ຄວາມຄືບໜ້າການສະເໜີຊື່ປ່າສະຫງວນແຫ່ງຊາດ ພູຫີນໜາມໜໍ່ ເຂົ້າເປັນມໍລະດົກໂລກ

0
14

ຂປລ. ກອງປະຊຸມລາຍງານ ຜົນການຈັດຕັ້ງປະຕິບັດ ແລະ ຮອງຮັບແຜນປະຈໍາປີ 2018, ລາຍງານຄວາມຄືບໜ້າ ການຈັດຕັ້ງປະຕິບັດ ແລະ ແນວທາງການສະເໜີຊື່ ປ່າສະຫງວນແຫ່ງຊາດ ພູຫີນໜາມໜໍ່ ເຂົ້າເປັນມໍລະດົກໂລກ ໄດ້ຈັດຂຶ້ນໃນວັນທີ 26 ມັງກອນ 2018 ຢູ່ຫ້ອງວ່າການປົກຄອງ ແຂວງຄໍາມ່ວນ, ໂດຍການເປັນປະທານຮ່ວມ ຂອງ ທ່ານ ບົວເງິນ ຊາພູວົງ ຮອງລັດຖະມົນຕີກະຊວງ ຖວທ, ທ່ານ ຄໍາສີ ອຸດທິວົງ ຮອງເຈົ້າແຂວງຄໍາມ່ວນ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ເຈົ້າເມືອງບົວລະພາ, ມີບັນດາຕາງໜ້າກົມ, ພະແນກການ, ຂະແໜງການ, ຊ່ຽວຊານໂຄງການ GIZ ຕະຫລອດເຖິງພະນັກງານ ວິຊາການທີ່ກ່ຽວຂ້ອງຈາກສູນກາງ ແລະ ທ້ອງຖິ່ນ ເຂົ້າຮ່ວມ, ເຊິ່ງເຫັນວ່າ ມາຮອດປັດຈຸບັນ ການສະເໜີລາຍຊື່ປ່າສະຫງວນແຫ່ງຊາດ ຫີນໜາມໜໍ່ ເຂົ້າເປັນມໍລະດົກໂລກ ແມ່ນມີຄວາມຄືບໜ້າຫລາຍ.

ທ່ານ ສີສົມພອນ ສຸດທິຈັກ ຫົວໜ້າຂະແໜງຄຸ້ມຄອງຊັບພະຍາກອນປ່າໄມ້ ໄດ້ໃຫ້ຮູ້ວ່າ: ປ່າສະຫງວນແຫ່ງຊາດຫີນໜາມໜໍ່ ຖືກບັນຈຸເຂົ້າໃນມະຕິ 7, 8, 9, 10 ຂອງສູນກາງພັກ ເພື່ອສະເໜີ ເປັນມໍລະດົກໂລກ ທາງດ້ານທໍາມະຊາດ ແລະ ແຜນພັດທະນາ ເສດຖະກິດ-ສັງຄົມແຫ່ງຊາດ, ມີທິວທັດທໍາມະຊາດ ແລະ ພູມສັນຖານທີ່ເປັນເອກະລັກສະເພາະ ຂອງຜາຫີນປູນ ທີ່ປະກອບດ້ວຍ ຖໍ້າ, ສາຍນໍ້າ, ພູຫີນ, ມີຄວາມອຸດົມສົມບູນ ໄປດ້ວຍປ່າໄມ້, ສັດປ່າທີ່ຫາຍາກໃກ້ຈະສູນພັນ ແລະ ຄວາມຫລາກຫລາຍທາງ ດ້ານຊີວະນາໆພັນ, ເປັນເຂດທີ່ພາກພື້ນ ແລະ ໂລກ ໃຫ້ຄວາມສົນໃຈ , ມີຄວາມຫລາກຫລາຍ ທາງດ້ານຮີດຄອງປະເພນີ ຂອງປະຊາຊົນບັນດາເຜົ່າ, ເປັນເຂດທີ່ມີມູນເຊື້ອໃນການຕໍ່ສູ້ກູ້ຊາດ ຕ້ານກັບຈັກກະພັດຜູ້ຮຸກຮານ ແລະ ເຂດດັ່ງກ່າວ, ສາມາດພັດທະນາເປັນ ແຫລ່ງທ່ອງທ່ຽວທໍາມະຊາດ, ປະຫວັດສາດ ແລະ ວັດທະນະທໍາ.

ສ່ວນດ້ານການປົກປັກຮັກສາ ແລະ ຄຸ້ມຄອງ ແມ່ນໄດ້ຮັບການສະໜັບສະໜູນ ຈາກໂຄງການ GIZ ກໍຄື ໂຄງການຮ່ວມມື ລາວ-ເຢຍລະມັນ, ການຊ່ວຍເຫລືອທາງດ້ານ ເຕັກນິກວິຊາການ ຈາກລັດຖະບານເຢຍລະມັນ ໃນການຄຸ້ມຄອງ ແລະ ປົກປັກຮັກສາປ່າສະຫງວນແຫ່ງຊາດຫີນໜາມໜໍ່ ໃຫ້ມີຄວາມຍືນຍົງແບ່ງອອກເປັນ 2 ໄລຍະ ຄື:

ໄລຍະທີ 1 ແຕ່ເດືອນຕຸລາ 2010 ຫາ ສິງຫາ 2013 ມູນຄ່າທັງໝົດ 2,5 ລ້ານເອີໂຣ, ໄລຍະທີ 2 ແຕ່ເດືອນຕຸລາ 2013 ຫາ ສິງຫາ 2015 ມູນຄ່າທັງໝົດ 2,5 ລ້ານເອີໂຣ, ສັນຍາການຮ່ວມມື ສະບັບຄັ້ງວັນທີ 29 ມັງກອນ 2016 ສືບຕໍ່ຊ່ວຍເຫລືອ ທາງດ້ານເຕັກນິກວິຊາການ ຈາກລັດຖະບານເຢຍລະມັນ ໄລຍະທີ 1 ເລີ່ມແຕ່ເດືອນຕຸລາ 2015 ຫາ ທັນວາ 2016 ໃນມູນຄ່າ 2,5 ລ້ານເອີໂຣ;

ໄລຍະທີ 2 ແຕ່ເດືອນມັງກອນ 2017 ຫາ ເດືອນມີນາ 2019 ມູນຄ່າທັງໝົດ 1,68 ລ້ານເອີໂຣ, ເຊິ່ງການຊ່ວຍເຫລືອດັ່ງກ່າວ ແມ່ນສຸມໃສ່ການສ້າງຄວາມເຂັ້ມແຂງ ທາງດ້ານເຕັກນິກວິຊາການ ໃນການຄຸ້ມຄອງປົກ ປັກຮັກສາປ່າສະຫງວນ ແລະ ໄພຂົມຂູ່, ການສ້າງກິດຈະກໍາໃນຊຸມຊົນ ໃຫ້ມີລາຍຮັບຈາກແຫລ່ງທ່ອງທ່ຽວ, ກິດຈະກໍາເກັບກູ້ເຄື່ອງປ່າຂອງດົງ, ການບໍລິຫານ-ຄຸ້ມຄອງທີ່ດິນ ແລະ ອື່ນໆ.

LEAVE A REPLY

Please enter your comment!
Please enter your name here