໍ່ສ້າງດັ່ງກ່າວ.ຈາກນັ້ນ, ໃນລະຫວ່າງວັນທີ 05-06 ກໍລະກົດ 2017 ສອງຝ່າຍຈຶ່ງໄດ້ສົ່ງຄະນະກຳມະການຊາຍ ແດນຮ່ວມ ຂອງທັງສອງປະເທດລົງໄປກວດກາພື້ນທີ່ຕົວຈິງ ແຕ່ກໍບໍ່ສາມາດແກ້ໄຂໄດ້.

ໂດຍສືບເນື່ອງມາຈາກການເຄື່ອນໄຫວຂອງກຳລັງທະຫານເຄື່ອນທີ່ຂອງຝ່າຍລາວ ເພື່ອສະກັດກັ້ນ ບໍ່ໃຫ້ຝ່າຍກຳປູເຈຍສືບຕໍ່ບຸກເບີກເສັ້ນທາງ ຈຶ່ງເປັນສາຍເຫດໃຫ້ຝ່າຍກຳປູເຈຍ ກ່າວຫາວ່າ ຝ່າຍລາວລ່ວງ ລ້ຳອະທິປະໄຕຂອງກຳປູເຈຍ ແລະ ໄດ້ສົ່ງກຳລັງເຂົ້າມາປະຈຳເພີ່ມ ແລະ ເຮັດໃຫ້ເກີດມີສະພາບເຄັ່ງຕຶງ ຢູ່ບໍລິເວນນີ້.

ໃນວັນທີ 11 ສິງຫາ 2017, ຝ່າຍກຳປູເຈຍ ໂດຍແມ່ນນາຍົກລັດຖະມົນຕີ ຮຸນເຊນ ເອງໄດ້ປະ ກາດຜ່ານສື່ມວນຊົນ ແລະ ຜ່ານເຟສບຸກ (facebook) ຂອງຕົນ ຍື່ນຄຳຂາດໃຫ້ລັດຖະບານລາວຖອນ ກຳລັງທະຫານອອກຈາກອະທິປະໄຕກຳປູເຈຍ ພາຍໃນ 06 ວັນ (ວັນທີ 17 ສິງຫາ 2017) ຖ້າບໍ່ດັ່ງນັ້ນຈະດຳເນີນການທາງກຳລັງທະຫານ. ໃນວັນດຽວກັນ, ສື່ຕ່າງໆທັງພາຍໃນ ແລະ ສາກົນ ໄດ້ອອກຂ່າວ ສະແດງພາບກອງກຳລັງ ເພື່ອໄປຍັງຊາຍແດນທີ່ຕິດກັບລາວ ໂດຍອ້າງວ່າເພື່ອໄປຂັບໄລ່ທະຫານລາວ ອອກຈາກບໍລິເວນຫ້ວຍຕະເງົາ ທີ່ຝ່າຍກຳປູເຈຍປະກາດເອົາເອງວ່າເປັນອະທິປະໄຕຂອງກຳປູເຈຍ.

ກ່ອນໜ້ານັ້ນ, ໃນວັນທີ 07 ສິງຫາ 2017, ກະຊວງການຕ່າງປະເທດລາວກໍໄດ້ຮັບຈົດໝາຍຂອງ ນາຍົກລັດຖະມົນຕີ ຮຸນເຊນ ສະບັບລົງວັນທີ 02 ສິງຫາ 2017 ເຖິງ ພະນະທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຈາກສະຖານທູດກຳປູເຈຍ ປະຈຳລາວ ເພື່ອສະເໜີໃຫ້ຝ່າຍລາວ ຖອນກຳລັງທະຫານອອກຈາກບໍລິເວນຫ້ວຍອາໄລ ທີ່ອ້າງວ່າຢູ່ໃນອະທິ ປະໄຕຂອງກຳປູເຈຍ ຢ່າງບໍ່ມີເງື່ອນໄຂ ແລະ ສະເໜີໃຫ້ຝ່າຍລາວ ຮັບຂໍ້ສະເໜີຂອງຝ່າຍກຳປູເຈຍ ໃນ ການແກ້ໄຂ 04 ຈຸດ ທີ່ຕົກລົງກັນແລ້ວຄືນໃໝ່.

