ທ່ານ ນາງປານີ ຢາທໍ່ຕູ້ ເຄື່ອນໄຫວຢ້ຽມຢາມສັນຖະວະໄມຕີ ທີ່ຣາຊະອານາຈັກໄທ

0
6171

ໃນວັນທີ 1 ມີິຖຸນາ ປີ2018 ທ່ານ ນາງ ປານີຢາທໍ່ຕູ້ ປະທານ ສະພາແຫ່ງຊາດລາວ ພ້ອມດ້ວຍຄະນະໄດ້ອອກເດີນທາງໄປຢ້ຽມຢາມ ສັນຖະວະໄມຕີ ຢ່າງເປັນທາງການ ຕາມຄຳເຊີນ ຂອງພະນະ ທ່ານ ສ.ຈ ພິເສດ ພອນເພັດ ພິຊິດຊົນໄຊ ປະທານສະພານິຕິບັນຍັດແຫ່ງຊາດ ແຫ່ງຣາຊະອານາຈັກໄທ. ພາຍຫຼັງທີ່ຄະນະໄປເຖິງທີ່ສະໜາມບິນນານາຊາດສຸວັນນະພູມ ບາງກອກ ປະເທດໄທ ຄະນະໄດ້ຮັບການຕ້ອນຮັບຢູ່ທີ່ຫ້ອງກຽດຕິຍົດ ຈາກຮອງສາດສະດາຈານ ທ່ານ ນາງ ສຸມົນທາ ພອນຫົມບຸນ ປະທານມິດຕະພາບສະມາຊິກລັດຖະສະພາໄທ – ລາວ, ມີທ່ານ ທູດລາວປະຈຳບາງກອກປະເທດໄທ ແລະ ທູດໄທ ປະຈຳ ສ ປປ ລາວ ແລະ ເຈົ້າໜ້າທີ່ລະດັບສູງທັງສອງຝ່າຍອອກຕ້ອນຮັບຢ່າງພ້ອມພຽງ.

ຫຼັງຈາກນັ້ນ,ຄະນະກໍ່ໄດ້ເດີນທາງໄປຢ້ຽມຊົມໂຄງການກໍ່ສ້າງອາຄານລັດຖະສະພາຫຼັງໃໝ່ໂດຍໄດ້ຣັບການຕ້ອນຮັບຈາກພະນັກງານ ແລະ ຮັບຊົມການບັນຍາຍໂດຍຫຍໍ້ຕໍ່ກັບການກໍ່ສ້າງໂຄງການດັ່ງກ່າວ. ຕໍ່ມາທ່ານ ນາງ ປານີ ຢາທໍ່ຕູ້ ປະທານ ສະພາແຫ່ງຊາດລາວພ້ອມດ້ວຍຄະນະ ກໍ່ໄດ້ເຂົ້າພົບປະກັບ ທ່ານພົນ ເອກປຣະຢຸດ ຈັນໂອຊາ ນາຍຍົກລັດຖະມົນຕີ ແຫ່ງຣາຊະອານາຈັກໄທ ທີ່ຫ້ອງສີງາຊ້າງ ຕຶກໄທຄູ່ຟ້າ ທຳນຽບລັດຖະບານ.

ຈາກນັ້ນຄະນະກໍ່ໄດ້ໄປວາງພວງມາລາທີ່ອານຸສາວະລີ ພະບາດສົມເດັດພະປົກເກົ້າເຈົ້າຢູ່ຫົວ ຣາຊະການທີ7 ທີ່ຫນ້າລັດຖະສະພາ ນຳພາຄະນະໂດຍ ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດລາວ.

ສ່ວນພິທີພົບປະສອງຝ່າຍຂອງສອງສະພາແມ່ນໄດ້ຈັດຂື້ນທີ່ອາຄານລັດຖະສະພາ ແຫ່ງຣາຊະອານາຈັກໄທ ຝ່າຍລາວນຳໂດຍ ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດລາວ ແລະ ຝ່າຍໄທ ນຳໂດຍທ່ານ ສ.ຈ ພິເສດ ພອນເພັດ ພິຊິດຊົນໄຊ ປະທານສະພານິຕິບັນຍັດ ແຫ່ງຊາດ ແຫ່ງຣາຊະອານາຈັກໄທ.

ການພົບປະໃນຄັ້ງນີ້ທັງສອງຝ່າຍຕ່າງກໍ່ຕີລາຄາສູງຕໍ່ກັບການພົວພັນ ແລະ ການຮ່ວມມື ຂອງສອງປະເທດເຊິ່ງເຫັນວ່ານັບມື້ນັບຂະຫຍາຍຕົວດີຂື້ນ ສະແດງອອກຜ່ານການແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ຂອງລັດຖະບານ, ບັນດາຂະແໜງການ ໃນລະດັບສູນກາງ ແລະ ທ້ອງຖິ່ນ.

