ທ່ານ ບຸນຍັງ ວໍລະຈິດ ລົງຢ້ຽມຢາມພໍ່ແມ່ປະຊາຊົນບ້ານຄຳປ່າແໜ ແລະ ບ້ານປ່າກ້ວຍ

0
3084
????????????????????????????????????

ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ປະທານປະເທດ ພ້ອມລັດຖະມົນຕີຈຳນວນໜຶ່ງ ໄດ້ລົງພົບປະ ແລະໂອ້ລົມກັບອຳນາດການປົກຄອງ ແລະພໍແມ່ປະຊາຊົນບ້ານຄຳປ່າແໜ ແລະບ້ານປ່າກ້ວຍ ເມືອງຈຳພອນ ແຂວງສະຫວັນນະເຂດ ໃນວັນທີ 25 ພຶດສະພາ 2018 ຊຶ່ງມີທ່ານ ສັນຕິພາບ ພົມວິຫານ ເຈົ້າແຂວງໆສະຫວັນນະເຂດ ເປັນເພື່ອນພາທາງ ແລະພະແນກການຂອງແຂວງອີກຈຳນວນໜຶ່ງ.

ໃນໂອກກາດລົງຢ້ຽມຢາມກັບປະຊາຊົນໃນຄັ້ງນີ້, ທ່ານ ບຸນຍັງ ວໍລະຈິດ ກໍ່ໄດ້ຖືກຕ້ອນຮັບຢ່າງອົບອຸ່ນຈາກອຳນາດການປົກຄອງທ້ອງຖິ່ນ ແລະພໍ່ແມ່ປະຊາຊົນບ້ານຄຳປ່າແໜ ແລະບ້ານປ່າກ້ວຍ ຊຶ່ງທັງສອງບ້ານດັ່ງກ່າວນັບວ່າເປັນບ້ານທີ່ທຸກຍາກຂາດເຂີນຂອງເມືອງຈຳພອນ ມີຈຳນວນຄອບຄົວທັງໝົດ 261 ຄອບຄົວ, ມີພົນລະເມືອງ 1.528 ຄົນ, ໃນນັ້ນ ມີຄອບຄົວເປົ້າໝາຍທຸກຍາກ 77 ຄອບຄົວ ແລະນອກເປົ້າໝາຍ 34 ຄອບຄົວ, ລວມເປັນ 111 ຄອບຄົວ ທີ່ທ່ານ ເກຍ ອູ໊ສິດທິເດດ ເຈົ້າຂອງໂຮງງານນ້ຳດື່ມ-ນ້ຳກ້ອນໂລມາຄຳ ໃຫ້ການຊ່ວຍເຫຼືອ ຊຶ່ງເປັນຊົນເຜົ່າກະຕາງ, ບໍລິເວນເຂດບ້ານແມ່ນເປັນດິນປ່າໂຄກ, ດິນຊາຍ, ແຫ້ງແລ້ງ, ຂາດແຫລ່ງນໍ້າ, ຊີວິດການເປັນຢູ່ຂອງປະຊາຊົນສ່ວນຫລາຍ ເຮັດນາປູກເຂົ້າ ແຕ່ບໍ່ກຸ້ມກິນການດຳລົງຊີວິດແມ່ນຫາເຊົ້າກິນຄໍ່າ, ອາໄສການໄປຂໍທານລ້ຽງຊີບເປັນຫລັກ ແຕ່ຍ້ອນໄດ້ຮັບການຊີ້ນຳ ແລະຊຸກຍູ້ຈາກອຳນາດການປົກຄອງແຕ່ລະຂັ້ນ.