ມາເຖິງຕອນເຊົ້າຂອງວັນທີ 12 ສິງຫາ 2017 ນາຍົກ ລັດຖະມົນຕີກຳປູເຈຍ ໄດ້ເດີນທາງມານະຄອນຫຼວງວຽງຈັນ ເພື່ອພົບປະກັບນາຍົກລັດຖະມົນຕີລາວ ແລະ ຕອນເຊົ້າວັນນັ້ນເອງ ນາຍົກລັດຖະມົນຕີ ທອງລຸນ ສີສຸລິດ ໄດ້ພົບປະປຶກສາຫາລືຫາວິທີທາງອອກຮ່ວມ ກັບ ນາຍົກລັດຖະມົນຕີ ຮຸນເຊນເປັນການດ່ວນ ແລະ ໄດ້ເປັນເອກກະພາບກັນໃຫ້ສອງຝ່າຍ ຖອນກຳລັງ ທະຫານທັງໝົດຂອງຕົນ ອອກຈາກພື້ນທີ່ບໍລິເວນຫ້ວຍອາໄລໃຫ້ກັບໄປກົມກອງເດີມ; ມອບໃຫ້ກະຊວງ ການຕ່າງປະເທດ ກໍຄືຄະນະກຳມະການຊາຍແດນຂອງສອງຝ່າຍ ສືບຕໍ່ປຶກສາຫາລືເຈລະຈາແກ້ໄຂຮ່ວມກັນ; ສືບຕໍ່ສ້າງເງື່ອນໄຂໃຫ້ມີການປຶກສາຫາລືກັນເປັນປົກກະຕິໃນເມື່ອມີບັນຫາໃຫທີ່ເກີດຂຶ້ນ.

ພາຍຫຼັງຖະແຫຼ່ງການຂອງສອງນາຍົກລັດຖະມົນຕີ ຄັ້ງວັນທີ 12 ສິງຫາ 2017, ຍ້ອນຄວາມເຊື່ອ ໃຈໃນມິດຕະພາບຂອງສອງປະເທດ ກໍຄືການນຳຂອງກຳປູເຈຍ, ກຳລັງທະຫານຝ່າຍລາວ ຈຶ່ງໄດ້ຖອນ ອອກຈາກຫ້ວຍອາໄລ. ກົງກັນຂ້າມ, ຝ່າຍກຳປູເຈຍພຽງແຕ່ຖອນກຳລັງເສີມກັບຄືນ ແຕ່ກຳລັງທະຫານ ຊາຍແດນທີ່ເຄີຍປະຈຳໃນບໍລິເວນນີ້ບໍ່ໄດ້ຖອຍກັບ. ຍິ່ງໄປກວ່ານັ້ນ, ຍັງໄດ້ເຄື່ອນຍ້າຍເຂົ້າມາແທນທີ່ ທີ່ຕັ້ງ ຂອງທະຫານລາວ ແລະ ຊັກທຸງຊາດຂຶ້ນ ເພື່ອປະກາດຄວາມເປັນອະທິປະໄຕຂອງກຳປູເຈຍ ແລະ ໄດ້ມີ ການສະຫຼອງໄຊຊະນະໃນບໍລິເວນນີ້.

