ກະຊວງສາທາລະນະສຸກ ຊີ້ຄົນລາວເສຍຊີວິດຍ້ອນການສູບຢາ 13 ຄົນຕໍ່ມື້

0
2141

ຕາມການສຳຫຼວດແຫ່ງຊາດກ່ຽວກັບການສູບຢາໃນກຸ່ມຄົນອາຍຸ 15 ປີຂຶ້ນໄປ ພົບວ່າຕົວເລກ ຄົນລາວສູບຢາມີລັກສະນະເພີ່ມຂຶ້ນ ແລະ ຍັງພົບວ່າມີຄົນລາວເສຍຊີວິດຍ້ອນການສູບຢາ 13 ຄົນຕໍ່ມື້ ເຊິ່ງຖືວ່າເປັນຕົວເລກທີ່ສູງ ແລະ ໜ້າຕົກໃຈ

ໃນທຸກໆປີ ກະຊວງສາທາລະນະສຸກ ຮ່ວມກັບ ອົງການອະນາໄມໂລກ, ສະມາພັນຄວບຄຸມຢາສູບອາຊຽນ ແລະ ປະຊາຊົນລາວ ໃນຂອບເຂດທົ່ວປະເທດໄດ້ຮ່ວມກັນສະເຫຼີມສະຫຼອງວັນງົດສູບຢາໂລກ (31 ພຶດສະພາ). ເຊິ່ງປີນີ້ແມ່ນເປັນຄັ້ງທີ 30 ສຳລັບ ສປປ ລາວ ຂອງພວກເຮົາແມ່ນຄົບຮອບ 9 ປີ ; ດັ່ງນັ້ນໃນວັນທີ 29 ພຶດສະພາ 2018 ກະຊວງສາທາລະນະສຸກ ໄດ້ຈັດພິທີຖະແຫຼງຂ່າວ ກ່ຽວກັບວັນງົດສູບຢາໂລກຂຶ້ນ ໂດຍການຖະແຫຼງຂອງທ່ານ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ.

ທ່ານ ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ໄດ້ກ່າວວ່າ: ປີນີ້ການສະເຫຼີມສະຫຼອງວັນດັ່ງກ່າວແມ່ນພາຍໃຕ້ຫົວຂໍ້ “ຢາສູບເປັນສາເຫດພາໃຫ້ເກີດພະຍາດຫົວໃຈ ແລະ ເສັ້ນເລືອດ” ເຊິ່ງແມ່ນພະຍາດທີ່ເຮັດໃຫ້ຄົນເສຍຊີວິດຫຼາຍທີ່ສຸດ. ອົງການອະນາໄມໂລກໄດ້ແຈ້ງວ່າໃນທົ່ວໂລກຈໍານວນຜູ້ເສຍຊີວິດຍ້ອນພະຍາດຫົວໃຈ ແລະ ເສັ້ນເລືອດທີ່ມີສາເຫດມາຈາກການສູບຢາກວມເອົາ 12% ສ່ວນຜູ້ເສຍຊີວິດທັງໝົດຍ້ອນການສູບຢາແມ່ນສູງເຖິງ 7 ລ້ານຄົນ ຕໍ່ ປີ.

ສຳລັບ ສປປ ລາວ, ອີງຕາມການສຳຫຼວດແຫ່ງຊາດກ່ຽວກັບການສູບຢາໃນກຸ່ມຄົນອາຍຸ 15 ປີຂຶ້ນໄປ ພົບວ່າ: ຄົນລາວສູບຢາເພີ່ມຂຶ້ນຈາກ 26% ໃນປີ 2012 ມາເປັນ 28% ໃນປີ 2015 ແລະ ຈາກການສໍາຫຼວດດັ່ງກ່າວໄດ້ພົບວ່າມີຄົນລາວເສຍຊີວິດຍ້ອນການສູບຢາ 13 ຄົນຕໍ່ມື້ ເຊິ່ງຖືວ່າເປັນຕົວເລກທີ່ສູງ ແລະ ໜ້າຕົກໃຈ
ຜົນການສຳຫຼວດໃນລະດັບຊາດກ່ຽວກັບຄ່າໃຊ້ຈ່າຍຂອງຄົນເຈັບໃນການເຂົ້າປິ່ນປົວຍ້ອນ 3 ພະຍາດຄື: ພະຍາດຫົວໃຈ-ເສັ້ນເລືອດ, ມະເຮັງປອດ ແລະ ເສັ້ນເລືອດໃນສະໝອງຕີບ-ຕັນ-ແຕກ ພົບວ່າ: ມູນຄ່າການເຂົ້ານອນປິ່ນປົວໃນໂຮງໝໍພຽງຄັ້ງດຽວຂອງທັງ 3 ພະຍາດນີ້ ມີມູນຄ່າສູງເຖິງ 28 ຕື້ກີບ ເຊິ່ງເທົ່າກັບ 0,28% ຂອງ GDP ຫຼື ປະມານ 22% ຂອງງົບປະມານລວມກະຊວງສາທາລະນະສຸກ. ໃນນີ້ 77% ແມ່ນຄອບຄົວຂອງຄົນເຈັບຈ່າຍເອງ, ລັດຖະບານຈ່າຍພຽງ 21% ແລະ 2% ເປັນການປະກອບສ່ວນຂອງປະກັນສຸຂະພາບ. ດັ່ງນັ້ນ, ລັດຖະບານຕ້ອງມີມາດຕະການອັນເຂັ້ມງວດ ແລະ ຮັດກຸມຂຶ້ນຕື່ມເພື່ອຄວບຄຸມການສູບຢາ ໂດຍສະເພາະການປຸກລະດົມໃຫ້ຄວາມຮູ້ກ່ຽວກັບຜົນຮ້າຍທີ່ເກີດຈາກການສູບຢາ ແລະ ການໄດ້ຮັບຄວັນຢາສູບ.

ທ່ານ ລັດຖະມົນຕີ ກະຊວງສາທາລະນະສຸກໄດ້ກ່າວເພີ່ມຕື່ມວ່າ: ໃນໂອກາດວັນງົດສູບຢາໂລກປີນີ້ຂໍຮຽກຮ້ອງມາຍັງທ່ານທີ່ຍັງສູບຢາທັງຫຼາຍຮູ້ວ່າການບໍ່ຢາສູບເປັນວິທີໜຶ່ງທີ່ມີປະສິດທິຜົນສູງໃນການປົກປ້ອງຕົນເອງ, ລູກຫຼານ, ຄອບຄົວ ແລະ ຄົນອ້ອມຂ້າງ ຈາກການເປັນພະຍາດຕ່າງໆໂດຍສະເພາະພະຍາດຫົວໃຈ-ເສັ້ນເລືອດ ແລະ ຈົ່ງພ້ອມກັນເຮັດໃຫ້ການບໍ່ສູບຢາກາຍເປັນຄ່ານິຍົມໃໝ່ຂອງສັງຄົມລາວ ເພື່ອໃຫ້ທຸກຄົນດຳລົງຊີວິດໃນສະພາບແວດລ້ອມທີ່ບໍ່ມີຄວັນຢາສູບ ແລະ ມີສຸຂະພາບແຂງແຮງອາຍຸຍືນຍາວທຸກຖ້ວນໜ້າ.

LEAVE A REPLY

Please enter your comment!
Please enter your name here