ກຽມພົບກັບງານວາງສະແດງສິນຄ້າ Lao top 3 expo 2018 ວັນ​ທີ 7-9 ມິຖຸນາ

0
1234

ກຽມ​ພົບ​ກັບງານວາງສະແດງສິນຄ້າ Lao top 3 expo 2018  ເຊິ່ງ​ເປັນ​ງານ​ທີ່​ເຕົ້າໂຮມເອົາບັນດາຫົວໜ່ວຍທຸລະກິດທັງພາຍໃນ ແລະ ຕ່າງປະເທດເຂົ້າມາຢູ່ບ່ອນດຽວກັນຫຼາຍກວ່າ 200 ບໍລິສັດ ຈາກ 15 ປະເທດ ຖືເປັນງານລະດັບນາໆຊາດ ທີ່ມີສິນຄ້າຫຼາກຫຼາຍລາຍການທີ່ຫຼາຍທ່ານບໍ່ຄວນພາດໂອກາດໃນການເດີນທາງເຂົ້າຊົມໂດຍບໍ່ມີການເສຍຄ່າ ລະຫວ່າງວັນທີ 7-9 ມິຖຸນາ 2018 ທີ່ຫໍປະຊຸມແຫ່ງຊາດ.


ງານຖະແຫຼງຂ່າວ Lao top 3 expo 2018 ຈັດຂຶ້ນໃນວັນທີ 30 ພຶດສະພາ 2018 ຜ່ານມາທີ່ນະຄອນຫຼວງວຽງຈັນ ໂດຍທ່ານ ພອນໄຊ ສຸດທິວົງ ປະທານສະມາຄົມສະຖາປານິກ ແລະ ວິສະວະ ກອນ ກໍ່ສ້າງລາວ, ທ່ານ ປາກາສິດ ຈັນທະປັນຍາ ຮອງປະທານສະມາຄົມໂຮງແຮມ, ເຮືອນພັກ ແລະ ຮ້ານອາຫານ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ສື່ມວນຊົນທຸກຂະແໜງເຂົ້າຮ່ວມ.


ທ່ານ ພອນໄຊ ສຸດທິວົງ ກ່າວວ່າ: ງານວາງສະແດງສິນຄ້າ Lao top 3 expo 2018 ເປັນງານສະແດງສິນຄ້າທີ່ໃຫຍ່ທີ່ສຸດໃນ ສປປ ລາວ ທີ່ບໍ່ເຄີຍມີມາກ່ອນ ເຊິ່ງເປັນການລວມເອົາອຸດສາຫະກຳອາຄານ ແລະ ການກໍ່ສ້າງ, ການບໍລິ ການ, ອາຫານ ແລະ ເຄື່ອງດື່ມ ແລະ ອຸດສາຫະກຳລົດຍົນ ໂດຍມີກຳນົດຈັດລະຫວ່າງວັນທີ 7-9 ມິຖຸນາ 2018 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃນງານຈະໄດ້ພົບກັບຫຼາຍກວ່າ 200 ບໍລິສັດ ຈາກພາຍໃນ ແລະ ຕ່າງປະເທດ ຈະໄດ້ພົບກັບສິນຄ້າຊັ້ນນຳຈາກ 15 ປະເທດຄື: ສປ ຈີນ, ອີຕາລີ, ສ.ເກົາຫຼີ, ມາເລເຊຍ, ສິງກະໂປ, ໄທ ແລະ ອີກຫຼາຍປະເທດ.
ທ່ານ ປາກາສິດ ຈັນທະປັນຍາ ກ່າວວ່າ: ສຳລັບຂະແໜງໂຮງແຮມ ແລະ ຮ້ານອາຫານແມ່ນຈະໄດ້ມີການແຂ່ງຂັນທາງດ້ານບໍລິການ ແລະ ການປຸງແຕ່ງອາຫານປະຈຳຊາດ ໂດຍພະນັກງານການບໍລິການຈະແຂ່ງຂັນກັນໃນ 8 ຂະແໜງການປະກອບດ້ວຍ: ການປຸງແຕ່ງອາຫານຮ້ອນ, ການປຸງແຕ່ງເຄື່ອງດື່ມ, ຊົງກາເຟ, ການຕົກແຕ່ງໂຕະ, ການອອກແບບຕຽງ, ການຕົກແຕ່ງເຄັກ ແລະ ເຂົ້າຈີ່.


ງານວາງສະແດງຄັ້ງນີ້ນອກຈາກວາງສະແດງ ແລະ ຂາຍສິນຄ້າແລ້ວຍັງເປັນການນັດພົບປະກັນລະຫວ່າງນັກອອກແບບສະຖາປານິກກັບຜູ້ປະກອບການ ແລະ ຮູ້ຈັກເຄື່ອງມືທີ່ກຳລັງອອກໃໝ່ ທັງເປັນການສື່ສານແລກປ່ຽນບົດຮຽນລະຫວ່າງນັກທຸລະກິດ ແລະ ນັກທຸລະກິດດ້ວຍກັນເພື່ອໃຫ້ເກີດປະໂຫຍດທັງສອງຝ່າຍ ແລະ ຫຼາຍຝ່າຍເພື່ອເຮັດທຸລະກິດຮ່ວມກັນ ທັງເປັນການສົ່ງເສີມການທ່ອງທ່ຽວທີ່ ສປປ ລາວ ເປັນເຈົ້າພາບປີທ່ອງທ່ຽວລາວ 2018 ກະຕຸ້ນເສດຖະກິດໃຫ້ມີບັນຍາກາດຄຶກຄື້ນ.

ແຫຼ່ງ​ທີ່​ມາ​ຈາກ​ໜັງ​ສື​ພິມ​ເສດ​ຖະ​ກດ ການ​ຄ້າ

LEAVE A REPLY

Please enter your comment!
Please enter your name here