ມາເປັນໝໍນວດ ໄດ້ພຽງ 3 ວັນ ກໍ່ໄດ້ກໍ່ເຫດເອົາໄມ້ຄ້ອນຕີຜູ້ເຖົ້າອາຍຸເກືອບ 90 ເພື່ອຍາດເອົາຄຳ

0
19101

ເຫດເກີດເມື່ອເວລາ 10 ໂມງຂອງວັນທີ 27 ພຶດສະພາຜ່ານມານີ້, ຢູ່ທີ່ບ້ານໄຊຍະພູມ ນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ມີເຫດປຸ້ນຊັບຂຶ້ນ ໂດຍຜູ້ກໍ່ເຫດເປັນຜູ້ຍິງອາຍຸ 50 ປີ ເຊິ່ງໄດ້ໃຊ້ໄມ້ຄ້ອນຍາວປະມານ 50 ຊັງຕີແມັດ, ຕີທີ່ຫົວຜູ້ເຖົ້າອາຍຸ 89 ປີ, ແລ້ວຍາດເອົາສາຍແຂນຄຳໃນແຂນຂອງແມ່ຖົ້າເອົາໄປຂາຍ ແລ້ວກໍ່ຫຼົບໜີແຕ່ໄປບໍ່ລອດ ພຽງ 3 ຊົ່ວໂມງເຈົ້າໜ້າທີ່ຕຳຫຼວດ ກໍ່ສາມາດຈັບໄດ້ທັນຄວັນ.


ຕາມການສືບສວນ-ສອບສວນຂອງເຈົ້າໜ້າທີ່ ປກສ ນະຄອນໄກສອນ ພົມວິຫານ ໄດ້ຊາບຊື່ຜູ້ກໍ່ເຫດວ່າ: ນາງຖິດຕະພອນ (ແຂກ) ອາຍຸ 50 ປີ, ຢູ່ບ້ານໜອງເດີ່ນ ນະຄອນໄກສອນ ພົມວິຫານ ແຂວງສະຫວັນນະເຂດ ທີ່ໄດ້ໃຊ້ໄມ້ຄ້ອນຍາວປະມານ 50 ຊັງຕີແມັດ, ຕີບໍລິເວນຂະໝັບເບື້ອງຊ້າຍຈຳນວນ 2 ບາດ, ແລ້ວຍາດເອົາສາຍແຂນຄຳ ຂອງຜູ້ເສຍຫາຍຄື: ແມ່ເຖົ້າວຽງຄຳ ອາຍຸ 89 ປີ, ຢູ່ບ້ານໄຊຍະພູມ ໜ່ວຍທີ 1 ນະຄອນໄກສອນ ພົມວິຫານ, ມີອາການບາດເຈັບທີ່ຂະໝັບເບື້ອງຊາຍ.
ຕາມການໃຫ້ຂໍ້ມູນເບື້ອງຕົ້ນໄດ້ໃຫ້ຊາບວ່າ: ນາງ ຖິດຕະພອນ (ແຂກ) ໄດ້ມາເປັນໝໍນວດໃຫ້ແມ່ເຖົ້າວຽງຄຳໄດ້ 2 ມື້ແລ້ວ, ຮອດມື້ທີ 3 ກໍ່ໄດ້ຈັງຫວະ ເພາະມື້ນັ້ນ ເປັນວັນອາທິດ, ລູກ-ຫຼານພາກັນໄປຫຼິ້ນ, ໄປຮົ້ວ-ໄປສວນ ເຮັດໃຫ້ແມ່ເຖົ້າຢູ່ເຮືອນຄົນດຽວ ນາງແຂກກໍ່ເລີຍຖືເອົາໂອກາດນັ້ນ ລົງມືກໍ່ເຫດ.


ພໍໄດ້ຄຳແລ້ວ, ນາງແຂກ ກໍ່ໄດ້ເອົາຄຳຈຳນວນ 44,4 ກຼາມ (ເກືອບ 3 ບາດ)ໄປຂາຍຢູ່ຕະຫຼາດສະຫວັນໄຊຊັ້ນ 2 (ຮ້ານຄຳແຫ່ງໜຶ່ງ) ໄດ້ເງິນໄປຈຳນວນ 45.000 ບາດ (ສະກຸນເງິນໄທ), ແລ້ວໜີໄປລີ້ຢູ່ເຮືອນໝູ່ (ຢູ່ບ້ານ ໜອງເດີ່ນ) ຈາກນັ້ນ, ເຈົ້າໜ້າທີ່ກໍ່ໄດ້ໄປກັກຕົວນາງແຂກໄດ້, ໃຊ້ເວລາພຽງ 3 ຊົ່ວໂມງ (ພາຍຫຼັງເກີດເຫດ). ໃນເງິນຈຳນວນດັ່ງກ່າວນີ້ ນາງແຂກໄດ້ເອົາໄປຈ່າຍແລ້ວສ່ວນໜຶ່ງ, ໃນນັ້ນໄດ້ຊື້ສາຍແອວນາກ 1 ເສັ້ນ, ປະຈຸບັນຍັງເງິນສົດ 8 ລ້ານກີບ ທີ່ຊຸກເຊື່ອງໄວ້ຢູ່ເຮືອນ. ຈາກນັ້ນ ເຈົ້າໜ້າທີ່ຕຳຫຼວດກໍ່ໄດ້ໄປສອບຖາມຮ້ານຄຳຮ້ານດັ່ງກ່າວ ກໍ່ໄດ້ໃຫ້ຮູ້ວ່າ: ນາງແຂກໄດ້ເອົາຄຳມາຂາຍໃຫ້ຮ້ານເຂົາແທ້ ແລະຕອນນີ້ ຄຳໄດ້ຕົ້ມເປັນກ້ອນແລ້ວ ແລະທາງຮ້ານກໍ່ບໍ່ຮູ້ວ່ານາງແຂກເອົາຄຳມາແຕ່ໃສ ກໍ່ເລີຍຊື້ໄວ້ຕາມປົກກະຕິ.
ສ່ວນແມ່ເຖົ້າວຽງຄຳປະຈຸບັນນີ້, ກຳລັງນອນປິ່ນປົວຢູ່ໂຮງໝໍແຂວງ ເພື່ອຈະໄດ້ໃຫ້ແພດໝໍເຊັກອາການຂອງເພິ່ນຕື່ມອີກວ່າ: ຈະມີອາການທາງສະໝອງຫຼືບໍ?

LEAVE A REPLY

Please enter your comment!
Please enter your name here