ວັນທີ 18 ສິງຫາ 2017 ພະນະທ່ານ ທອງລຸນ ສີສຸລິດ ນາຍົກລັດ ຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຈຶ່ງໄດ້ສົ່ງໜັງສືເຖິງນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍ ເພື່ອຢືນຢັນທັດສະນະຂອງຝ່າຍລາວກ່ຽວກັບການແກ້ໄຂບັນຫາດັ່ງກ່າວ ເຊິ່ງໃນນັ້ນ ທ່ານນາຍົກລັດຖະມົນຕີໄດ້ເນັ້ນຄືນຄຳຕົກລົງຂອງສອງຝ່າຍໃນຄັ້ງວັນທີ 12 ສິງຫາ 2017 ທີ່ຜ່ານມາ ແລະ ສະເໜີໃຫ້ ນາຍົກລັດຖະມົນຕີ ກຳປູເຈຍ ຈັດຕັ້ງປະຕິບັດຂໍ້ຕົກລົງຢ່າງເຂັ້ມງວດ ທັງນີ້ກໍເພື່ອພ້ອມກັນປົກປັກຮັກສາມູນເຊື້ອອັນດີງາມນີ້ໄວ້ໃຫ້ໄດ້ຢ່າງຍວນານ ດັ່ງມີເນື້ອໃນສຳຄັນຄື: “ບໍລິ ເວນດັ່ງກ່າວ ສອງຝ່າຍຍັງບໍ່ໄດ້ສຳຫຼວດ ແລະ ກຳນົດທິດເນັ່ງເສັ້ນຊາຍແດນຮ່ວມກັນເທື່ອ ຍ້ອນວ່າສອງຝ່າຍມີທັດສະນະແຕກຕ່າງກັນ ກ່ຽວກັບພື້ນຖານທີ່ເປັນບ່ອນອີງໃສ່ໃນການຂີດເສັ້ນຊາຍແດນ; ບໍລິເວນນີ້ ຈຶ່ງເປັນຈຸດຄົງຄ້າງຊາຍແດນລະຫວ່າງສອງປະເທດ ເຊິ່ງພວກເຮົາຕົກລົງເຫັນດີເປັນເອກະພາບກັນວ່າ ບໍລິເວນນີ້ເປັນເຂດຄົງຄ້າງມິດຕະພາບ ແລະ ຫ້າມບໍ່ໃຫ້ດຳເນີນກິດຈະການໃດໆຢູ່ບໍລິເວນນີ້, ໃຫ້ຮັກສາບໍລິເວນນີ້ໃຫ້ຢູ່ໃນສະພາບເດີມ ຈົນກວ່າທັງສອງຝ່າຍຈະກຳນົດເສັ້ນຊາຍແດນ ແລະ ປັກຫຼັກໝາຍຊາຍແດນສຳເລັດກ່ອນ”.

ເພື່ອລະງັບເຫດການທີ່ຈະບານປາຍ ແລະ ຜ່ອນຄາຍຄວາມເຄັ່ງຕຶງຕໍ່ບັນຫາດັ່ງກ່າວ, ໃນວັນທີ 01 ກັນຍາ 2017, ນາຍົກລັດຖະມົນຕີລາວ ແລະ ກຳປູເຈຍ ໄດ້ພົບປະກັນອີກຄັ້ງ ທີ່ນະຄອນຫຼວງພະນົມ ເປັນ ໂດຍໄດ້ຕົກລົງກັນ ດັ່ງນີ້:
– ເຫັນດີໃຫ້ກະຊວງກາຕ່າງປະເທດ ລາວ ແລະ ກຳປູເຈຍ ພົບປະກັນໃນເວລາອັນໄວ ເພື່ອປຶກສາ ຫາລືໃນລາຍລະອຽດກ່ຽວກັບວິທີການແກ້ໄຂບັນຫາ.
– ເຫັນດີໃຫ້ຄະນະກຳມະການຊາຍແດນຮ່ວມຂອງສອງຝ່າຍ ລົງສຳຫຼວດພື້ນທີ່ຕົວຈິງບໍລິເວນ 04 ຈຸດ ຮ່ວມກັນຕາມການສະເໜີຂອງຝ່າຍກຳປູເຈຍຄື: ບໍລິເວນຫຼັກໝາຍ 033, ບໍລິເວນເສັ້ນທາງເລກທີ 13/7 ລວງຍາວ 7,8 ກິໂລແມັດ, ບໍລິເວນເວີນຄາມ ແລະ ບໍລິເວນຫຼັກໝາຍ 032-032/6.
– ໃຫ້ຄະນະກຳມະການຊາຍແດນຮ່ວມ ລົງກວດກາພື້ນທີ່ຕົວຈິງ ບໍລິເວນແກ້ງຕໍມໍຄອຍ-ຫ້ວຍຕະເງົາ ເພື່ອກຳນົດທີ່ຕັ້ງຫຼັກໝາຍຊາຍແດນ ແລະ ພ້ອມກັນຕົກລົງປັກຫຼັກໝາຍໃນທັນທີ ເພື່ອກ້າວໄປສູ່ການ ປັກຫຼັກໝາຍຕໍ່ໆໄປໃຫ້ສຳເລັດ.
– ສອງນາຍົກລັດຖະມົນຕີເຫັນດີຂຽນຈົດໝາຍທາງການ ເຖິງປະທານາທິບໍດີຝຣັ່ງເສດ ເພື່ອສະເໜີ ໃຫ້ລັດຖະບານຝຣັ່ງເສດຊ່ວຍ ແລະ ສະໜອງເອກະສານອື່ນໆທີ່ກ່ຽວຂ້ອງ ເພື່ອນຳໃຊ້ເປັນຂໍ້ມູນ ແລະ ຫຼັກຖານໃນການແກ້ໄຂບັນຫາຊາຍແດນ ລະຫວ່າງສອງປະເທດ.
ທັງໝົດນັ້ນ ກໍຄືການພົບປະຕົກລົງກັນຂອງຜູ້ນຳລັດຖະບານ ລາວ ແລະ ກຳປູເຈຍ ເຊິ່ງກໍ່ໄດ້ມີການ ອອກຂ່າວແຈ້ງໃຫ້ປະຊາຊົນທັງສອງຊາດກໍຄືສາກົນໄດ້ຮັບຊາບ ເຖິງຄວາມພະຍາຍາມໃນການຫາທງາ ອອກໂດຍສັນຕິວິທີ.

