ຊຽງຂວາງມີ 40 ຄົນເຂົ້າເສັງຈົບຊັ້ນ ມ4 ບຳລຸງປີນີ້

0
187

ປະເທດເຮົາໂດຍລວມແລ້ວຍັງມີປະຊາຊົນຈຳນວນໜຶ່ງທີ່ບໍ່ມີໂອກາດໄດ້ເຂົ້າສຶກສາຮ່ຳຮຽນ ຍ້ອນເຫດຜົນຫຼາຍຢ່າງຫຼັກໆກໍ່ແມ່ນຄວາມຂາດເຂີນຂອງສະພາບເສດຖະກິດຄອບຄົວ ແຕ່ລັດຖະບານກໍ່ສ້າງທຸກເງື່ອນໄຂເພື່ອຍົກລະດັບຄວາມຮູ້ພື້ນຖານຂອງພົນລະເມືອງໃຫ້ສູງຂຶ້ນ ເພື່ອສາມາດເຂົ້າສູ່ໂຮງຮຽນວິຊາຊີບ ແລະມີວຽກເຮັດງານທຳຕໍ່ໄປ.

ພະແນກສຶກສາທິການ ແລະ ກິລາ ແຂວງຊຽງຂວາງ ຈັດການສອບເສັງຈົບຊັ້ນ ມ.4 ລະບົບບໍາລຸງທົ່ວໄປ ປະຈໍາສົກ
ຮຽນ 2017-2018 ໃນວັນທີ 29 ພຶດສະພາ 2018 ນີ້ ທີ່ສູນການສຶກສານອກໂຮງຮຽນຂອງແຂວງ ພາຍໃຕ້ການເປັນປະທານຂອງທ່ານ ບົວລີ ພັນນາວົງ ຫົວໜ້າພະແນກສຶກສາທິການ ແລະ ກິລາ ແຂວງ, ເຂົ້າຮ່ວມມີທ່ານ ນີວັນ ຈັນທະລັງສີ ຫົວໜ້າຂະແໜງການສຶກສານອກໂຮງຮຽນພະແນກ (ສກຂ), ມີຄະນະຮັບຜິດຊອບການສອບເສັງ ແລະ ນ້ອງນັກສອບ 40 ກວ່າຄົນ.

ທ່ານ ນີວັນ ຈັນທະລັງສີ ໄດ້ລາຍງານໃຫ້ຮູ້ວ່າ: ສົກຮຽນ 2017-2018 ນີ້ ທົ່ວແຂວງມີນັກຮຽນສອບເສັງຈົບຊັ້ນ ມ.4 ລະບົບບໍາລຸງທົ່ວໄປທັງໝົດ 40 ຄົນ, ຍິງ 01 ຄົນ, ໃນນັ້ນ ໄດ້ແບ່ງອອກເປັນ 02 ຫ້ອງສອບເສັງ, ສໍາລັບວິຊາທີ່ນໍາມາສອບເສັງປະກອບມີ 06 ວິຊາຄື: ວິຊາ ພາສາລາວ-ວັນນະຄະດີ, ສຶກສາພົນລະເມືອງ, ວິທະຍາສາດທໍາມະຊາດ, ວິທະຍາສາດສັງຄົມ, ຄະນິດສາດ, ພາສາອັງກິດ, ແຕ່ລະວິຊາໃຊ້ເວລາສອບ 90 ນາທີ, ຍົກເວັ້ນວິຊາພາສາລາວ-ວັນນະຄະດີ ແລະ ຄະນິດສາດ ໃຊ້ເວລາສອບ 120 ນາທີ, ໂດຍຈະໃຊ້ເວລາສອບເສັງທັງໝົດ 3 ວັນຈິ່ງສໍາເລັດ.

ທ່ານ ນີວັນ ຈັນທະລັງສີ ຍັງໃຫ້ຮູ້ອີກວ່າ ການສອບເສັງຈົບຊັ້ນມ.4 ລະບົບບໍາລຸງທົ່ວໄປຢູ່ແຂວງຊຽງຂວາງປີນີ້ມີຄວາມສະດວກກວ່າປີຜ່ານມາ ເນື່ອງຈາກມີນັກສອບໜ້ອຍຄົນ ເປັນຕົ້ນການກະກຽມອຸປະກອນສອບເສັງ, ການຈັດກໍາມະການຍາມຫ້ອງສອບ ແລະ ການຈັດແບ່ງຫ້ອງສອບ, ແຕ່ທັ້ງນີ້ຍັງຕ້ອງໄດ້ເອົາໃຈໃສ່ທາງດ້ານການປະຕິບັດກົດລະບຽບການສອບເສັງໃຫ້ເຂັ້ມງວດ, ເພື່ອໃຫ້ຜົນການສອບເສັງອອກມາມີຄຸນນະພາບ, ທ່ານ ກ່າວຕື່ມອີກວ່າ ການສອບເສັງຈົບຊັ້ນ ມ.4 ລະບົບບໍາລຸງທົ່ວໄປໃນສົກນີ້ ວາງຄາດໝາຍຜົນການສອບຈະໃຫ້ບັນລຸ 100 ເປີເຊັນ ແລະ ຈະປະກາດຜົນໃນທ້າຍອາທິດນີ້.

ໂອກາດນີ້ ທ່ານ ບົວລີ ພັນນາວົງ ໄດ້ຮຽກຮ້ອງໃຫ້ຄະນະຮັບຜິດຊອບການສອບເສັງ ຈົ່ງເຮັດໜ້າທີ່ດ້ວຍຄວາມຮັບຜິດ ຊອບສູງ, ເຄັ່ງຄັດຕໍ່ເວລາ ແລະ ກົດລະບຽບການສອບເສັງ, ເພື່ອເຮັດໃຫ້ການສອບເສັງບັນລຸຕາມຈຸດປະສົງເປົ້າໝາຍ. ທ່ານ ຍັງໄດ້ເນັ້ນໃຫ້ຜູ້ອໍານວຍການໂຮງຮຽນ ແລະ ຂະແໜງການທີ່ກ່ຽວຂ້ອງ ພາຍຫຼັງທີ່ນັກຮຽນສອບເສັງຈົບຊັ້ນນີ້ແລ້ວ ຈົ່ງລະດົມໃຫ້ເຂົາເຈົ້າຜູ້ທີ່ຍັງບໍ່ມີວຽກເຮັດງານທໍາ ໄປສຶກສາຕໍ່ທີ່ໂຮງຮຽນເຕັກນິກວິຊາຊີບແບບປະສົມແຂວງ ເພື່ອຈະໄດ້ນໍາໃຊ້ຄວາມຮູ້ທີ່ໄດ້ຮຽນມາໄປປະກອບອາຊີບ ໃຫ້ມີຊີວິດທີ່ໝັ້ນຄົງ ແລະ ມີວຽກເຮັດງານທໍາ.

( ໂດຍ: ຄານສີສະຫັວນ ພົງພັກດີ )

LEAVE A REPLY

Please enter your comment!
Please enter your name here