ລັດຖະບານສອງປະເທດໄດ້ມີການຮ່ວມມືກັນຫລາຍດ້ານໂດຍຜ່ານຫຼາຍກົນໄກການຮ່ວມມື ແລະໄດ້ຮ່ວມກັນລົງນາມໃນສັນຍາ, ສົນທິສັນຍາ, ຂໍ້ຕົກລົງບັນທຶກຊ່ວຍຈຳທີ່ກ່ຽວພັນເຖິງການຮ່ວມມືແບບສອງຝ່າຍມີທັງໝົດ 60 ກວ່າສະບັບ. ລັດຖະບານສອງປະເທດໄດ້ຮ່ວມມືກັນຮັກສາຄວາມເປັນລະບຽບຮຽບຮ້ອຍຕາມບໍລິເວນຊາຍແດນ ແລະ ຮອດປີ 2020 ສອງຝ່າຍຕົກລົງນຳກັນວ່າ: ຈະແກ້ໄຂການປັກຫຼັກຊາຍແດນທາງບົກໃຫ້ສຳເລັດ ແລະ ຮອດປີ 2021 ການປັກຫຼັກຊາຍແດນທາງນໍ້າໃຫ້ສຳເລັດເຊັ່ນດ່ຽວກັນ.

ສ່ວນການຮ່ວມມືທາງດ້ານການຄ້າເຫັນວ່າ ໃນປີ 2017 ມີມູນຄ່າຮ່ວມກັນເຖິງ 6,2 ຕື້ໂດ
ລາສະຫະລັດ ຖ້າທຽບໃສ່ໃນປີ 2016 ແມ່ນເພີ່ມຂື້ນ 6 ສ່ວນຮ້ອຍ. ໃນນີ້ ການສົ່ງອອກຂອງລາວໄປ
ໄທມີມູນຄ່າ 2,2 ຕື້ໂດລາສະຫະລັດ, ການນຳເຂົ້າຂອງລາວຈາກໄທແມ່ນ3,9ຕື້ໂດລາສະຫະລັດ.
ຄາດວ່າໃນປີ 2020 ມູນຄ່າການລົງທຶນທັງສອງປະເທດຈະບັນລຸໄດ້ 10 ຕື້ໂດລາສະຫະລັດ.

ການລົງທຶນຂອງໄທຢູ່ລາວມາຮອດປັດຈຸບັນແມ່ນຢືນຢູ່ໃນອັນດັບ2ຂອງການລົງທຶນຕ່າງປະເທດຢູ່ ສປປ ລາວ ຖັດຈາກ ສປ ຈີນ ເຊິ່ງມີມູນຄ່າການລົງທຶນ 4,5 ຕື້ໂດລາສະຫະລັດໃນ 758 ຄງການ. ການຮ່ວມມືດ້ານພະລັງງານໃນປີ 2017 ລາວໄດ້ຂາຍກະແສໄຟາຟ້າໃຫ້ຝ່າຍໄທຈຳນວນ 3.801 ເມກາວັດ ແລະຮອດສົກປີ 2020-2021 ຝ່າຍໄທຈະຊື້ໄຟຟ້າເພີ່ມລວມເປັນ 9,000 ເມກາວັດ.

ສ່ວນການຮ່ວມມືທາງດ້ານແຮງງານ ແລະການຄ້າມະນຸດເຫັນວ່າສອງປະເທດໄດ້ເອົາໃຈໃສ່ໃນການປົກປ້ອງສິດທິແຮງງານລາວທີ່ໄປອອກແຮງງານໃນໄທ, ລັດຖະບານໄທຍັງຈະສືບຕໍ່ກໍ່ສ້າງສີມືແຮງງານລາວ ແລະ ສືບຕໍ່ຊ່ວຍເຫຼືອສູນພັດທະນາສັງຄົມມິດຕະພາບລາວ-ໄທ ຢູ່ແຂວງວຽງຈັນ, ສ່ວນການພົວພັນຮ່ວມມືຂອງສອງສະພາເຫັນວ່າເປັນປົກະຕິແລະ ຕໍ່ເນື່ອງ ຊຶ່ງສອງສະພາໄດ້ມີການແລກປ່ຽນການຢ້ຽມຢາມໃນລະດັບສູງເຖິງລະດັບວິຊາການ.

ນອກຈາກນັ້ນ,ສອງສະພາລາວ-ໄທ ຍັງເປັນສະມາຊິກຂອງສະພາລັດຖະສະພາສາກົນ,ອົງການສະມັດຊາລັດຖະສະພາລະ
ຫວ່າງຊາດອາຊຽນ(ໄອປາ)ອົງການສະມັດຊາສະພາພາກພື້ນຈຳນວນໜື່ງ ແລະມີຫລາຍໂອກາດໄດ້ເຂົ້າຮ່ວມເຄື່ອນໄຫວວຽກງານນຳອົງການດັ່ງກ່າວ ແລະ ຍັງໄດ້ມີການແລກປ່ຽນ ແລະ ປຶກສາຫາລືຮ່ວມກັນໃນຫລາຍດ້ານຕື່ມອີກ.

ສຳລັບຕອນຄໍ່າຂອງວັນດ່ຽວກັນນີ້ ປະທານສະພານິຕິບັນຍັດແຫ່ງຣາຊະອານາຈັກໄທ ໄດ້ຈັດງານລ້ຽງຕ້ອນຮັບພະນະ ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ຢ່າງສົມກຽດ ເນື່ອງໃນໂອກາດທີ່ຄະນະຜູ້ແທນຂັ້ນສູງຂອງສະພາແຫ່ງຊາດລາວໄດ້ມາເຄື່ອນໄຫວຢ້ຽມຢາມສັນຖະວະໄມຕີ ທີ່ຣາຊະອານາຈັກໄທໃນຄັ້ງນີ້.

ຂ່າວ ແລະ ພາບ: ຈຸ້ນ ແກ້ວອຳພອນ

Cr: Laos National Radio

LEAVE A REPLY

Please enter your comment!
Please enter your name here