ອັນສຳຄັນນັບແຕ່ທ້າຍປີ 2015 ເປັນຕົ້ນມາ, ໄດ້ມີທ່ານ ເກຍ ອູ໊ສິດທິເດດ ເຈົ້າຂອງໂຮງງານຜະລິດນໍ້າດື່ມ-ນໍ້າກ້ອນປາໂລມາຄຳ ກໍ່ໄດ້ຕັດສິນໃຈບິແບ່ງຊັບສ່ວນຕົວ ພ້ອມແຮງກາຍແຮງໃຈ ລົງນຳພາປະຊາຊົນທຳການຜະລິດ ກໍ່ຄືການດຳລົງຊີວິດ ເຊິ່ງທາງເລືອກກໍ່ແມ່ນໃຫ້ເຂົາເຈົ້າ ໄດ້ມີທາງເລືອກທີ່ດີ ແລະຖອຍຫ່າງຈາກການໄປຂໍທານ ແລະຫັນມາດຳລົງຊີວິດໃໝ່ ໄດ້ກຸ້ມຢູ່ກຸ້ມກິນແບບຍືນຍົງ ຊຶ່ງມາຮອດປະຈຸບັນໄດ້ໃຊເງິນສ່ວນຕົວຊຸກຍູ້ສົ່ງເສີມປະກອບໃຫ້ປະຊາຊົນບ້ານທຸກຍາກໃນເປົ້າໝາຍເປັນເງິນ 12.728 ລ້ານກີບ ຈາກນັ້ນ ກໍ່ຍັງໄດ້ຮັບການປະກອບສ່ວນຊ່ວຍເຫລືອຂອງອົງການຈັດຕັ້ງພັກ-ລັດແລະທົ່ວສັງຄົມທັງພາຍໃນ ແລະຕ່າງປະເທດ ຈຳນວນ 2,6 ຕື້ກວ່າກີບ ໂດຍທຳການສ້າງໂຮງໝໍນ້ອຍ ພ້ອມອຸປະກອນການແພດ, ສ້າງໂຮງຮຽນ ພ້ອມອຸປະກອນຮັບໃຊ້, ເງິນກອງທຶນປະກັນສຸຂະພາບ, ສ້າງໂຮງຮຽນອະນູບານ ພ້ອມ ອຸປະກອນຮັບໃຊ້, ສ້າງນໍ້າປະປາບາດານ, ຈັດຊື້ເຄື່ອງນຸ່ງຫົ່ມ, ອຸປະກອນຮັບໃຊ້, ແນວພັນພືດ, ແນວພັນສັດ ແລະລົດໄຖນາເດີນຕາມຈຳນວນ 03 ຄັນ. ຈາກການຊຸກຍູ້ຊ່ວຍເຫລືອ ອັນໄດ້ເຮັດໃຫ້ປະຊາຊົນທັງສອງບ້ານ ໄດ້ຢຸດຕິການໄປຂໍທານແລ້ວ ອັນເປັນສ່ວນສຳຄັນທີ່ເຮັດໃຫ້ການລຶບລ້າງຄວາມທຸກຍາກຂອງປະຊາຊົນບ້ານຄຳປ່າແໜ ແລະບ້ານປ່າກ້ວຍໄດ້ໂດຍພື້ນຖານ.

