ເຫັນຮູບແລ້ວຢາກໄປ ທ່າແຕງຟາມ

0
8647

 

ວັນເດັກປີນີ້ບໍ່ມ່ວນສະເພາະແຕ່ນະຄອນຫຼວງວຽງຈັນ ແຕ່ແຂວງອື່ນໆກໍ່ຈັດກິດຈະກຳວັນເດັກຢ່າງຟົດຟື້ນໃນນັ້ນກໍ່ມີແຂວງເຊກອງນຳ, ເບິ່ງແຕ່ທ່າແຕງຟາມບ່ອນດຽວຍັງຄືກຄື້ນເປັນພິເສດຊາວເມືອງທ່າແຕງ ແລະບ່ອນອື່ນໆໄດ້ພາລູກຫຼານໄປທ່ຽວກັນຄັບຄັ່ງ.

 

ແຫຼ່ງທ່ຽວທ່ຽວສວຍງາມນີ້ຫາກໍ່ເປີດໃໝ່ໄດ້ເດືອນປາຍ ມີຊື່ເອີ້ນເປັນທາງການວ່າທ່າແຕງຟາມ ໃນສວນມີຫຼາຍຢ່າງໜ້າສົນໃຈຜູ້ໃຫຍ່ໄປດີເດັກນ້ອຍໄປກໍ່ໄດ້, ມີສັດລ້ຽງປະເພດແກະ, ມ້າ, ລ້ຽງປາ ແລະໄກ່ຢູ່ໃນສວນ ພ້ອມດ້ວຍອຸປະກອນເຄື່ອງຫຼິ້ນໃນນ້ຳ, ຂີ່ສະລິງອື່ນໆໜ້າສົນໃຈ.

ທ່າແຕງຟາມ ແລະ ລີສອດຕັ້ງຢູ່ບ້ານກົງຕາຢູນ ເມືອງທ່າແຕງແຂວງເຊກອງ ໄດ້ເປີດໃຫ້ບໍລິການເປັນທາງການໃນວັນທີ 11 ເມສາ 2018 ທີ່ຜ່ານມານີ້. ທ່າແຕງຟາມ ແລະລີສອດ ຫຼື ມີອີກຊື່ໜຶ່ງທີ່ທາງ 4 ແຂວງພາກໃຕ້ລຶ້ງເຄີຍກັນໃນຊື່ ໜອງເຮືອເປັດຫຼືໜອງເປັດ.

ຈຸດເລີ່ມຕົ້ນຂອງຊື່ສະຖານທີ່ແຫ່ງນີ້ ແມ່ນລິເລີ່ມຈາກການທີ່ມີເຮືອຖີບ 8 ລໍາ, ມີຮູບຊົງຄືເປັດ ທີ່ເຄີຍເປີດບໍລິການມາແລ້ວໄລຍະໜຶ່ງ ແຕ່ຍັງບໍ່ທັນມີຊື່ສະຖານທີ່ເທື່ອ ຈິ່ງເຮັດໃຫ້ຄົນທີ່ມາທ່ຽວ ໄດ້ຍົກເອົາຊື່ຂອງເຮືອເປັດມາຕັ້ງເປັນຊື່ສະຖານທີ່ແທນ ເພື່ອຄວາມເຂົ້າໃຈງ່າຍ ຈົນມາຮອດປະຈຸບັນ ຈິ່ງໄດ້ປ່ຽນຊື່ໃໝ່ເປັນ ທ່າແຕງ ຟາມ ແລະ ລີສອດ.

ເຫດຜົນ ແລະທີ່ມາຂອງຊື່ ທ່າແຕງ ຟາມ ແລະ ລີສອດນີ້ ແມ່ນຢາກໃຫ້ເຫັນແລະສອດຄ່ອງກັບກິດຈະການທີ່ມີເຊັ່ນ: ການລ້ຽງແກະ, ມ້າ, ລ້ຽງປາ, ໄກ່ສາຍພັນ ແລະ ການປູກຝັງ, ເໝາະສົມເປັນບ່ອນຜັກຜ່ອນຕາກອາກາດ ແລະ ເຢັນດີຕະຫຼອດປີ.

ໃນສວນເມືອງທ່າແຕງແຫ່ງນີ້ມີກິດຈະກໍາຖີບເຮືອເປັດອ້ອມໜອງລວມ 16 ລໍາ, ພາຍເຮືອຍັກມີ 5 ລໍາ, ຂີ່ມ້າມີ 2 ໂຕ,ໂຫນສະລິງຂ້າມໜອງນໍ້າ ທີ່ມີເຮືອເປັດລອຍໄປມາ, ຊົມແກະ, ຊົມໄກ່ຂາໃຫຍ່ ນອກນີ້ຍັງມີບໍລິການອາຫານແບບລາວໆ ແລະ ເຄື່ອງດື່ມໃຫ້ລູກຄ້າທີ່ເຂົ້າມາທ່ຽວຊົມ.

ທ່າແຕງຢາມຍັງບໍ່ຢຸດພັດທະນາພຽງເທົ່ານີ້ ໃນຕໍ່ໜ້ານີ້ ຍັງຈະສືບຕໍ່ສ້າງສະຖານທີ່ຜັກຜ່ອນຕາກອາກາດສົດ, ສ້າງເປັນລີສອດ-ເຮືອນພັກ ເພື່ອຕອບສະໜອງໃຫ້ລູກຄ້າທີ່ມາທ່ຽວຊົມແລ້ວຕ້ອງການຜັກຜ່ອນໄປນໍາ,ໃນນັ້ນ ຈະປະ
ກອບມີສະໂມສອນ ເພື່ອຮອງຮັບໃນການຈັດງານລ້ຽງຂັ້ນເມືອງໄປຈົນເຖິງລະດັບແຂວງ.

ແຫຼ່ງທ່ອງທ່ຽວແຫ່ງນີ້ ຕັ້ງຢູ່ບ້ານກົງຕາຢູນ ເມືອງທ່າແຕງ ແຂວງ ເຊກອງ ຫ່າງຈາກເທດສະບານເມືອງ ທ່າແຕງ 4 ກິໂລແມັດ.

 

 

LEAVE A REPLY

Please enter your comment!
Please enter your name here