ຊົມເຊີຍ ລັດຖະບານການ ປີຜ່ານມາ ແກ້ໄຂລົດນຳເຂົ້າບໍ່ຖືກຕ້ອງໄດ້ 10 ພັນກວ່າຄັນ ເກັບລາຍຮັບໄດ້ຫຼາຍກວ່າ177ຕື້ກີບ

0
10

ເວັບໄຊhttps://laoedaily.com.la ຂອງໜັງສືພິມເສດຖະກິດ ການຄ້າລາຍງານວ່າ: ທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ ກະຊວງການເງິນ ໄດ້ລາຍງານຕໍ່ ກອງປະຊຸມແນະນຳການຈັດຕັ້ງປະຕິບັດງົບປະມານແຫ່ງລັດປະຈຳປີ 2018 ໃນຄັ້ງວັນທີ 26 ທັນວາ 2017 ຜ່ານມາວ່າ: ການຈັດຕັ້ງປະຕິບັດການແກ້ໄຂລົດນຳເຂົ້າບໍ່ຖືກຕ້ອງຕາມແຈ້ງການລັດຖະບານ ສະບັບເລກທີ 142/ຫສນຍ.ກລຂ, ລົງວັນທີ 25 ມັງກອນ 2017 ສະຫຼຸບໄດ້ຄື ສາມາດແກ້ໄຂໄດ້ທັງ ໝົດຈຳນວນ 11.030 ຄັນ.

ໃນນີ້ລົດໃຫຍ່ 4.449 ຄັນ, ລົດຈັກ 6.581 ຄັນ ສາມາດເກັບລາຍຮັບ ເຂົ້າງົບ ປະມານໄດ້ທັງໝົດ ຈຳນວນ 177,7 ຕື້ກີບ, ໃນນີ້ ຄ່າພາສີ-ອາກອນຈຳນວນ 168,8 ຕື້ກີບ ແລະ ຄ່າປັບໃໝ 8,9 ຕື້ກີບ. ສ່ວນທີ່ເຫຼືອຍັງບໍ່ສາມາດແກ້ໄຂໄດ້ທັນຕາມກົດນົດເວລາແມ່ນຫັນມາແກ້ ໄຂຕາມກົດໝາຍ ແລະ ລະບຽບການຢ່າງເຂັ້ມງວດ.

ແຕ່ເຖິງຢ່າງໃດກໍ່ຕາມ, ຢູ່ບັນດາແຂວງ ແລະ ສຳນັກງານອົງການ ກໍ່ຍັງມີລົດນຳເຂົ້າບໍ່ຖືກຕ້ອງ ຕົກຄ້າງເປັນຈຳນວນຫຼາຍ ໂດຍສະເພາະລົດຈັກ ແລະ ລົດໃຫຍ່ທີ່ຕິດປ້າຍສີຟ້າ. ຕໍບັນຫາດັ່ງກ່າວ ກົມພາສີເຫັນວ່າ ຕ້ອງໄດ້ປະຕິບັດຕາມແຈ້ງການຂອງລັດຖະບານຢ່າງເຂັ້ມງວດ, ເພາະຖ້າສືບຕໍ່ແກ້ໄຂ ກໍ່ຈະເປັນຊ່ອງຫວ່າງໃນການລັກລອບນຳເຂົ້າພາຫະນະ ແລະ ແກ້ໄຂບໍ່ສິ້ນສຸດ.

ທ່ານ ບຸນປະເສີດ ຍັງໃຫ້ຮູ້ຕື່ມວ່າ: ການນຳເຂົ້າພາຫະນະໃນໄລຍະຜ່ານມາ ກົມພາສີໄດ້ ເອົາໃຈໃສ່ການຄຸ້ມຄອງການນຳເຂົ້າ, ແຕ່ສະພາບການລັກລອບນຳເຂົ້າພາຫະນະກໍຍັງມີແຜ່ຫຼາຍ ເປັນຕົ້ນ: ການນຳເຂົ້າລົດທ່ອງທ່ຽວຢ້ຽມຢາມ (ບ53) ປັດຈຸບັນ ລົດທີ່ນຳເຂົ້າມາທ່ອງທ່ຽວແມ່ນຕົກຄ້າງໃນບັນຊີ ບໍ່ນຳອອກຄືນເປັນຈຳນວນຫຼາຍພັນຄັນ, ສາຍເຫດໜຶ່ງກໍ່ອາດເກີດຈາກລະບົບເອເລັກໂຕຣນິກການຄຸ້ມຄອງ ລົດດັ່ງກ່າວຂອງບັນດາດ່ານພາສີຍັງບໍ່ທັນເຊື່ອມຈອດກັນ, ອີກສາຍເຫດໜຶ່ງ ແມ່ນຍ້ອນມີຜູ້ສວຍໃຊ້ ໂອກາດນໍາເຂົ້າມາແລ້ວຂາຍທົ່ວໄປເຮັດໃຫ້ເກີດປະກົດການຫຍໍ້ທໍ້.

ເພື່ອແກ້ໄຂບັນຫາດັ່ງກ່າວ, ກົມພາສີໄດ້ມີມາດຕະການຄື: ປັບປຸງ ແລະ ພັດທະນາລະບົບ ບ53 ຢູ່ບັນດາດ່ານ; ປະສານສົມທົບກັບຂະແໜງການກ່ຽວຂ້ອງການນຳພາຫະນະທ່ອງທ່ຽວຢ້ຽມຢາມຕ້ອງໄດ້ ກວດກາເອກະສານລົດໃຫ້ຖືກຕ້ອງກັບຜູ້ຂັບຂີ່ນຳເຂົ້າ ແລະ ຕ້ອງໄດ້ປະກອບເອກະສານໃບຄ້ຳປະກັນ ເພື່ອເປັນຂໍ້ມູນໃນການຕິດຕາມຊອກຫາໃນເວລາບໍ່ນຳລົດອອກຄືນ.

LEAVE A REPLY

Please enter your comment!
Please enter your name here