ດ່ານກວດກາເຄັ່ງຄັດຍັງມີລັກລອບນຳເຂົ້າບໍ່ເກງກົດໝາຍ

0
2147

ບັນດາດ່ານສາກົນແມ່ນບໍ່ໄດ້ນິ້ງນອນໃຈຕໍ່ບັນຫາການລັກລອບນຳເຂົ້າສິນຄ້າທີ່ບໍ່ໄດ້ຄຸນນະພາບ, ສິນຄ້າປອມແປງ ຫຼື ແມ່ນແຕ່ສິນຄ້າທີ່ລອບລອບໜີພາສີອາກອນ ກວດເຫັນກໍ່ຕ້ອງຈັບຄົນປັບໃໝຕາມລະບຽບການ ສ່ວນຂອງກາງກໍ່ຢືດມາທຳລາຍຖີ້ມ ແຕ່ປານນັ້ນຢູ່ຕາມຕະຫຼາດທົ່ວໄປຍັງປະກົດໃຫ້ເຫັນເລື້ອຍມາ ຜູ້ຮັບເຄາະກໍ່ຄືປະຊາຊົນຕາດຳໆ.

ຫຼ້າສຸດເມື່ອວັນທີ 31 ພືດສະພາ 2018 ຜ່ານມານີ້ທີ່ດ່ານສາກົນຂົວມິດຕະພາບນໍ້າເຫືອງ ເມືອງແກ່ນທ້າວ ແຂວງໄຊຍະບູລີ ເຈົ້າໜ້າທີ່ສັດຕະວະແພດ ແລະ ເຈົ້າໜ້າທີ່ປະຈໍາດ່ານສາກົນຂົວມິດຕະພາບນໍ້າເຫືອງ ເມືອງແກ່ນທ້າວ ແຂວງໄຊຍະບູລີ ໄດ້ກວດພົບເຫັນການຕ່າງສິນຄ້າ ທີ່ນຳເຂົ້າບໍ່ຖືກຕ້ອງຕາມລະບຽບ,ລັກນຳເຂົ້າດ້ວຍວິທີເຊື່ອງຊ້ອນມາກັບສິນຄ້າຊະນິດອື່ນທີ່ມີເອກະສານນຳເຂົ້າຖືກຕ້ອງ ໂດຍລົດໄຮລັກ (ວີໂກ) ສີປອນເງິນ ທະບຽນ ຜສ 9155 ຂອນແກ່ນ (ລົດຄົນໄທ) ໄດ້ຕ່າງສິນຄ້າຫ້າມນໍ້າເຂົ້າເຊັ່ນ: ປີກໄກ່ , ຕີນໄກ່, ໄກ່ປອກ, ຊີ້ນໝູ ແລະ ເຄື່ອງໃນງົວ ເພື່ອສົ່ງໄປເມືອງໄຊຍະບູລີ.

ຜ່ານການກວດກາມີສິນຄ້າຫ້າມນໍາເຂົ້າທັງໝົດ 1.050 ກິໂລ, ໃນນີ້ ປີກໄກ່ ແລະ ຕີນໄກ່ 360 ກິໂລ, ໄກ່ປອກ 50 ກິໂລ, ຊີ້ນໝູ 100 ກິໂລ ແລະ ເຄື່ອງໃນງົວ 540 ກິໂລ. ທາງພາກສ່ວນທີ່ກ່ຽວຂ້ອງຈຶ່ງໄດ້ຍຶດໄວ້ເພື່ອທຳລາຍຖິ້ມ ພ້ອມທັງເຮັດບົດບັນທຶກການກະທຳຜິດໄວ້ເປັນຫຼັກຖານ. ຖ້າຫາກຕ້ອງການນຳເຂົ້າຄັ້ງຕໍ່ໄປ ຜູ້ກ່ຽວຕ້ອງປະກອບເອກະສານຕາມຂັ້ນຕອນ, ພ້ອມທັງເຮັດໜັງສືສະເໜີຫາພາກສ່ວນທີ່ກ່ຽວຂ້ອງ ເພື່ອຂໍອະນຸຍາດນຳເຂົ້າ ຖ້າຫາກບໍ່ປະຕິບັດຕາມ ທາງເຈົ້າໜ້າທີ່ສັດຕະວະແພດປະຈຳດ່ານ ຈະບໍ່ອະນຸຍາດໃຫ້ນຳເຂົ້າຢ່າງເດັດຂາດ ຖ້າຝ່າຝືນຈະປັບໄໝ 2 ເທົ່າ.

ຕໍ່ມາໃນຕອນແລງວັນທີ 1 ມິຖຸນາ 2018 ນີ້, ຢູ່ທີ່ດ່ານສາກົນຂົວມິດຕະພາບນໍ້າເຫືອງ ໄດ້ຈູດທໍາລາຍສິນຄ້າດັ່ງກ່າວ, ໂດຍມີທ່ານ ອໍາຄາ ລັດສະໝີ ຫົວໜ້າດ່ານສາກົນຂົວມິດຕະພາບນໍ້າເຫືອງ, ມີພາສີປະຈໍາດ່ານ, ຕມ ດ່ານ, ໜ່ວຍງານກ່ຽວຂ້ອງ ແລະ ພະນັກງານຫ້ອງການກະສິກໍາ ແລະ ປ່າໄມ້ເມືອງແກ່ນທ້າວເຂົ້າຮ່ວມ ແລະ ໃນຕອນແລງຂອງວັນດຽວກັນຍັງກວດພົບສິນຄ້າດັ່ງກ່າວຕື່ມ 70 ກິໂລ ຈຶ່ງໄດ້ຈູດທໍາລາຍຖິ້ມທັງໝົດ.

 

LEAVE A REPLY

Please enter your comment!
Please enter your name here