ໂດຍປະຕິບັດຕາມຂໍ້ຕົກລົງຂອງສອງນາຍົກລັດຖະມົນຕີຂອງທັງສອງປະເທດ, ລັດຖະມົນຕີກະຊວງການຕ່າງປະເທດ ລາວ ແລະ ກຳປູເຈຍ ໄດ້ພົບປະ ແລະ ເຮັດວຽກຮ່ວມກັນ ຢູ່ນະຄອນຫຼວງພະນົມ ເປັນ ໃນວັນທີ 05 ກັນຍາ 2017 ໂດຍໄດ້ຕົກລົງກັນຮ່າງຈົດໝາຍຮ່ວມໃນນາມນາຍົກລັດຖະມົນຕີ ລາວ ແລະ ກຳປູເຈຍ ເຖິງປະທານາທິບໍດີຝຣັ່ງເສດ ເພື່ອສະເໜີໃຫ້ຝຣັ່ງເສດຊ່ວຍສະໜອງແຜນທີ່ ແລະ ເອກະສານທີ່ກ່ຽວຂ້ອງກັບການກຳນົດເສັ້ນຊາຍແດນລະຫວ່າງ ລາວ ແລະ ກຳປູເຈຍ; ມອບໃຫ້ຄະນະກຳມະ ການຊາຍແດນສອງຝ່າຍລົງກວດກາພື້ນທີ່ຕົວຈິງ ເພື່ອແກ້ໄຂຈຸດຄົງຄ້າງຊາຍແດນ 04 ຈຸດ ທີ່ຂຶ້ນກັບ ແຂວງຈໍາປາສັກ (ລາວ) ແລະ ແຂວງຊຽງແຕງ (ກຳປູເຈຍ) ແລະ ມອບໃຫ້ອະນຸກຳມະການເຕັກນິກ ຊາຍແດນສອງປະເທດລົງກວດກາພື້ນທີ່ຕົວຈິງຢູ່ບໍລິເວນຄົງຄ້າງແກ້ງຕໍມໍຄອຍ-ຫ້ວຍຕະເງົາ.

ໃນວັນທີ 13 ທັນວາ 2017, ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາຊທິປະໄຕ ປະຊາຊົນລາວ ໄດ້ສົ່ງຈົດໝາຍເຖິງລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງ ຣາຊະອານາຈັກ ກຳປູເຈຍ ເພື່ອສະເໜີໃຫ້ຊຸກຍູ້ຄະນະກຳມະການຊາຍແດນກຳປູເຈຍ ລົງກວດກາພື້ນທີ່ຕົວຈິງຮ່ວມກັບຝ່າຍລາວຢູ່ບໍລິເວນແກ້ງຕໍມໍຄອຍ-ຫ້ວຍຕະເງົາ ແລະ ບໍລິເວນຊາຍແດນ 04 ຈຸດ ແຕ່ວ່າຝ່າຍກຳປູເຈຍ ບໍ່ໄດ້ໃຫ້ຄວາມເອົາໃຈໃສ່ຕໍ່ຂໍ້ສະເໜີດັ່ງກ່າວ.