ໂອການດັ່ງກ່າວນີ້, ທ່ານປະທານປະເທດ ກໍ່ໄດ້ໃຫ້ກຽດໂອ້ລົມ ຊຶ່ງທ່ານສະແດງຄວາມຍ້ອງຍໍຊົມເຊີຍ ຕໍ່ກັບອຳນາດການປົກຄອງ ແລະພໍ່ແມ່ປະຊາຊົນບ້ານຄຳປ່າແໜ ແລະບ້ານປ່າກ້ວຍ ທີ່ໄດ້ພ້ອມກັນຕັດສິນໃຈປະລະອາຊີບຂອງຕົນທີ່ເຄີຍທຳມາກ່ອນນັ້ນ ໂດຍຫັນມາທຳການຜະລິດຫາລ້ຽງຊີບດ້ວຍກຳລັງແຮງຂອງຕົນທຳການປູກການລ້ຽງ ເລີ່ມມີກິນມີຢູ່ ແຕ່ກໍ່ມີອີກຢ່າງກໍ່ສະແດງຄວາມຍ້ອງຍໍຊົມເຊີຍມາຍັງເຈົ້າຂອງໂຮງງານຜະລິດນໍ້າດື່ມ-ນໍ້າກ້ອນປາໂລມາຄຳ ທີ່ໄດ້ໃຫ້ການສະໜັບສະໜູນຫລັກພັດທະນາຊີວິດການເປັນຢູ່ຂອງປະຊາຊົນບ້ານຄຳປ່າແໜ ແລະບ້ານປ່າກ້ວຍ ໃຫ້ມີໃບໜ້າໃໝ່ເຊັ່ນວ່າ: ມີເຮືອນຢູ່, ມີເນື້ອທີ່ນາທຳການຜະລິດ, ມີພືດໃນສວນຄົວ, ມີໜອງສະລ້ຽງປາ, ມີສັດລ້ຽງ, ລູກໆຫລານໄດ້ເຂົ້າເຖິງການສຶກສາ ແລະບໍລິການສາທາລະນະສຸກ, ມີກອງທຶນປະກັນສັງຄົມ ແລະອື່ນ..

ຈາກນີ້, ທ່ານປະທານປະເທດ ໄດ້ເນັ້ນໃຫ້ອຳນາດການປົກຄອງ ແລະພໍ່ແມ່ປະຊາຊົນ ເພີ່ມຄວາມຫ້າວຫັນຂຶ້ນຕື່ມ ເປັນຕົ້ນກໍ່ແມ່ນການຜະລິດຫາລ້ຽງຊີບພາຍໃນຄອບຄົວ ແຕ່ສິ່ງທີ່ປະບໍ່ໄດ້ກໍ່ແມ່ນຢາກໃຫ້ມີຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະກັນ, ບຸກບືນຢ່າງໜັກແໜ້ນຈະພາກັນແກ້ໄຂຄວາມລ້າຫລັງ, ສ້າງຊີວິດໃໝ່ ທີ່ອີ່ມໜຳສຳລານ,ໃນເມື່ອມີຊີວິດດີຂຶ້ນຄືຈັ່ງຊີ້ແລ້ວ, ພໍ່ແມ່ປະຊາຊົນກໍ່ຄວນຫັນມາເພີ່ມຄວາມຮູ້ຄວາມສາມາດໃຫ້ກັບຕົນເອງຕື່ມອີກ ໂດຍມາຮຽນຮູ້ເລື່ອງເຕັກນິກຂອງການຜະລິດກະສິກຳ ເພື່ອກ້າວໄປສູ່ການສ້າງຄອບຄົວຕົວແບບທີ່ມີການພັດທະນາ ແລະຈັດສັນທີ່ດີ ໃນເບື້ອງລັດກໍ່ຄວນພະຍາຍາມຍູ້ການຜະລິດຂອງປະຊາຊົນ ເຮັດໃຫ້ປະຊາຊົນມີກິນມີຢູ່ແລ້ວກໍ່ອອກຂາຍ ເຮັດໃຫ້ມີລາຍໄດ້ ສະນັ້ນ ຄວາມຫວັງຂອງພັກ-ລັດ ແມ່ນຢາກໃຫ້ປະຊາຊົນຫລຸດພົ້ນອອກຈາກຄວາມທຸກຍາກ ອຳນາດການປົກຄອງແຕ່ລະຂັ້ນ ກໍ່ຄວນສົ່ງເສີມ ເຮັດແນວໃດກໍ່ຢາກໃຫ້ແກ້ໄດ້ຄວາມທຸກຍາກກ້າວໄປເຖິງຄວາມອີ່ໜໍາສຳລານຮັ່ງມີເປັນດີ.

LEAVE A REPLY

Please enter your comment!
Please enter your name here