ບົດຟ້ອນ ໝູ່ຍິງ-ຊາຍ ມສ ແວ່ນ ຄວ້າຊະນະເລີດ ສິລະປະ-ວັນນະຄະດີ ນັກຮຽນຊັ້ນປະຖົມ-ມັດທະຍົມ ທົ່ວເມືອງຊໍາເໜືອ

0
1240


ງານແຂ່ງຂັນ ສິລະປະ-ວັນນະຄະດີ ນັກຮຽນຊັ້ນປະຖົມ ແລະ ມັດທະຍົມສຶກສາ ສົກ ຮຽນ 2017-2018 ທົ່ວເມືອງຊຳເໜືອ ໄດ້ເປີດຂຶ້ນຢ່າງເປັນທາງການໃນຕອນເຊົ້າ ວັນທີ 28 ພຶດສະພາ 2018 ນີ້ຢູ່ທີ່ ຫໍວັດທະນາທຳແຂວງຫົວພັນ ໂດຍພາຍໃຕ້ການເປັນປະທານຂອງ ທ່ານ ກິໂກໂນວັນ ບຸນສົງຄາມ ຮອງເຈົ້າເມືອງຊຳເໜືອ ຜູ້ຊີ້ນຳຂົງເຂດວັດທະນາທຳ, ສັງຄົມຂັ້ນເມືອງ, ເປັນກຽດເຂົ້າຮ່ວມຂອງ ທ່ານ ຈັນພອນ ແກ້ວດວງຄຳ ຮອງຫົວໜ້າຫ້ອງການສຶກສາທິການແລະ ກິລາເມືອງຊຳເໜືອ, ມີຜູ້ອຳ ນວຍການ, ຄະນະກຳມະການ, ຄູນຳພາ ແລະ ນັກສິລະປະ ມາຈາກໂຮງຮຽນປະຖົມ ແລະ ມັດທະຍົມສຶກສາ ທົ່ວເມືອງເຂົ້າຮ່ວມ


ໃນພິທີ ທ່ານ ຈັນພອນ ແກ້ວດວງຄຳ ຮອງຫົວໜ້າຫ້ອງການສຶກສາທິການແລະ ກິລາເມືອງຊຳ ເໜືອ ໄດ້ໃຫ້ຮູ້ວ່າ: ຈຸດປະສົງຂອງການຈັດງານໃນຄັ້ງນີ້ກໍເພື່ອເປັນການເປີດໂອກາດໃຫ້ພວກນ້ອງຫຼານນັກຮຽນໄດ້ສະແດງພອນສະຫວັນ, ຄວາມຮູ້ຄວາມສາມາດຂອງຕົນຢູ່ເທິງເວທີ, ໄດ້ແລກປ່ຽນບົດຮຽນເຊິ່ງກັນ ແລະ ກັນ, ທັງເພື່ອເປັນການສະເຫຼີມສະຫຼອງວັນທີ 1 ມີຖຸນາ 2018 ວັນເດັກນ້ອຍສາກົນ-ວັນປູກຕົ້ນໄມ້ແຫ່ງຊາດ ແລະ ເພື່ອເປັນການຂໍ່ານັບຮັບຕ້ອບ ວັນປະກາດເມືອງຊຳເໜືອ ເປັນເມືອງຈົບຊັ້ນມັດທະຍົມຕອນຕົ້ນບຳລຸງທົ່ວເມືອງ ເຊິ່ງຈະໄດ້ຈັດຂຶ້ນໃນທ້າຍປີ 2018 ນີ້ ພ້ອມທັງເປັນການສ້າງຂະບວນການໃຫ້ມີບັນຍາກາດຟົດຟື້ນມ່ວນຊື່ນ, ປະເພດ ສິລະປະ-ວັນນະຄະດີ ທີ່ຈັດແຂ່ງຂັນປະກອບມີສອງປະເພດ ຄື: ບົດຟ້ອນ ແລະ ບົດເພງ ໂດຍມີ 17 ໂຮງຮຽນ ມາຈາກທົ່ວເມືອງ ເຂົ້າຮ່ວມແຂ່ງຂັນ, ປະເພດບົດເພງມີ 6 ບົດ, ປະພເດບົດຟ້ອນມີ 11 ບົດ.


ຜ່ານການແຂ່ງຂັນສາມາດສະຫຼຸບໄດ້ດັ່ງນີ້: ປະເພດບົດເພງ: ລາງວັນຊະນະເລີດໄດ້ແກ່ເພງ ຫົວໃຈຄູຮ້ອງໂດຍ ນາງ ສຸດສະດາ ມາຈາກໂຮງຮຽນປະຖົມສົມບູນທາດເມືອງ, ອັນດັບທີ 2 ໄດ້ແກ່ເພງ ມ່ວນແທ້ບ້ານເຮົາ ຮ້ອງໂດຍ ນາງ ດາວຖິ່ນ ມາຈາກໂຮງຮຽນມັດທະຍົມຕອນຕົ້ນນາພຽງ, ອັນດັບທີ 3 ໄດ້ແກ່ເພງ ພູມໃຈທີ່ໄດ້ເກີດມາເປັນຄົນລາວ ຮ້ອງໂດຍ ນາງ ທິດາ ມາຈາກໂຮງຮຽນປະຖົມສົມບູນນາທົ່ງຈອງ.


ປະເພດບົດຟ້ອນ: ລາງວັນຊະນະເລີດໄດ້ແກ່ ບົດຟ້ອນ ໝູ່ຍິງ-ຊາຍ ບ້ານຝ້າຍເມືອງໄໝ ໂຮງຮຽນ ມສ ແວ່ນ, ອັນດັບທີ 2 ໄດ້ແກ່ບົດຟ້ອນ ລຳມະຫາໄຊ ໝູ່ຍິງ-ຊາຍ ໂຮງຮຽນ SOS ແຮັກມານໄມເນີ ແລະ ອັນດັບທີ 2 ໄດ້ແກ່ບົດຟ້ອນ ເຂົ້າໜຽວສຽງແຄນ.


ທ້າຍພິທີ ຄະນະປະທານ ໄດ້ພັດປ່ຽນກັນຂຶ້ນມອບລາງວັນໃຫ້ແກ່ຜູ້ເຂົ້າປະກວດຕາມລໍາດັບ ລາງວັນຊະນະເລີດ ປະເພດບົດເພງ ແລະ ບົດຟ້ອນ ໄດ້ຮັບເງິນສົດ 400.000 ກີບ, ອັນດັບທີ 2 ໄດ້ຮັບເງິນສົດ 300.000 ກີບ, ອັນດັບທີ 3 ໄດ້ຮັບເງິນສົດ 200.000 ກີບ ແລະ ລາງວັນຊົມເຊີຍ ໄດ້ຮັບເງິນສົດ 100.000 ກີບ

ຂ່າວໂດຍ: ສີສົມສັກ ພົມມາທຳ

LEAVE A REPLY

Please enter your comment!
Please enter your name here