ຈາກການລົງໄປເບິ່ງພື້ນທີ່ຕົວຈິງ ແລະ ຕາມການສອບຖາມຂໍ້ມູນຈາກທະຫານຊາຍແດນ ໃຫ້ຮູ້ວ່າ ມາເຖິງປະຈຸບັນຝ່າຍກຳປູເຈຍນອກຈາກຈະບໍ່ປະຕິບັດຕາມຄຳຕົກລົງຂອງສອງນາຍົກລັດຖະມົນຕີແລ້ວ ຍັງໄດ້ດຳເນີນການເຄື່ອນໄຫວຢູ່ບໍລິເວນຄົງຄ້າງແກ້ງຕໍມໍຄອຍ-ຫ້ວຍຕະເງົາ ຢ່າງແຂງຂັນ ແລະ ຕໍ່ເນື່ອງ ອັນໄດ້ເຮັດໃຫ້ສະພາບຢູ່ຕາມບໍລິເວນດັ່ງກ່າວມີຄວາມເຄັ່ງຕຶງ. ໃນນັ້ນ, ຝ່າຍກຳປູເຈຍໄດ້ນຳໃຊ້ພາຫະນະ ຂົນສົ່ງເຄື່ອນຍ້າຍກຳລັງທະຫານ, ອາວຸດ ແລະ ສະບຽງອາຫານ ຢ່າງເປັນປະຈຳທັງທາງບົກ ແລະ ທາງນ້ຳ, ມີການເຄື່ອນຍ້າຍກຳລັງທະຫານເຂົ້າ-ອອກ ບໍລິເວນດັ່ງກ່າວເປັນຈຳນວນຫຼວງຫຼາຍ ແລະ ໄດ້ຈັດວາງກຳລັງທະຫານຢູ່ບໍລິເວນແກ້ງຕໍມໍຄອຍ-ຫ້ວຍຕະເງົາ; ຝ່າຍກຳປູເຈຍ ໄດ້ເຄື່ອນໄຫວລາດຕະ ເວນ, ຫ້າມບໍ່ໃຫ້ປະຊາຊົນລາວທຳມາຫາກິນຢູ່ຕາມລຳນ້ຳເຊກອງ, ຫ້າມບໍ່ໃຫ້ໄປເກັບຜົນຜະລິດ ແລະ ລ້ຽງສັດຢູ່ບໍລິເວນແກ້ງຕໍມໍຄອຍ-ຫ້ວຍຕະເງົາ, ຍິ່ງໄປກວ່ານັ້ນກຳປູເຈຍ ຍັງໄດ້ບຸກເບີກ ແລະ ທຳລາຍ ຮ່ອງຮອຍນາເຮື້ອ, ໄຮ່ເຮື້ອທີ່ເປັນຫຼັກຖານຢັ້ງຢືນເຖິງເຂດທຳມາຫາກິນຂອງປະຊາຊົນລາວຢູ່ບໍລິເວນດັ່ງ ກ່າວ;

ຝ່າຍກຳປູເຈຍ ໄດ້ນຳເອົາພາຫະນະກົນຈັກໜັກເຂົ້າໄປເຂດແກ້ງຕໍມໍຄອຍ-ຫ້ວຍຕະເງົາ ແລະ ໄດ້ບຸກເບີກພູມີປະເທດຕົວຈິງ ເພື່ອກໍ່ສ້າງເສັ້ນທາງແຕ່ຫ້ວຍອາໄລ ຫາ ແກ້ງກະໂຕນ, ແຕ່ຫ້ວຍອາໄລ ຫາ ທິດໃຕ້ຂອງຫ້ວຍຕະເງົາ ແລະ ຫາຍອດຫ້ວຍຕະເງົາ, ໄດ້ສ້າງຂົວຂ້າມນ້ຳຢູ່ບໍລິເວນດັ່ງກ່າວ ຈຳນວນ 05 ແຫ່ງ ແລະ ຝ່າຍກຳປູເຈຍ ໄດ້ໃຊ້ເຄື່ອງບິນບໍ່ມີຄົນຂັບ (Drone) ບິນເລິກເຂົ້າມາໃນດິນແດນລາວ ຢູ່ເຂດເມືອງສະໜາມໄຊ, ແຂວງອັດຕະປື ຫຼາຍຄັ້ງ.

