ຈັບໄດ້ຄາໜັງຄາເຂົາຄົນລັກຖີ້ມຂີ້ເຫຍື້ອທາງໜອງບຶກ

0
6414

ບ້ານເຮົາປະຊາຊົນຍັງມັກງ່າຍ ຂີ້ເຫຍື້ອໃນມືໃຊ້ແລ້ວດຶກລົງພື້ນໜ້າຕາເສີຍ ເຮັດໃຫ້ມີເສດຂີ້ເຫຍື້ອຢັ່ງຢາຍເຕັມບ້ານເຕັມເມືອງ, ຢູ່ນະຄອນຫຼວງວຽງຈັນແຫ່ງຄັກ ເສັ້ນທາງສ້າງໃໝ່ບ່ອນໃດພໍບ່ອນນັ້ນ ຖ້າປ່ຽວໜ້ອຍໜຶ່ງແດ່ສ້າງແລ້ວສິ່ງທຳອິດທີ່ປະກົດເຫັນບໍ່ແມ່ນພາກັນອະນາໄມແຕ່ເປັນຂີ້ເຫຍື້ອເປັນກອງໆ ຊຶ່ງພາກສ່ວນກ່ຽວຂ້ອງກໍ່ພະຍາຍາມສອດສ່ອງຜູ້ກະທຳຜິດແຕ່ຈັບບໍ່ໄດ້ຈັກບາດ ຈົນມາວັນນີ້.

ໃນເວລາ 15 ໂມງ ຂອງວັນທີ 25 ພຶດສະພາ 2018 ມີພົນລະເມືອງດີ ໄດ້ພົບເຫັນ ທ້າວ ອາປິ້ງ, ອາຍຸ 46 ປີ, ສັນຊາດຈີນ, ອາຊີບກຳມະກອນ ພັກເຊົາຢູ່ຕະຫລາດຊັງຈຽງ ໄດ້ນຳໃຊ້ ລົດກະບະ ຮຸນໄດ ສີຂາວ( ບໍ່ມີໝາຍເລກທະບຽນ) ອອກຊື່ ນາງ ຈັນຫອມ ວັນນະວົງ ອາຍຸ 48 ປີ ອາຊີບແມ່ເຮືອນ ຢູ່ບ້ານ ວັດໄຕນ້ອຍທົ່ງ ເມືອງ ສີໂຄດຕະບອງ; ໄດ້ຂົນຂີ້ຫຍື້ອໄປລັກຖີ້ມ ຢູ່ເສັ້ນທາງໜອງບົວທອງ-ໜອງບຶກ.

ດັ່ງນັ້ນ ປກສ ກຸ່ມບ້ານ ຈຶ່ງໄດ້ ກັກລົດຜູ້ກ່ຽວ ແລະດຳເນີນການກ່າວຕັກເຕືອນ ພ້ອມປັບໃໝ ຕາມ ມາດຕາ 3 ຂໍ້ 3.1 ວ່າດ້ວຍແຜນວຽກ ແລະ ມາດຕະການເສັ້ນທາງສະອາດ ຂອງມະຕິຕົກລົງອົງການປົກຄອງສະບັບເລກທີ 03/ອປຄ.ນວ, ລົງວັນທີ25 ກັນຍາ 2015, ເປັນຈຳນວນເງິນ 10,000,000 ກີບ, ( ຊຶ່ງໃນນີ້ ໄດ້ແບ່ງໃຫ້ຜູ້ພົບເຫັນ 30% ເຫລືອ 70% ອຳນາດການປົກຄອງບ້ານນຳໃຊ້ເຂົ້າໃນວຽກລວມຂອງບ້ານ) ພ້ອມທັງເຮັດບົດບັນທຶກ ຖ້າພົບເຫັນອີກເທື່ອໜ້າ ຈະໄດ້ ປັບໃໝເພີ່ມອີກ 10 ເທົ່າ.

ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນ (ຄບຕ) ຂໍຄວາມຮ່ວມມື້ມາຍັງພໍ່ແມ່ປະຊາຊົນ ຈົ່ງຊ່ວຍກັນເປັນຫູເປັນຕາ ຖ້າພົບເຫັນໃຫ້ແຈ້ງອຳນາດການປົກຄອງບ້ານ ຫຼື ຫ້ອງການ ຄບຕ ໂທ: 020 56621164. ເປັນເຈົ້າການຮ່ວມກັນສະກັດກັ້ນພວກຄົນມັກງ່າຍໃຫ້ຮູ້ສຳນຶກ ແລະທີ່ສຳຄັນແມ່ນເພື່ອຄວາມເປັນລະບຽບຮຽບຮ້ອຍ, ຄວາມສະອາດສວຍງາມຂອງບ້ານເມືອງເຮົາ.

 

LEAVE A REPLY

Please enter your comment!
Please enter your name here