ຕໍ່ກັບບັນຫາດັ່ງກ່າວນີ້, ໃນວັນທີ 14 ທັນວາ 2017, ກະຊວງການຕ່າງປະເທດ ແຫ່ງ ສາທາລະ ນະລັດ ປະຊາທິປະໄຕ ປະຊາຊົນລາວ ໄດ້ສົ່ງຈົດໝາຍເຖິງ ກະຊວງການຕ່າງປະເທດ ແລະ ຮ່ວມມືສາກົນ ແຫ່ງຣາຊະອານາຈັກ ກຳປູເຈຍ, ສະບັບເລກທີ 2959/ຫກ ເພື່ອປະທ້ວງໃຫ້ຝ້າຍກຳປູເຈຍ ຢຸດເຊົາການກໍ່ສ້າງກິດຈະການ ແລະ ການເຄື່ອນໄຫວຕ່າງໆຢູ່ບໍລິເວນນີ້.

ສະຫຼຸບລວມແລ້ວການບຸກເບີກເສັ້ນທາງໃກ້ກັບບໍລິເວນຊາຍແດນ ທີ່ສອງຝ່າຍຍັງບໍ່ສຳເລັດການສຳ ຫຼວດຮ່ວມກັນ ຈົນເລິກເຂົ້າໄປໃນບໍລິເວນຄົງຄ້າງແກ້ງຕໍມໍຄອຍ-ຫ້ວຍຕະເງົານັ້ນ ເປັນທີ່ເຂົ້າໃຈໄດ້ວ່າ ແມ່ນການລະເມີດບັນດາຂໍ້ຕົກລົງຂອງຄະນະກຳມະການຊາຍແດນຮ່ວມ ລາວ-ກຳປູເຈຍ ແລະ ກຳປູເຈຍ- ລາວ ເຊິ່ງຕາງໜ້າໃຫ້ແກ່ລັດຖະບານທັງສອງປະເທດ ເພື່ອແກ້ໄຂຈຸດຄົງຄ້າງດ້ວຍກັນ.

ຕໍ່ການຄື່ອນໄຫວ ດັ່ງກ່າວ, ອຳນາດການປົກຄອງຂອງ ສາທາລະນະລັດ ປະຊາທິປະໄຕ ປະຊາຊົນລາວ ກໍໄດ້ພະຍາຍາມ ຊອກຫາຊ່ອງທາງ ເພື່ອແກ້ໄຂສະຖານະການໃຫ້ຜ່ອນຄາຍລົງ, ແຕ່ຝ່າຍກຳປູເຈຍ ບໍ່ພຽງແຕ່ລະເມີດຂໍ້ຕົກ ລົງລະຫວ່າງສອງຝ່າຍ ດັ່ງທີ່ກຳນົດອອກໃນ 04 ຫຼັກການ ແລະ ບັນດາບົດບັນທຶກຮ່ວມຂອງສອງຄະນະ ກຳມະການຊາຍແດນ ແຕ່ຍັງໄດ້ເຄື່ອນກຳລັງເລິກເຂົ້າໄປໃນບໍລິເວນດັ່ງກ່າວ ໂດຍໃຊ້ກົນອຸບາຍຈົງໃຈ ຫຼອກລວງໃນການເຈລະຈາ ເພື່ອສ້າງທ່າດີໃຫ້ແກ່ຕົນເອງ ດັ່ງທີ່ຝ່າຍກຳປູເຈຍໄດ້ຂຽນໄວ້ໃນປື້ມປະຫວັດ ສາດສາຍພົວພັນລະຫວ່າງ ກຳປູເຈຍ-ລາວ ວ່າ: “ການເຈລະຈາເປັນພຽງການເຈລະຈາ, ແຕ່ການເຄື່ອນ ຍ້າຍທັບຂອງກຳປູເຈຍ ຢູ່ໃນເຂດແດນຂອງກຳປູເຈຍ ຈຳເປັນຕ້ອງມີການດຳເນີນໄປຕາມແຜນການ”.

LEAVE A REPLY

Please enter your comment!
Please enter your name here